Mahendo 17

Pʼaulo unasumurira neno ra Mulungu Tesalonike

1Pʼaulo na anzie aripholaa Filipi, áchira na midzi ya Amufipoli na Apolonia, achenda Tesalonike. Kuko, kwakala kuna sinagogi ra Ayahudi. 2Pʼaulo wakala una ada ya kukala, chila tsʼiku ya Sabato, niende sinagogini. Ndo ariphokala u ko Tesalonike, wakwenda sinagogini Sabato tʼahu mufululizo, na waasomera atʼu Maandiko na kuuzana-uzana nao dzulu ya gago. 3Na waambira na achiangʼazira lwazu kukala, yiye Kʼirisito wakala ni seti aturiswe, na afufuke kulaa kuzimu. Yiye waenderera kwaambira achiaamba, “Jeso niriye ninamusumurira udzumbe dzuluye, ndiye yiye Kʼirisito.” 4Anjine kati ya o Ayahudi ákuluphira maneno gogombwa ni Pʼaulo, na achigwirikana na yiye Pʼaulo na Sila. Na chisha, Ayunani anji okala anamwabudu Mulungu phamwenga na achetʼu anji okala anamanyikana muno, ágwirikana nao vivyo.

5Ela Ayahudi anjine achiphenywa ni chidzitso. Kwa vivyo, achiagwirira atʼu ai, ario kazi yao yakala ni kuzunguluka cheteni, na ao osini achanza muyuwano pho mudzini phosi. Chisha, achendavunza nyumba ya Jasoni, achikuluphira kukala, andaapata ano Pʼaulo na Sila mumo, kwa hata aalavye, aarehe kwa alamuli. 6Ela kʼaapatire, na kwa vivyo, achimukuruta Jasoni phamwenga na akuluphiri anjine hata ko kwa alamuli na kuno anapiga kʼululu kwamba, “O atʼu odziyuga dunia nzima, vivi a phapha phehu mudzini, 7na yuyu Jasoni waapiga karibu kwakwe nyumbani. Ao osi anahenda maneno garigo ga chinyume cha shariya za Kaisari, kwa kwamba hangwe, kuna mufalume munjine mwenye aihiwaye Jeso.” 8Abomu a mudzi na riro duu ra atʼu ariphosikira gago, áyugika muno. 9Achiahenda Jasoni na anzie alavye samanzi, ndipho achiaricha achenda vyao.

Pʼaulo unasumurira neno ra Mulungu Beroya

10Dzuwa ririphotoka, aratʼu akuluphiri áakalata Pʼaulo na Sila achenda mudzi wa Beroya. Na ariphokala a kuko, ákwenda sinagogini ra Ayahudi. 11Atʼu a kuko mwendo wao wakala ni udzo kuchira wa aratʼu a mudzi wa Tesalonike. Kwa vivyo, áuphokera na nyemi muno uratʼu udzumbe, na achikala chila tsʼiku anasomatʼo Maandiko kulola kumba ganagwa sawa na gogombwa ni Pʼaulo. 12Anji a Ayahudi ákuluphira, na chisha achetʼu a Chiyunani amanyikanao muno, phamwenga na alume a Chiyunani, achikuluphira vivyo nao. 13Ela Ayahudi a ko Tesalonike ariphomanya kukala, Pʼaulo wakala unasumurira neno ra Mulungu ko Beroya nako, ákwenda kuko, achendasunganya atʼu, na achikubitʼa muyuwano. 14Ndo aratʼu akuluphiri achimuphirika maruru Pʼaulo hata kʼanda-kʼanda ya bahari, ela Sila na Tʼimoti achisala ko Beroya. 15Aratʼu akuluphiri anjine omusisa Pʼaulo, ákwenda naye na meli hata mudzi ubomu wa Atene. Ariphokala anauya, achilagizwa ni yiye Pʼaulo kukala, adze aambire Sila na Tʼimoti amutuwe maruru viidimikikavyo.

