ФилипӀвийриз 1

Саламар

1 Иса Месигьдин лукӀар тир Павеланни ТӀиматӀеян патай.

ФилипӀра авай, чеб Иса Месигьдиз талукь вирибуруз, абурун чӀехибур ва шемасарни кваз.

2Аллагьдин, чи Бубадин ва Ребби Иса Месигьдин патай берекат ва саламатвал хьурай квез.

Аллагьдиз шукур авун ва дуьа авун

3-4Куьн рикӀел алаз ийизвай гьар са дуьада за датӀана куь виридан гьакъиндай зи Аллагьдиз шукурзава. За и дуьаяр шадвилелди ийизва, 5вучиз лагьайтӀа куьне сифте йикъалай къедалди, Шад Хабардикай муштулухар гуз, захъ галаз и кӀвалахда иштиракзава. 6Куь арада и хъсан кардик кьил кутур Аллагьди а кар Иса Месигь хкведай югъ алукьдалди эхирдал кьван ийидайдахъ зун агъунва.

7Квекай икӀ фикирун заз кутугнава, вучиз лагьайтӀа куьн зи рикӀе ава. Зун исятда бухавра авайла, гьакӀни за Шад Хабар хуьдайла ва тестикьардайла, куьнени вирида захъ галаз Аллагьдин берекат пайзава. 8Зун Иса Месигьдин муьгьуьббатдалди квехъ виридахъ цӀигел я. И кардин шагьид Аллагь я.

9Куь муьгьуьббат мад ва мад чӀехи хьун патал ва нетижада чирвилерив ацӀун патални фагьумдин жигьетдай дерин хьун патал за дуьа ийизва. 10Гьа чӀавуз куьн паталди вуч хъсан ятӀа куьне тайинарда, Месигь хкведай юкъуз куьн михьи ва рехне квачиз жеда, 11куьне гьахъ-михьивилин майва гъида. А майва, Аллагьдал баркалла гъун ва Адан тарифун паталди, Иса Месигьдин куьмекдалди гъидайди я.

Зун паталди Месигь уьмуьр я

12Заз квез чир хьана кӀанзава хьи, стхаяр-вахар, зи кьилел атай кьван вири крари Шад Хабардикай муштулухар гунин карда агалкьунарни хьуниз куьмекна. 13Гила пачагьдин вири къаравулриз ва амай вирибуруз зун Иса Месигь патал къазаматда авайди чизва. 14Зун къазаматда тун себеб яз, гзаф стхаяр-вахар Реббидихъ ийизвай имандал кӀеви хьанва ва абуру мадни викӀегьдиз ва кичӀе тушиз Аллагьдин Гафуникай хабар гузва.

15Бязибуру пехилвиляйни бягьс чӀугун паталай Месигьдикай хабар гузва лагьай чӀал дугъри я. Амма муькуьбуру хъсан ниятар аваз хабар гузва. 16Михьи ниятар авайбуру, зун Шад Хабар хуьн патал ина тунвайди кьатӀуз, муьгьуьббатдал амал ийизва. 17Гьа са чӀавуз чӀуру ниятар авайбуру Месигьдикай, са чпин менфят кӀанз, рикӀ гвачиз, заз ина, къазаматда, мадни гзаф четинвилер хьунин мурад аваз, хабар гузва. 18Мад вучда кьван? Абурухъ тапан ва я дуьз ниятар аватӀани, кьилинди ам я хьи, абуру Месигь машгьурзава, ва зун и кардал шад я.

За зи шадвал атӀудач. 19Вучиз лагьайтӀа, заз чизва хьи, икӀ авуни куь дуьаяр себеб яз ва Иса Месигьдин Руьгьдин куьмекдалди зун азад хъувуниз рехъ гуда. 20За вилив хуьзва ва кӀевелай умудзава хьи, зун са куьникайни жуваз регъуь жедай гьалдиз къведач. Амма, датӀана хьиз, гилани зун, Месигь зи беденда машгьур хьун патал, кӀевиз акъвазда ва викӀегь жеда. И кар зи уьмуьрдин ва я ажалдин куьмекдалди – гьикӀ хьайитӀани – заз сад я. 21Вучиз лагьайтӀа, зун паталди уьмуьр – им Месигь я, ажални – хийир я. 22Заз жувал чан аламукьна кӀанзаватӀа, им зун паталди майваяр галай кӀвалах жеда лагьай чӀал я. Гьа икӀ, вуч хкядатӀа, заз чизвач. 23Зун кьве ниятдин арада кьве рикӀин жезва: заз и уьмуьрдай хъфиз ва Месигьдихъ галаз санал жез кӀанзава, гьа им, лагьайтӀа, виридалайни хъсан я. 24Амма зал чан аламукьун квез гзаф герек я. 25-26Зун и кардин чӀалахъ я. Гьавиляй заз чизва хьи, куь шадвал имандалди артух хьун патал ва куьн иманда мадни вилик фин патал, ва зун мад квехъ галаз жедай чӀавуз квехъ, Иса Месигьди зи куьмекдалди авур крарал дамахардай багьнаяр гзаф хьун патал, за уьмуьр тухуда ва квехъ галаз амукьда.

27Вуч хьайитӀани, Иса Месигьдин Шад Хабардиз лайих яз уьмуьр твах. Зун атайла, куьн акуртӀани ва я зав квекай анжах ванер агакьайтӀани, заз чир жеда хьи, куьне ян гузвач ва куьне садвиле аваз уьмуьр тухузва, куьн къуьн къуьне туна Шад Хабардал бине кьунвай имандал кӀевиз акъвазнава, 28ва квез душманрикай кичӀе туш. Ида а кардикай лугьузва хьи, абур телеф жеда, амма куьн хилас жеда – им Аллагьдилай къведай кар я. 29Квез Иса Месигь себеб яз ганвай гьуьрмет хьиз неинки Месигьдихъ иман авун, гьакӀни Адан паталай азабар чӀугун гана. 30Зал виликдай ацалтай хьтин ва, квез чизвайвал, за исятда эхзавай хьтин гьа са четинвилер квелни гьалтзава.

Currently Selected:

ФилипӀвийриз 1: ЛезПК

Highlight

Copy