ФилипӀвийриз 2

Месигьдин умунвилелай чешне къачун

1Гьа икӀ, Месигьдихъ галаз сад хьуни куьн кӀубан ийизва. Адан муьгьуьббатди квез теселли гузва. Куьн Руьгьдин куьмекдалди садвиле ава ва квехъ регьим ва чарадан рикӀикай хабар кьадай гьисс ава. 2Зи шадвал генани ацӀайди хъия: куь фикиррин садвал хуьх, квехъ гьа сад хьтин муьгьуьббат хьурай, куьне руьгьдин жигьетдай садвал къалура, куьн сад хьтин фикиррал алайбур хьухь. 3Са жуван менфят кӀан хьунин ва я кьуру дамахар авунин ниятар аваз са карни ийимир. Абу́р хуьх ва масадбур жувалай вине яхъ. 4Са жуваз авай хийирдал ваъ, гьакӀни муькуьбуруз авай хийирдални амал ая.

5Куь фикирар Иса Месигьдин фикирар хьтинбур хьана кӀанда.

6 Аллагьдихъ хьтин тӀебиат аваз,

гьикӀ хьайитӀани алахънач Ам

барабарвал хуьз Аллагьдихъ галаз,

7 аксина, Вичин агъуззавай тӀул,

лукӀран тӀебиат авуна кьабул;

адакай инсанриз ухшарди хьана,

акунрай инсан хьтинди хьана.

8 Ада умун авуна Вич,

рекьидалди муьтӀуьгъ хьана, амма яз Ам

муьтӀуьгъ хьана ажалдиз хашунал!

9 Гьавиляй Ам Аллагьди хкажна,

Адаз вири тӀварарилай вине авай ТӀвар гана,

10 цаварални, чилерални, чилин кӀаникни

Иса Месигьдин ТӀварцӀин вилик

метӀерал вири акъвазун патал,

11 Аллагь Бубадин гьуьрметдай

гьар са чӀала кьабулун патал

Иса Месигь Ребби тирди!

МичӀивилин алемда гъетери хьиз нур це

12Гьа икӀ, зи кӀанибур, куьн датӀана чӀалаз килигдайбур тир, неинки зун куь патав гвай чӀавуз, гьакӀ исятдани, зун авачирлани, куьн гьадалайни гзаф чӀалаз килигзава. КичӀевиливди ва рикӀик зурзун кваз куьн хилас хьун куьне куьн тухузвай къайдадалди къалуриз хьухь, 13гьар гьикӀ ятӀани Аллагьди Вичи куь къене кӀвалах тухузва, квек Вичин къастунив кьурвал гьевесни, гьерекатни кутазва.

14-15ЧӀуру ва рекьяй акъатнавай несилдин арада квекай рехне квачирбур ва леке алачирбур, Аллагьдин михьи аялар хьун патал, вири крар шикаятар ва гьуьжетар галачиз ая. Куьне абурун арада, цавара гъетери хьиз, нур гузва. 16Куьн уьмуьрдин гаф кьуна хьухь. За и кардал Месигь хкведай юкъуз, за жуван ката-галтуг чӀагьнакьа#2:16 ЧӀагьнакьа – нетижа галачиз. авунач лугьуз ва чӀагьнакьа зегьмет чӀугунач лугьуз, дамах ийидайвал ая. 17Куьне Аллагьдиз гьакъикъидаказ ийизвай къуллугъдиз – къурбанддиз тамамвал гуз алахьдай чехир хьиз зун хьайитӀани, зун шад я, зани квехъ галаз санал шадвал ийизва. 18Куьнни шад хьухь ва захъ галаз шадвал ва хвешивал ая.

ТӀиматӀей ва ЭпафрадитӀ

19ТӀиматӀея квекай хкидай хабарри зун кӀубан авун патал, Ребби Исади заз куь патав мукьвара ам ракъуриз хьунин умуд ганва. 20Захъ галаз са фикиррал алай ТӀиматӀей хьтин, куь паталай ихьтин жавабдарвал гьиссдай маса кас захъ авач. 21Амайбур гьар сад Иса Месигьдиз кӀанзавайдан ваъ, жуван хийирдин къайгъуда ава. 22Амма ТӀиматӀея вичин алакьунар карда къалурайди, ада захъ галаз санал, хци бубадихъ галаз хьиз, Шад Хабардикай муштулух гайиди квез чизва. 23Гьавиляй, инлай кьулухъ захъ вуч жедатӀа чир хьунни кумаз, за ам куь патав ракъурда лагьана умуд ийизва. 24Реббиди зун жувни мукьвара куь патав акъатунин чӀалахъарзава.

25Мадни лагьайтӀа, зи стха, захъ галаз са кар ийизвайди ва амадаг, куьне ракъурнавайди ва зи къайгъуйра заз къуллугъайди тир ЭпафрадитӀ куь патав элкъвена рахкур хъувун за лазим яз гьисабзава. 26Адан вил квехъ гзаф хьанва. Квев адан азардикай ванер агакьуни ам гъарикӀ ийизва. 27Эхь, ам лап рикӀивай азарди кьунвай, саки рекьидай чкадал атанвай, амма Аллагьди адаз регьим авуна, неинки са гьадаз, зи пашманвилел пашманвал алава тахъвун патал, зазни регьим авуна. 28Гьавиляй, куьн ам акуна шад хьун патал ва зи пашманвални тӀимил хьун патал, за ам куь патав мадни чӀехи хушуналди ракъурзава. 29Ам Реббиди ганвай стха яз чӀехи шадвилелди кьабула ва ам хьтин инсанриз гьуьрмет ая. 30ГьикӀ лагьайтӀа Месигь патал кӀвалахдайла, ам саки кьена. Заз квевай гуз тахьай куьмек гун патал, ада вичин уьмуьр кьиникьин хатадик кутуна эхир.

Currently Selected:

ФилипӀвийриз 2: ЛезПК

Highlight

Copy