Sirac 44
44
Ipinakita ha Kasaysayan an Gahom han Dyos
1Sanglit pagdayawa ta yana an dyosnon#44:1 Ha Hebreo, dyosnon; ha Griego, bantogan. nga mga tawo, an aton ginikanan han naglabay nga mga katulinan,
2mga tawo nga ginpasidunggan han Ginoo pinaagi hin dako nga dungog,
ngan hinkit-an dida ha ira an iya kagamhanan,
tikang pa ha tinikangan.
3May naghadi hin mga ginhadian,
ngan kinilala an iba tungod han ira kusog.
May mag-aram nga mga magsaragdon,
ngan nagyakan hin mga panagna an iba.
4May mga tawo ha pamunoan nga nagmando han mga tawo
pinaagi han ira mga sagdon,
mga punoan nga nagpagawas hin mga sugo,#44:4 Hiruhirani nga Hebreo, mga punoan…sugo; diri klaro ha Hebreo.
mga mag-aram nga naghihimangraw hin mga pulong nga puno hin kinaadman,#44:4 Ha Hebreo, mga mag-aram…kinaadman; diri klaro ha Hebreo.
ngan adton mga nagamit hin higlarom nga mga darahonon,#44:4 Ha Hebreo, ngan adton…darahonon; waray hini nga mga pulong ha Griego.
5mga parasiday, ngan parahimo hin musika,
6mga riko ngan gamhanan nga mga tawo nga nag-uokoy nga murayaw ha ira balay.
7Mga bantogan ini ngatanan ha ira kalugaringon nga panahon,
ngan ginpasidunggan han mga tawo han ira panahon.
8May-ada mga tawo nga nagbilin hin kabantogan,
ngan gindadayaw pa gihapon hin mga tawo ngada yana.
9May iba nga diri na hinunumdoman,
sugad hin waray hira mag-ukoy dinhe ha kalibutan,
nga namatay ngan hinngalimtan hira upod an ira mga anak nga nasunod ha ira.
10Kundi pagdadayawon ta ini nga dyosnon nga mga tawo,
kanay magtadong nga mga binuhatan,
diri gud hingangalimtan.
11Pagsusundon han ira mga tulin an ira kabantogan,
ngan amo ini an ira panurondon.#44:11 Diri klaro ha Griego an bersikulo 11.
12Nagpapadayon an ira mga tulin nin pagtuman han Ginsaaran
ngan dayuday magtutuman han ginbuhat han ira mga ginikanan.
13Magpapadayon gud an mga kaliwat han ira panimalay,
ngan diri gud mapapara an ira kabantogan.
14Iginlubong na an ira mga lawas,
kundi magpapadayon ha kagihapunan, an ira mga ngaran.
15Magsusumat an mga nasod hiunong han kinaadman hini nga mga tawo,
ngan pagdadayawon hira han mga tawo han Dyos.
Hi Enoc
16Nakalipay hi Enoc han Ginoo ngan ikinayab hiya ngadto ha langit. Nagin susbaranan hiya hin pagbasol para han ngatanan nga panahon nga tiarabot.
Hi Noe
17Matadong gud nga tawo hi Noe. Kahuman han kapuo han mga tawo pinaagi hin lunop, gintagan niya hin bag-o nga pagtikang#44:17 Ha Hebreo, gintagan niya…pagtikang; ha Griego, ginkuha nga liwan han tulin han mga tawo. an bug-os nga katawhan. Tungod ha iya may-ada mga tawo nga nanhibilin ha tuna han kahuman na han lunop. 18Naghimo an Ginoo hin dayon nga ginsaaran ha iya, ngan nagsaad nga diri na gud pagpupuohon an kinabuhi pinaagi hin lunop.
Hi Abraham
19Hi Abraham amo an gamhanan nga ginikanan hin damo nga mga nasod; waray gud iginsuson han iya dungog.#44:19 Ha Hebreo, waray gud…dungog; ha Griego, waray sugad ha iya ha dungog. 20Gintuman niya an Balaod han Gihahataasi ngan naghimo hin Ginsaaran ha iya, usa nga Ginsaaran nga igintigaman dida han iya lawas. Hinsabutan hiya nga matinumanon dida han pag-arihi ha iya. 21Sanglit ginsaaran hiya han Ginoo nga an iya mga tulin mahihimo nga kaupayan para han kalibutan, nga diri maiihap an ira kadamo, sugad han tapotapo han tuna; nga pagpapasidunggan hira labaw pa kay han iba nga mga tawo ha tuna; nga an kadagatan amo an pag-ultan han ira katunaan, tikang han Eufrates ngadto ha mga kataposan han tuna.
Hira Isaac ug Jacob
22-23Ginbag-o han Ginoo ito nga Ginsaaran kan Isaac ngan ginbag-o liwat kan Jacob, nga ginliwat pagbalik an saad nga mahihimo nga kaupayan an tulin ni Abraham para han ngatanan nga katawhan. Ginpatapod hi Jacob han Ginoo nga pagpapakaupayon hiya. Iya gintagan hi Jacob han tuna nga iya panurondon, nga ginbahinbahin ini ngadto hin 12 ka malon, usa ka malon para han tagsa nga iya mga anak.
Currently Selected:
Sirac 44: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984