Baruc 3
3
1“O Ginoo nga Labi Kamakagarahum, nga Dyos han Israel, tikang ha kahiladman han amon ginugul-an ngan kinakapoy nga mga kalag nagtatawag kami ha imo. 2Pamatii kami, O Ginoo, ngan kalooyi kami, kay nakasala kami ha imo. 3Naghahadi ka ha kadayonan, kundi mapatay kami ngan maaanaw kami ha kadayonan. 4O Ginoo nga Labi Kamakagarahum, nga dyos han Israel, pamatii an amon pag-ampo. Sugad la kami han mga minatay. Nakasala ha imo, an Ginoo nga ira Dyos, an amon kaapoy-apoyan. Dinmiri hira hin pagsugot ha imo, ngan nag-aantos kami han mga bunga han ira sala. 5Hingalimti gad an salaan nga mga butang nga ginbuhat han amon kaapoy-apoyan han una pa nga panahon; dida hin sugad hini nga panahon, hunahunaa na gad la an imo gahom ngan kadungganan, 6kay amo ka an Ginoo nga amon Dyos, ngan pagdadayawon ka namon. 7Itinugot mo nga mahadlok kami ha imo, basi magsingba kami ha imo. Didi hini nga tuna nga gindad-an ha amon hin kabihag pagdadayawon ka namon kay binmaya na kami han mga sala han amon kaapoy-apoyan. 8Imo kami ginpasarang dida han mga nasod, ngan tinugotan mo hira hin pagtamay ngan hin pagpakaraot ha amon. Imo kami ginkakastigo tungod han mga sala han amon kaapoy-apoyan han pagsupil nira ha imo, an Ginoo nga amon Dyos.”
Pagdayaw han Kinaadman
9Pamati, Israel, han mga sugo nga nagsasaad hin kinabuhi; pamati hin maupay ngan mamamay-ada ka kinaadman. 10Kay ano, Israel, nga aada ka man hin kaaway mo nga tuna? Kay ano nga nalagas ka man didto hin langyaw nga nasod? Diri ka malinis kon subayon an seremonyas, sugad ka han mga minatay. 11Gin-ihap ka na nga tampo han mga minatay. Kundi kay ano? 12Tungod kay imo ginbayaan an burabod han Kinaadman! 13Kon naglakat ka dida han mga dalan han Dyos, mag-uokoy ka unta dida han kalinaw ha kadayonan. 14Pag-admi kon hain hiaagii an pagsabot, kusog, ngan kamaaram. Niyan hibabaroan mo kon hain pangingitaa an hilawig ngan hura nga kinabuhi, an kapawa nga mag-uuna ha iyo, ngan an kalinaw.
15Waray pa gud tawo nga nakaagi han inuokyan han Kinaadman o nakasulod han iya balay hin mga bahandi, 16-17ngan adton mga nagpasipara, nawara hira: an mga punoan han mga nasod, an mga tawo nga nanganop hin ihalas nga kamanampan ngan katamsihan para hin pagliawlibang, adton mga nagtirok hin kadam-an nga manggad hin salapi ug bulawan, nga tinataporan han ngatanan ngan bubuhaton sugad han iya mahimo hin pag-angkon hini, 18ngan adton mga naguol ngan nagpinangusog hin pagtirok hin kwarta, kundi waray makabilin hin lutop han ira pagkabudlay. 19Nawara ini hira ngatanan ngan linmugsong ngadto han tuna han mga minatay. Inmabot in iba nga sinmaliwan ha ira. 20Natawo in usa nga orhe na nga tulin ngan nag-ukoy dinhe ha tuna, kundi pati hira waray gihapon makatultol han dalan ngadto han hibaro. Waray nira hiagii an dalan ngadto han Kinaadman o makaabot ha iya. 21Waray gihapon makahimo an ira mga anak. 22Waray hiagii han mga Canaanhon an Kinaadman. Waray ini hiagii han mga Edomitanhon 23bisan kon ira ginbiniling an hibaro. Waray gihapon hiagii an dalan ngadto han Kinaadman han mga magparatigayon han Meran ug Teman o hadton mga nag-asoy hin mga susumaton o hadton mga iba nga nagbiling basi hira makasabot.
24O Israel, hin pagkadako han bug-os nga kalibutan nga inuokyan han Dyos! Hin kahiluag han ngatanan nga iya gintag-iya! 25Waray ini katubtoban; waray gud paagi hin pagsukol han kahiluag ngan kahitaas hini. 26Dinhe han una nga mga panahon natawo in bantogan nga mga higante, gamhanan nga tulin nga batid ha pag-awayan. 27Kundi waray hira pilia han Dyos nga magin iya mga tawo o pakitaa han dalan han hibaro. 28Napuo hira kay waray nira pagsabot o kaaram.
29Waray pa gud tawo nga nakasaka ngadto ha langit hin pagkuha han Kinaadman ngan ilusad ini niya tikang han mga dampog. 30Waray pa tawo nga nagtabok han kadagatan hin pamiling han Kinaadman o hin pagpalit ha iya pinaagi hin mahal nga bulawan. 31Waray maaram kon uunanhon hin pagkadto ha iya o uunanhon hin pagbiling han dalan tipakadto ha iya.
32An Dyos amo la an maaram han Kinaadman, ngan maaram hiya han ngatanan nga mga butang. Hin-agian hiya pinaagi han iya pagsabot. Iya gintindog an tuna para han ngatanan nga panahon ngan ginpuno ini han magkalainlain nga kamanampan. 33Kinmurog ngan sinmugot an kapawa han iya pagtawag. Iya ginpadara ini ngan pinmakita. 34Iya gintawag an kabitun-an ngan binmaton hira dayon; nagpahimutang hira ha ira mga dapit ngan nagsiring nga malipayon ha paglipay hadton naghimo ha ira. 35Hiya amo an aton Dyos, ngan waray lain nga sugad ha iya. 36Iya hin-agian an bug-os nga dalan tipakadto han pagsabot ngan iya gintagan hin Kinaadman an iya surugoon nga Israel nga iya ginhigugma. 37Tikang hadto nga panahon pinmakita an Kinaadman dinhe ha tuna ngan nag-ukoy tampo ha aton.
Currently Selected:
Baruc 3: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984