Mahendo 24

Ayahudi anamulumbira Pʼaulo mbere za Felisi

1Ziriphochira tsʼiku tsʼano, yiye kuhani mubomu aihiwaye Anania wakwenda Kaisariya jimula na atumia fulani, na wakili mumwenga wa shariya aihiwaye Tʼeritulo. Kuko, ákwenda kwa yiye gavuna, achendamwambira malumbano gao dzulu ya Pʼaulo. 2Pʼaulo ariphoihiwa, Tʼeritulo waanza kulumba vivi, “Mwishimiwa Felisi, uwe udzihulongoza kare tsʼiku nyinji, na ukati uo wosi hudzisagala na reri, na uo ulongozio udzendereza itsʼi yehu muno. 3Atʼu osi phapha phehu itsʼini, anahamirwa muno ni ulongozio uwe mwishimiwa, na huna mumvera nawe muno. 4Mwishimiwa Felisi, mimi tsʼenzi nikaze kuyaza ukatio, ela siswi hunakuvoya kwa mbazizo uhusirikise vichache tu. 5Sino mutʼu yuyu Pʼaulo hwamugwira kwakukala, hwamumanya ni mui muno. Yiye unabitʼa muyuwano kati ya Ayahudi duniani kosi, na chisha ni chilongozi wa chira chama cha achina Nazareti. 6Chisha, yuyu waheza hata kuritiya najisi Hekalu, na phapho sino ndipho huchimugwira.#24:6b-8a Nakala zinjine zinaonjeza mafungu gaga dza: Ndo huchikala hunahenza humulamule kutuwirizana na shariya yehu. 7 Ela Lusiya dza mubomu wa shikari a viha, wagaphenyerera na achimuhwala kwa mabavu. 8 Chisha, achialagiza alumbirie adze kuku kwako. 8Ndo uwe mwenye uchimuuza unaidima kumanya gago maneno gosi humulumbirago bee ni ga jeri.” 9Ayahudi nao phapho achigomba achiamba, malumbano gago gosi ni ga jeri.

Pʼaulo unadzihehera mbere za Felisi

10Ndo gavuna Felisi wamuhadza Pʼaulo naye kwa agombe. Pʼaulo achanza kugomba kwa kwamba, “Ninahamirwa kudzihehera mberezo nichimanya kukala, udzikala mulamuli wa itsʼi yiyi kwa myaka minji.

11“Uwe uchihenza, unaidima kuhakikisha kukala, mimi tsʼidzangwe kuhenda hata tsʼiku kumi na mbiri hangu niriphokwenda Jerusalemu kwendamwabudu Mulungu. 12Bee mwishimiwa Felisi, aa Ayahudi kʼaanonere ninalumbana na mutʼu yeyosi kwenye riro Hekalu, na kʼaanonere ninaasunganya atʼu abitʼe muyuwano kwenye masinagogi, hebu phatʼu phanjine phophosi mudzi uo. 13Na kʼaaidima kugahakikisha gaga malumbano godzinihendera. 14Nikubalicho mberezo ni kwamba, mimi bee ninamuvoya Mulungu wa akare ehu kwa kutuwa Njira yiyatʼu yiriyo aa Ayahudi anayiiha chama cha ulongo. Mimi ninakuluphira maneno gosi goandikwa Shariyani mwa Musa, na chila roandikwa ni agomvi a Mulungu. 15Na ninamukuluphira Mulungu dza vivyo amukuluphiravyo aa kukala, atʼu osi adzo na ai andakudzafufuka kulaa kuzimu. 16Ndo ninahenda vyangu niidimavyo tsʼiku zosi kwa nidzone ninahenda ga haki mbere za Mulungu na hata atʼu.

17 # Mahe 21:17-28 “Mimi niriphosagala kure kwa myaka fulani, náuya Jerusalemu kwendaaphirikira Ayahudi asena wavizi wa pʼesa, na kulavya sadaka kwa Mulungu. 18Ndo ukati phokala ninahenda gago mumo Hekaluni phapho ndipho aa ánona, na nákala nidzigamala kare mavoyo ga kudzitakasa, na phapho kʼaphakalire na duu ra atʼu, na tsʼibitʼire muyuwano wowosi. 19Ukati uo okala a phapho ni Ayahudi fulani kulaa jimbo ra Asiya. Na chikala nina kosa ra kulumbirwa, ao ndio awiryao kukala phapha mberezo, akalavya malumbano gao. 20Hebu aa ario phapha, naaseme kosa rangu rorona ukati niriphodzihehera mbere za ngambi bomu. 21#Mahe 23:6Mimi tsʼimanya kale kosa rangu ni garatʼu gogagomba, phoima mbere zao kukala, ‘Rero munanilamula kwakukala, ninakuluphira kukala, afadzi andafufuka!’ ”

22Phapho Felisi, ariye yiye mwenye wakala unayimanya yo Njira ya Bwana, wagavunza gago malau, na achiaamba vivi, “Malau genu nindagalamula ukati mubomu wa shikari a viha Lusiya, achidza phapha.” 23Chisha, achimulagizira yiye mubomu wa shikari amuudze Pʼaulo ndani, ela akale tsare kulaa-laa konze ya yo jela vichache, na asenae atsʼizizwe kumupʼa gakwe arigo una haja nago.

Pʼaulo mbere za Felisi na Durusila

24Ziriphochira tsʼiku chʼachʼe, Felisi wauya jimula na muchewe Durusila, ariye wakala ni Muyahudi. Yiye wakudzamulagizira Pʼaulo achirehewa, na achidzamusirikisa unagomba dzulu ya kumukuluphira Kʼirisito Jeso. 25Ela ukati Pʼaulo ariphoanza kugomba dzulu ya kuhenda ga haki, dzulu ya mutʼu kudzidinisa atsʼihende dambi, na dzulu ya tsʼiku ya ulamuli, Felisi waphenywa ni woga hata achiamba vivi, “Vivi enda! Nindakwiha kahiri ukati nichipata nafasi.” 26Ukati uo, Felisi yiye waona Pʼaulo undamuhonga pʼesa. Gago ndigo gomuhenda hata achimwiha Pʼaulo mara kwa mara agombe naye.

27Yiye Felisi wakala unahenza aapendelee Ayahudi. Ndo ukatiwe wa kutawala uriphosira bada ya myaka miiri, wamuricha Pʼaulo ndani. Phapho nafasiye ya ugavuna yichihwalwa ni Pʼorikiyo Fesito.

Currently Selected:

Mahendo 24: CHIDUR

Highlight

Copy

Compare