Хьунухь 50
50
1Юсуф бубадин бедендал гьалтна, шехьиз кьейидан чиниз теменар гана. 2-3Вичин лукӀар тир жерягьрал ада Исраилан беден мелгьамра тун тапшурна. Жерягьри, адет тирвал, беден яхцӀур юкъуз мелгьамра туна ва пудкъанни цӀуд юкъуз мисривияр кьейидахъ шехьна. 4Ясдин вахт куьтягь хьайила, Юсуфа фиръавандин мукьва авунвай ксаривай тӀалабна: «Куь вилерай заз майил аватӀа, фиръавандиз лагь хьи, 5бубади зав кьин кьаз тунай: кьейила, за ам Къенанда авай, ада вичиз виликамаз гьазурнавай сурарин кьветӀе кучукун лазим я. Вун рази ятӀа, за фена буба кучукдай ихтияр къачузва, ахпа элкъвена хкведа». 6«Алад, фена буба кучук, – ихтияр гана фиръаванди. – Кьин кьилиз акъуд».
7Юсуф буба кучукун патал рекье гьатна, ва адахъ галаз чпихъ асул-несил авай фиръавандин мукьуванар, вири чӀехи къуллугъдарар ва Мисридин вири чилерин агъсакъалар, 8Юсуфан вичин хизан, адан вири стхаяр ва адан вири сихилни рекьиз экъечӀна. Гешенда амайбур анжах абурун аяларни лапагарни къарамалар тир. 9Адахъ кьве чарх квай дапурагар, гзаф кьадар миях аскерар ва сан авачир кьван халкь галай.
10Ярдандилай анихъ галай Гарен-АтӀаддив агакьайла, абуру ана са йикь-шиван авуна – ирид юкъуз абур Юсуфан бубадихъ шехьна. 11А чилерал уьмуьр тухузвай къенанвийри Гарен-АтӀадда чӀугвазвай яс акурла, гьарайдалди лагьанай: «Мисривияр гьикьван дерт чӀугваз шехьзава!»
Гьавиляй Ярдандилай анихъ галай и чкадиз Абел-Мисрини#50:11 Абел-Мисрини – чувуд чӀалалди «Мисридин шел». лугьузва.
12Бубади гьикӀ лагьанайтӀа, рухьвайри гьакӀ авуна: 13адан мейит Къенандиз хкана ва Ибрагьима хети Эфранавай сурар патал къачур Махпелан чуьлдал алай кьветӀе кучукна – Мамредикай са акьван яргъал тушиз. 14Мейит кучукайдалай кьулухъ Юсуф, адан стхаяр ва вири абурухъ галайбур элкъвена Мисридиз хтана.
Инсанди фикирда, амма Аллагьдин гъиле жеда
15Гила, буба кьейидалай кьулухъ, Юсуфан стхайри фикир ийиз хьана: «Юсуфаз исятдани чакай хъел аматӀа, ва чна вичиз авур азиятриз жаваб яз, эвездай са кар хъийиз кӀан хьайитӀа вуч ийин?» 16Абуруни Юсуфав ихьтин гафар агакьарун тапшурна: «Рекьидалди вилик ви бубади 17ваз лугьун патал веси авуна: „Тавакъу ийизва – вуна стхайрин гунагьдилай, абурун батӀулвилелай, абуру ваз авур чӀурувилелай гъил къахчу“. ГьакӀ хьайила, чалай гъил къахчу, чун ви бубадин Аллагьдин лукӀар я эхир!» И гафариз яб гудайла, Юсуф шехьнай.
18Стхаяр атана адан вилик чилел метӀерал аватна ва лагьана: «Къедлай чун ви лукӀар я!» 19«КичӀе жемир, – лагьана Юсуфа. – Зун Аллагь яни кьван? 20Куьне заз пис къаст авун кьетӀ авунай, амма Аллагьди ам хъсанвилиз элкъуьрнай: а кар себеб яз гьикьван инсанар хилас хьана! 21КичӀе жемир. За куь ва куь веледрин къайгъударвал ийида».
И гафари стхаяр секинарнай ва абурун рикӀериз таъсир авунай.
Юсуфан кьиникь
22Гьа икӀ Юсуф вичин сихилни галаз Мисрида бине кутуна ацукьнай. Адан вишни цӀуд йис хьана; 23адаз вичин штулар, Ифраиман птулар, акун ва Манашедин хва Магьиран цӀийиз хьайи аялар вичин метӀерал кьун кьисмет хьана.
24«Зун и мукьвара рекьида, – лагьана Юсуфа мукьва-кьилийриз. – Амма са югъ алукьда ва Аллагьди куьн рикӀел гъида ва куьн инай Ада Ибрагьимаз, Исакьаз ва Якьубаз гуда лагьана кьин кьунвай чилерал хутахда».
25Юсуфа Исраилан несилрив кьин кьаз туна: Аллагьди чеб рикӀел гъайи чӀавуз абуру Мисридай адан мейитдин амукьаярни чпихъ галаз хутахда.
26Юсуф вишни цӀуд йиса аваз кьена. Адан мейит мелгьамра туна, Мисрида, мейит твадай ишикӀда эцигна.
Currently Selected:
Хьунухь 50: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
