Mahendo 16

Tʼimoti unagwirikana na Pʼaulo na Sila

1Pʼaulo na Sila áenderera na charo hata achifika Deribe, na chidzako achenda Lusitira. Kuko, ákwendaonana na mutana mumwenga aihiwaye Tʼimoti, ariye wakala ni mwanafunzi wa Jeso. Ameye naye wakala ni mukuluphiri, na wakala ni Muyahudi, ela abaye wakala ni Muyunani. 2Tʼimoti wakala unalikwa ni o akuluphiri a Lusitira, na Ikoniyo. 3Pʼaulo wahenza kumutsukula Tʼimoti charo chicho. Kwa vivyo, wamuhwala achimubitʼatsʼi, na wamubitʼatsʼi Tʼimoti, mana, Ayahudi osi a pʼande zizo ákala anamanya kukala, abaye Tʼimoti wakala ni Muyunani, na Ayunani ákala kʼaabitwʼatsʼi. 4Ndo ao ákwenda mudzi hata mudzi, achiaambira akuluphiri malagizo gokala galaviwa ni ahumwa a Jeso na vilongozi a makanisa ko Jerusalemu, kwa agatuwe. 5Ndo akuluphiri ákaza kukomala chiroho, na isabu yao yichikala yinaonjezeka chila tsʼiku.

Pʼaulo unaona ono ko Tʼorowa

6Pʼaulo na anzie áchira na muphaka wa Furugiya na Galatiya, kwahivira ákala azizwa ni Roho wa Mulungu, atsʼisumurire udzumbe wa Mulungu ko jimbo ra Asiya. 7Ariphofika muphaka wa jimbo ra Musiya, áheza kuphenya jimbo ra Bitunia, ela Roho wa Jeso achiaziza. 8Ndo ao achichira na Musiya, achiteremuka hata mudzi wa Tʼorowa. 9Usiku uo, Pʼaulo waona ono, ambapho wamona mutumia mumwenga wa Makedonia wimire unamulombera unamwamba, “Vuka udze Makedonia udze uhwavize.” 10Pʼaulo ariphohwambira#16:10 Luka ariye ndiye mwandiki wa chitabu chichi, wagwirikana na Pʼaulo kwanzira phapha. udzona ono riro tu, hwadzibambanya kwenda Makedonia maruru, mana, hwamanya kukala, wakala ni Mulungu udzihwiha hukaasumurire Nguma Mbidzo atʼu a kuko.

Ludiya unaokoka

11Huripholaa mudzi wa Tʼorowa, hwakwenda na meli tititi hata chisiwa cha Samotirake, na kunadzachakwe huchitiya nanga mudzi wa Neapoli. 12Huripholaa phapho, hwakwenda hata Filipi, urio ni mudzi ubomu wa jimbo ra Makedonia, na wakala unatawalwa ni Arumi. Phapho huchisagala kwa tsʼiku fulani. 13Tsʼiku ya Sabato yiriphofika, hwalaa konze ya o mudzi, huchenda hata kʼanda-kʼanda ya muho, pharipho hwakala hunalolera kona phatʼu pha kuvoya. Ndo huchisagala, huchigomba na achetʼu okala arundikana phapho. 14Mumwenga wa o achetʼu okala anahusirikisa, wakala ni Ludiya. Ludiya wakala ni muchetʼu amwabuduye Mulungu. Kwao kwakala ni mudzi wa Tiyatira, na wakala ni muchuzi wa nguwo za kitani, za rangi ya zambarawe, zirizo zakala zi gali muno. Ndo phapho Bwana achivugula moyowe hata achigakubali maneno gogombwa ni Pʼaulo. 15Huriphomubatiza na atʼue, wahwamba, “Kwahivira mudzinona nidzimukuluphira Bwana, hindeni mukakale kwangu.” Na wahulombera hwende.

Pʼaulo na Sila anagwirwa

16Tsʼiku mwenga, hwakala hunenda phatʼu pha kuvoya, na huchonana na musichana mumwenga yekala ni mugulwa muhumiki, na wakala una pʼepʼo yekala unamuhenda aseme chimbere maneno gokala gandakudzalairira. Ndo yiye wakala unaapatira pʼesa nyinji matajirige kwa ko kusemakwe maneno chimbere. 17Ndo musichana yiye wahutuwa na kuno unagomba kwa laka ra dzulu kwamba, “Atʼu aa ni ahendikazi a Mulungu Ariye Dzulu kuchira osi, na anamusumurira vivyo arivyo Mulungu unaidima kumutivya.” 18Na waenderera kugomba kwa laka ra dzulu na kuno unaamba vivyo tsʼiku nyinji, hata tsʼiku mwenga Pʼaulo gachimusinya. Ndo achimugalukira, na achimwamba yiye pʼepʼo yekala udzimupagaa yiye musichana, “Ninakuchemera kwa dzina ra Jeso Kʼirisito, mulae musichana yuyu.” Ndo yiye pʼepʼo achilaa phapho kare.

