Baruc 2
2
1“Sanglit gintuman han Ginoo an pagtarhog nga iya ginbuhat kontra ha amon ngan kontra han amon mga maghurukom, han amon kahadian, han amon mga punoan, ngan han mga tawo han Israel ug Juda. 2Waray pa gud ha bisan diin nga dapit han tuna mahinabo in sugad nga mga butang han nahinabo didto ha Jerusalem han pagtumana han Ginoo an mga panarhog nga nahisurat dida han Balaod ni Moises. 3Uraura gud hin karaot an amon kasugaran nga amon ngani ginkaon an unod han kalugaringon namon nga mga anak. 4Ginsarang han Ginoo an amon mga tawo, ngan igintubyan kami ngadto ha pagbuot han ngatanan nga kanasoran nga harani namon, ngan kinmita hira ha amon upod in pagtamay ngan kahadlok. 5Nakasala kami han Ginoo nga amon Dyos ngan dinmiri kami hin pagsugot ha iya. Sanglit napukan an amon nasod, nga unta kita an magdadaog.
6“Dayuday matadong an Ginoo nga amon Dyos, kundi mabug-at pa pagdad-on namon ngan han amon kaapoy-apoyan an amon kasalaan. 7Bisan kon ginkastigo na kami han Ginoo sumala han iya pagtarhog, 8waray la gihapon kami bumalik ha iya ngan mag-ampo nga babayaan na namon an amon magraot nga mga panhunahuna. 9-10Waray kami magsugot ha iya o mag-ukoy hin kinabuhi subay han iya matadong nga mga sugo, sanglit gindara nganhi ha amon han Ginoo an ngatanan nga mga kastigo nga iya gin-andam para ha amon.
Nag-ampo hin Katalwasan
11“Ikaw, O Ginoo, amo an Dyos han Israel nga nagdara han imo mga tawo tikang ha Ehipto pinaagi hin dako nga gahom ngan mga tigaman, mga milagro, ngan mga urosahon. Imo ginpakita an imo gamhanan nga kusog ngan naangkon mo in usa nga harangdon nga dungog, nga kinikilala pa yana nga adlaw. 12O Ginoo nga amon Dyos, nakasala kami; inmato kami ha imo; ginsupak namon an ngatanan mo nga mga sugo. 13Kundi ayaw na gad kami kasinahi. Didi hini nga mga nasod nga imo ginpasadngan ha amon, diri na damo ha amon an nahisalin. 14Pamatii gad an amon pag-ampo hin pakimalooy, O Ginoo, ngan talwasa kami tungod han kalugaringon mo nga dungog. Himoa gad nga malipay ha amon an mga nagbihag ha amon. 15Niyan mahibabaro an bug-os nga kalibutan nga ikaw amo an Ginoo nga amon Dyos ngan ginpili mo an nasod han Israel nga magin imo kalugaringon nga mga tawo.
16“O Ginoo, tamdi kami tikang ha langit ngan tan-awa an amon kakurian. Pamatii an amon pag-ampo. 17Pukrata an imo mga mata ngan siplat ha amon. Diri na makakaghalad hin mga pagdayaw ha imo o makakagsangyaw han pagkamatadong mo adton mga aadto han tuna han mga patay nga waray na ginhawa nga nahisalin ha ira mga lawas. 18An mga buhi la, O Ginoo, an makakahalad ha imo hin pagdayaw ngan magtutug-an han imo pagkamatadong, bisan kon uraura na an ira pag-antos, nga nag-angkon na ngan maluya, gutom ngan madaparap na an pagkita.
19“O Ginoo nga amon Dyos, nag-aampo kami ha imo hin pakimalooy, kundi diri tungod hin bisan ano nga mag-upay nga mga butang nga ginbuhat han amon kaapoy-apoyan ngan han amon kahadian. 20Imo ginpaumban ha amon an imo kasina ngan kapungot, sugad han imo igintarhog ha amon han paghimangraw ha amon han mga manaragna nga imo mga surugoon han ira pagsiring, 21‘Yukbo kamo ngan pag-alagad han hadi han Babilonia, ngan mahihimo nga nagpabilin kamo didto han tuna nga akon iginhatag han iyo kaapoy-apoyan. 22Kundi kon dumiri kamo hin pagsugot han akon sugo hin pag-alagad ha iya, 23tataposon ko an tagsa nga tunog hin kalipay ngan pagsaurog didto han mga bungto han Juda ngan didto ha Jerusalem. Diri na hibabatian bisan pa an malipayon nga mga tunog hin mga kombite hin pagkasal. Magmamamingaw ngan diri na pag-uokyan an bug-os nga tuna.’
24“Kundi waray kami magsugot han imo sugo hin pag-alagad han hadi han Babilonia, sanglit gintuman mo an tarhog nga imo ginhimo han imo paghimangraw pinaagi han mga manaragna nga imo mga surugoon, han imo pagsiring nga pagkukuhaon tikang han ira mga lubnganan an mga tul-an han amon kahadian ngan han amon kaapoy-apoyan ngan imo igpapasarang. 25Ngan yana iini igingawas hira nga pinapasoan han sirak han adlaw ngan hinahagkotan han tun-og han gab-i. Nagkamatay hira nga nag-antos hin gutom, araway, ug sakit. 26Ngan tungod han sala han mga tawo han Israel ug Juda, imo ginruba an kalugaringon mo nga Templo, nga ruba pa ngani tubtob yana nga adlaw.
27“Kundi, Ginoo, mailubon ka ha amon ngan nagpakita ka ha amon hin dako nga kalooy, 28sumala han imo iginsaad pinaagi kan Moises nga imo surugoon han pagsugoa mo ha iya hin pagsurat han imo Balaod ha atubangan han mga Israelita. 29Nagsiring ka, ‘Kon diri kamo magsugot ha akon, magtitikainos kamo ngan pipira la ha iyo in masasalin didto han mga nasod nga akon pagpapasarangan ha iyo. 30Maaram ako nga diri kamo magsusugot ha akon, kay mga tawo kamo nga magtig-a an mga ulo. Kundi kon halinon kamo nga bihag ngadto hin iba nga tuna, makakapanmuhaypuhay kamo ngan makakapanmurubuot. 31Niyan makakasabot kamo nga ako amo an Ginoo nga iyo Dyos, ngan tatagan ko kamo hin usa nga ungara hin paghibaro ngan usa nga hunahuna nga makakasabot. 32Didto han tuna nga hahalinan ha iyo pagdadayawon ako niyo ngan mahinunumdom kamo ha akon. 33Diri na magmamatig-a hin duro an iyo mga ulo ngan diri na kamo magmamaraot, kay mahinunumdom kamo han nahinabo han iyo kaapoy-apoyan han pakasala nira han Ginoo. 34Niyan igbabalik ko kamo ngadto han tuna nga akon iginsumpa hin paghatag han iyo kaapoy-apoyan, kan Abraham, Isaac, ug Jacob, ngan ihahatag ko liwat ini ha iyo. Padadamoon ko an iyo mga tawo, ngan diri na gud kaiibanan an iyo kadamo. 35Maghihimo ako hin dayon nga ginsaaran ha iyo; Dyos ako niyo ngan kamo akon mga tawo. Diri ko na paiiwason kamo nga mga tawo han Israel tikang han tuna nga akon iginhatag ha iyo.’
Currently Selected:
Baruc 2: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984