Забур 48
48
Пулунихъ далу акалун кӀамашвал я
1Манидаррин чӀехидаз. Къарагьан миресрин мани.
2Яб це идаз, вири халкьар,
яб акала, чилел уьмуьр тухузвай вирибур,
3адетдинбур, эсил-несил авайбур,
девлет авайбур, кесиббур.
4Зи сивяй акъатзава камалдин гафар,
зи рикӀин хиялри акьаз тада гъавурда.
5Яб акалда за келимадихъ дерин тир,
кинур ягъиз, жуван мискӀал ахъайда:
6куькай кичӀе хьурай заз чӀулав йикъара,
зал пис тапархъанар алтӀуш хьанвайла? –
7чпин хазинайрик умуд кутунвайбурукай,
чпин чӀехи девлетдалди дамах ийизвайбурукай?
8Ришвет гана садалайни стха къахчуз алакьдач,
я тахьайтӀа адан уьмуьрдихъ гьакъи гуз
жедач Аллагьдиз:
9уьмуьрдихъ гудай къимет чӀехиди я,
ахьтин къимет авайди туш,
10ам амукьдани уьмуьр тухуз датӀана?
Сур такуна амукьдани?
11Ваъ, гьар садаз аквазва:
камал авайбур рекьизва,
рекьизва санал ахмакьни авам,
масадбуруз туна чпин девлетар.
12Сурарикай абурун
кӀвал жеда абуруз асиррилай асирра,
несилрилай несилралди уьмуьр тухудай чка жеда
чпин гьуьрметдай чилериз чпин тӀварарни
гайивиляй абуру.
13Инсан амукьдач гьуьрметда,
ам ухшар я телеф жедай гьайвандиз.
14Гьахьтинди я кьадар-кьисмет жувак умуд кутазвайдан,
гуьгъуьналлаз абурун крар вири
дуьз яз гьисабзавайбурун
пайни гьа гьам я.
Макьамдин ара
15Хпер хьиз, абур гьазурнава агъа дуьньядиз,
чубанвалда абуруз ажалди.
Экуьнахъ абурал агъавалда михьибуру,
абурун къуватар цӀрада,
сурукай абуруз кӀвал жеда.
16Амма зун Аллагьди
агъа дуьньядин гьукумдикай хкудда,
зун Вичин патав кьабулда Ада.
Макьамдин ара
17КичӀе жемир, инсандиз девлет жедайла,
адан кӀвале берекат бул жедайла.
18Рекьидайла, ада затӀни вичихъ галаз тухудач,
адан девлет фидач адан гуьгъуьнаваз.
19Ада вич уьмуьрда бахт авайди яз гьисабрай –
агалкьунар авайбурун тарифарда инсанри, –
20садрани мад экв тахквадай
вичин бубайрин килфетдихъ ам агалтда.
21Гьуьрмет авай, амма камал авачир инсан
ухшар я телеф жедай гьайвандиз.
Currently Selected:
Забур 48: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