19Matajiri ga yiye musichana gariphoona njira yao ya kupatira pʼesa kuchirira yiye musichana yitoswa, áagwira Pʼaulo na Sila, achiakuruta hata cheteni kwa alamuli. 20Ariphoafisa kwa o alamuli, áalumbira achiamba, “Atʼu aa ni Ayahudi, na anayuga mudzi wehu. 21Aa anafunza maada garigo tsʼi shariya kwa siswi Arumi kugakubali, hebu kugatuwa.” 22Duu ra atʼu richigwirikana na o atʼu okala anaalumbira Pʼaulo na Sila, na kwa vivyo, richiasunganira. Aratʼu alamuli achilagiza Pʼaulo na Sila avulwe nguwo, na achapwe vibokʼo. 23Ariphochapwa vibokʼo vinji, átiywa ndani, na yiye shikari wa jela achilagizirwa aamanyirire muno. 24Shikari wa jela ariphoambwa vivyo, waatiya chumba cha ndani kamare cha yo jela, na magulu gao achigafunga kati-kati ya magogo mairi.

25Kuriphofika phephi na usiku wa manane, Pʼaulo na Sila ákala anavoya na kwimba mira ga kumulika Mulungu, na o afungwa anjine ákala anaasirikisa. 26Ndo itsʼi yichisumba muno maruru hata yo misinzi ya jela yichitukuka. Ndo miyango ya jela yosini yichivuguka yenye phapho kare, na minyororo yokala yifungirwa ao afungwa osi yichivuguka nayo. 27Shikari wa jela aripholamuka na kona kukala, miyango yi wazi, waona dza kwamba afungwa osi ákala áchimbira. Kwa vivyo, achitsomola upangawe achikala unahenza adziulage. 28Ela Pʼaulo achimwiha kwa laka ra dzulu achimwamba, “Afungwa hosini hu phapha. Kwa vivyo, utsʼidziulage bule!”

29Shikari wa jela achilagizira aphirikirwe taa, na achikazira ko ndani, achendadzitsupha mbere za Pʼaulo na Sila na kuno unatetema kwa woga. 30Chidzako, achialavya cho chumba cha ndani, na achiauza vivi, “Atumia, nihendedze mino hata ndipho nitivywe?” 31O achimwamba, “Mukuluphire Bwana Jeso, nawe undativywa phamwenga na atʼuo osi.” 32Ndo Pʼaulo na Sila ámusumurira udzumbe dzulu ya Bwana yiye shikari wa jela phamwenga na atʼue. 33Chisha, yiye shikari waahwala achendaatsukutsa vironda vyao saa yiyo na usiku, na achibatizwa na atʼue osi phapho. 34Chidzako, achenda na Pʼaulo na Sila hata ko nyumbani kwakwe, na achiapʼa leu. Yiye na atʼue osi ákala anahamirwa, kwahivira ákala adzimukuluphira Mulungu.

35Chiramukoche, alamuli áahuma shikari ao, achenda ko jela kwendamuphirikira shikari wa jela udzumbe uu, “Avugule aratʼu atʼu ende vyao.” 36Ndo yiye shikari wa jela achimwamba Pʼaulo, “Alamuli alagiza muvugulwe. Kwa vivyo, munaidima kulaa mukenda vyenu na reri.” 37Ela Pʼaulo achiudzidza achiamba, “Hangwedze? Ao áhupiga vibokʼo jamani photsʼi malau gehu kugombwa, na siswi hata huna haki za Chirumi! Chisha, achihutiya ndani, ela vino anahenza ahulavye chisiri! Hʼa bee kʼaviidimikika kamare vivyo! Ao niadze ao enye, adze ahuvugulire.”

38Ao shikari achendaambira alamuli vyokala udzamba Pʼaulo, na ariphosikira kukala Pʼaulo na Sila ákala ana haki za Chirumi, áogopha muno. 39Kwa vivyo, ákwendaavoya aasamehe, na ariphoalavya jela, áavoya auke phapho mudzi uo. 40Pʼaulo na Sila aripholaa jela, ákwenda nyumbani kwa Ludiya. Kuko achendaonana na ndugu a chijeso, achiatiya moyo na achiuka.

Currently Selected:

Mahendo 16: CHIDUR

Highlight

Copy

Compare