Забур 47
47
Сигьан – Аллагьдин шегьер я
1Къарагьан миресрин мани.
2ЧӀехи я Ребби
чи Аллагьдин шегьерда,
Адан пак Дагъдал
лайих я Ам гьар жуьредин тарифдиз.
3Кьакьан я ам, иер я –
вири чилин хвешивал тир Сигьан дагъ,
шегьер чӀехи Пачагьдин,
гуьрчег я ам кеферпатан къерехра.
4Къелейра адан
Аллагь сейли я далда хьиз.
5КӀватӀ хьана пачагьар,
санал фена дяведиз,
6амма къах хьана, Ярусалим акурла,
велвела акатна, катна кьулухъ.
7Ана зурзун акатна абурук,
азият хьана аял хазвай папаз кьван.
8Вуна абур барбатӀна,
рагъ экъечӀдай патан гару
кукӀвардайвал гьуьлераллай гимияр Таршишдин.
9Чаз вуч ван хьанатӀа,
гьам акунни авуна
Къуватрин Реббидин шегьерда,
шегьерда чи Аллагьдин;
Аллагьди хуьзва ам
чукӀур тавуна, даим яз.
Макьамдин ара
10Аллагь! Чна Ви Ибадатханада
Ви регьимдикай фикир авуна.
11Аллагь, гьикӀ Ви тӀвар
чилин пипӀерив агакьзаватӀа,
гьакӀ агакьзава тарифни Ви.
АцӀанва Ви эрчӀи гъил гьахъунив.
12Сигьан дагъдал шадвал ийизва,
хвешивалзава Ягьудатдин хуьрери
Ви гьахъ дувандал.
13Чарх ягъ Сигьан дагъдал, элкъуьгъ адал,
гьисаба адан минараяр,
14фикир це адан кӀелейриз,
килиг адан имаратдиз,
къведай несилдиз авун патал ихтилат.
15Куьз лагьайтӀа и Аллагь
чи Аллагь я датӀана;
Адакай чаз регьбер жеда асирра.
Currently Selected:
Забур 47: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