Pʼaulo unagomba na achina Atene

16Pʼaulo ariphokala u Atene unatariza ano Sila na Tʼimoti, washononeka muno ariphoona mudzi uo una milungu minji ya vinyago. 17Kuko, yiye wakala achenda sinagogini kugomba na Ayahudi, na atʼu anjine okala anamwabudu Mulungu. Na chila tsʼiku wakala achigomba na atʼu okala achidza cheteni. 18Ela alimu okala anaihiwa a Epikuro na a Sitoiki achanza kugomberana na Pʼaulo. Anjine áuza achiamba, “Unaambadze yuno baye yetsʼimanya kugomba?” Na anjine achiamba, “Unaoneka unasumurira dzulu ya milungu miphya.” Maana, Pʼaulo wakala unasumurira Nguma Mbidzo dzulu ya Jeso, na dzulu ya ufufulo. 19Ndo ao ámuhwala Pʼaulo achimuphirika kwa ngambi yokala yichiihiwa Areopago, na achimwamba, “Hwambire, gano mafunzogo maphya godzikala unagasumurira ga dzulu yani? 20Maneno manjine godzigasikira unagasumurira, ni majeni kwehu. Kwa vivyo, hunahenza humanye, mafunzo gano maanaye nini?” 21Achina Atene osi, na anjine okala ni ajeni na ásagala kuko, kazi yao yakala ni kwambirana maneno majeni godzigasikira ukati wosi.

22Ndo Pʼaulo wazuka achiima mbere za yo ngambi ya Areopago na achiamba, “Mwimwi achina Atene ninamona munayogopha milungu yenu kwa chila njira. 23Maana, mimi niriphokala ninazunguluka kulola yo miyo yenu muyabuduyo, náona chijaja cha kumulavira Mulungu sadaka chidzandikwa, ‘Kwa mulungu yetsʼimanyikana.’ Ndo yuyu mumwabuduye na kʼamumumanya, ndiye niriye ninamusumurira dzuluye. 24#1 Afal 8:27; Isa 42:5; Mahe 7:48Mulungu yeumba urumwengu na vyosi virivyomo, ni Bwana wa mbingu na dunia, na kwa vivyo, yiye kʼakala mahekalu gojengwa ni atʼu. 25Na hebu kʼatakiya chochosi chotengezwa ni mikono ya adamu. Maana, yiye ndiye aahendaye atʼu osi akale moyo, na ndiye aapʼaye vitʼu vyosi. 26Mulungu waumba mutʼu mumwenga wa kwanza, na kulairirana na yiye, kuchipatikana atʼu a viryomo vyosi. Na Mulungu achiahenda asagale kutʼu mbalimbali phapha duniani phosi, mana, wakala upanga kamare ni rini, na ni lwaphi atʼu ao angesagala. 27Mulungu wahenda vivyo kwa hata atʼu amutsakule, na amone, hata viripho ni kuchirira kuphaphasa-phaphasa. Maana, Mulungu kʼa kure na chila mumwenga wehu. 28Yiye ndiye ahuhendaye hukale moyo, hudziidime na hukaleko. Gago ganagwa sawa na maneno gogombwa ni mangui genu manjine kukala, ‘Siswi naswi hu anae.’

29“Ndo kwahivira siswi hunga dza Mulungu, kʼahuhenzwa humone Mulungu unga dza utʼu utengezwao na dahabu, pʼesa hebu dziwe, utʼu utengezwao ni ulachu wa mutʼu. 30Mulungu pho pʼindi kʼaataririre madambi dza gago, kwakukala, atʼu ákala kʼaamanya. Ela vivi unaalagiza atʼu osi chila phatʼu atye. 31Ndo ni baha atʼu atye, mana, yiye waika tsʼiku kare yiriyo undaalamula atʼu osi duniani kwa haki, na kwa njira ya mutʼu mumwenga ariyemutsagula. Mulungu waafunulira atʼu osi neno riri, kwa kumufufula mutʼu yiye kulaa kuzimu.”

32Ariphomusikira Pʼaulo unagomba dzulu ya neno ra kufufuka kwa afadzi, anjine ao ákwatya kutseka chikumwifya. Ela anjine o achiamba, “Hundahenza udze uhwambire kahiri dzulu ya neno riri.” 33Chisha, Pʼaulo achiuka pho ngambini. 34Ela atʼu fulani ámutuwa, achikala akuluphiri. Kati yao wakala ni Diyonisiyo, mutʼu wa yo ngambi ya Areopago, mwanamuche mumwenga aihiwaye Damari, na hata anjine.

Currently Selected:

Mahendo 17: CHIDUR

Highlight

Copy

Compare