Sirac 43
43
1Hin kamatahom han mapawa, mahawan nga langit ha igbaw naton!
Kamaanyag nga taran-awon hini!
2An adlaw ha iya pagsidlit nagsasangyaw ha iya pagsirang
an kamakaaramdok hini nga butang nga ginhimo han Gihahataasi.
3Ha udto ginpapamara niya an tuna;
waray nailob han iya maping-it nga kapaso.
4An natutunod nga adlaw nagsusurit han mga sampaw han kapungtoran,
sugad hin hudno nga metal nga nababangga tungod han kapaso.#43:4 Ha Hebreo, An natutunod…han kapaso; ha Griego, In usa nga parahudno nagbubuhat pinaagi hin nakakasunog nga kapaso, kundi ginsusunog han adlaw an kapungtoran hin tulo ka pilo nga kapaso.
Nag-iidlap ini hin nagkakalayo nga mga sulhog,
nga nakakabuta han mga mata tungod han kabislaw.
5Gamhanan an Ginoo nga naghimo hini;
ha iya pagsugo nagmamadali ini dida ha iya agianan.
6Aada liwat an bulan nga nagtitigaman han palakat han panahon,#43:6 Ha Hebreo, nga nagtitigaman…panahon; diri klaro ha Griego.
an tigaman nga waray kataposan han pagkabarobalyo han panahon.
7An bulan amo an tigaman han baraan nga mga adlaw,
an iya kapawa nabug-os ngan onina nagtitikasirom.
8An “bulan” ginngaranan alinsunod han bulan,
makaaramdok pagkit-on samtang nagtitikabug-os ini kada gab-i,
usa nga mapawa nga tigaman para han kasondalohan nga langitnon,
nga nagsiga didto ha atop han panganuron.
9Nakakapatahom han kagab-ihon an masanag nga mga bitoon ha langit,
maranggat nga mga sabong didto han kalangitan han Ginoo.
10Aadto ini han mga dapit nga igintudlok ha ira han Usa nga Baraan
ngan waray gud paghunong an iya dayon nga pagbantay.
11Tan-awa an balangaw ngan pagdayawa an iya Magburuhat!
Hin kamatarag-ob, hin kamaranggat an iya katahom!
12Sugad hin pana nga binabawog han mga kamot han Gihahataasi,
nalakbay ini han sidsid han langit dida hin malidong nga himaya.
13Nagsugo hiya ngan natikang pagkataktak an yelo,
nakikidlat hin pagtuman han iya paghukom.
14Binubuksan an mga hirimosan han langit
ngan nagkakagawas an mga dampog
sugad hin mga tamsi nga nagkakalupad.
15Pinaagi han iya gahom ginpupundok niya in dagko nga hugpong hin mga dampog,
ngan ginpupusak an bagtik nga uran ngan nahimo nga uranos hin mga burubuk-ol nga yelo.
16-17Nagyakan hiya, ngan ginlubag han dalugdog
an tuna tungod hin kasakit;
nabay-og an kabukiran tungod han iya kusog.#43:16 Ha Hebreo, tungod han iya kusog; ha Griego, kon napakita hiya.
Kon iya karuyag, nahangin an salatan,
naabot an mga buhawe ngan an mga bagyo tikang ha amihanan.
Napadara hiya han yelo nga nahugdon sugad hin mga tamsi,
sugad hin mga duron nga nahapon ha tuna.
18Napapausa kita han iya mabusag nga katahom,
ngan nasisindak kita hin pagkita nga nagkakaludlog ini.
19Ginbisibis niya ha tuna an bagtik nga tubig sugad hin asin,
ngan natig-a ini ngan nahihimo nga tunokon nga mga bukad nga yelo.#43:19 Ha Hebreo, mga bukad nga yelo; ha Griego, mga punta.
20Nasugo hiya nga humuyop an mahagkot nga hangin nga amihan
ngan nahihimo nga yelo an tubig;
nabagtik an ngatanan nga lanaw ug danaw
nga nagsusul-ot hin bado nga yelo.
21Ginsusuritan niya pinaagi hin huraw
an mga kagurangan han mga kapungtoran,
ngan nauuga an kabanwaan tungod han kamapaso;
22Kundi nabubuhi na liwat ini ngatanan
pinaagi hin usa nga dampogon nga burong,
samtang naghahadkot an panahon ngan napakita an tun-og.
23Pinaagi han iya kinaadman ginpahugpoy niya an kalawdan,
ngan iginbutang didto an mga puro.
24Nagsumat an mga parasakay ha kadagatan
hiunong han mga kataragman ha dagat,
ngan namamati kita han ira susumaton
ha dako nga paghipausa!
25May mga urosahon nga mga binuhat didto ha dagat,
mga dagko nga mananap ngan nagtanan nga mga buhi nga binuhat.
26Nagtutuman an tagsa nga sinugo han Ginoo han iya buruhaton,
diri nagbuburublag an ngatanan pinaagi han iya pulong.
27Diri gud naton matatapos an bisan ano nga aton masisiring,
kundi amo la ini an karuyag sidngon:
an Ginoo amo an kahingpitan han ngatanan nga mga butang.
28Uunanhon naton hin pakaagi han gahom hin pagdayaw ha iya?
Labaw gud hiya han ngatanan nga iya mga binuhat.
29Makatarag-ob an Ginoo dida han iya pagkagamhanan,
nakakaluob an iya gahom.
30Bisan kon buhaton mo an gimamaupayi
hin pagdayaw ha iya,
larolabaw pa gud hiya han imo igsusumat.
Bisan kon pasidunggan mo hiya hin waray paghunong,
ngan ha bug-os mo nga kusog,
diri ka gud gihapon makakagdayaw hin igo ha iya.
31Waray pa nakakita ha iya,
waray makakagsaysay ha iya;
waray makakagdayaw ha iya,
sugad han angay ha iya.
32Diri pa gud hinbabaroan
an mga urosahon nga larolabaw hini,
gutiay la an aton hinbabaroan han iya mga ginbuhat.
33Ginhimo han Ginoo an ngatanan nga mga butang,
ngan naghatag hiya hin kinaadman ngadto han mga dyosnon nga tawo.
Currently Selected:
Sirac 43: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984