ЭхкъечӀун 1
1
Исраил Мисридикай азад хьун
(1:1–15:21)
Исраил Мисрида чандал гъун
1Ингье Якьубахъ галаз санал чпин хизанарни галаз Мисридиз атай адан рухвайрин тӀварар (абурукай гьар сад вичин хизанни галаз атанай): 2Рувен, Шимун, Леви, Ягьуд, 3Исахар, Забулун, Бунъямин, 4Дан, Нифтали, Гад ва Ашер.
5Вири абур, Якьубан несилар – вичи а чӀавалди гьеле Мисрида уьмуьр тухузвай Юсуфни кваз, пудкъанни цӀуд кас авай.
6Юсуф кьенай, адан стхаярни ва абурун вири несилни кьенай. 7Исраилан эвледар лагьайтӀа, аладун-веледун гзаф тир, абурун кьадар датӀана артух жезвай, къвердавай абурун къудрат гзаф жезвай; са тӀимил вахтунда абурувди вири уьлкве ацӀанай.
8Мисридин тахтунал, вичиз Юсуфакай са затӀни чин тийидай, цӀийи пачагь хкаж хьанай. 9Ада вичин итимриз лагьана: «Килиг садра Исраилдин халкьдин кьадар гьикьван гзаф хьанватӀа: абурухъ чалай гзаф къуват ава. 10Абур мадни артух тахьун патал са вуч ятӀани кьетӀна кӀанда. ТахьайтӀа, дяве гатӀунайтӀа, абур чи душманрихъ галаз сад хьана, чаз аксина къарагъда ва чи гъиликай хкечӀда».
11Исраилдин рухваяр залан кӀвалахривди гьелек авун патал мисривийри абурун кьилел къаравулар эцигна ва фиръаван патал чпихъ гьамбарханаяр галай кьве шегьер эцигиз туна – Питам ва Рамсес. 12Амма мисривийри Исраилдин рухваяр гьикьван гзаф азиятдик кутунатӀани, гьакьван абурун кьадар гзаф жезвай. Мисривийриз абур авайдалайни гзаф жез кичӀе хьана 13ва, са жизвини инсаф тийиз, абур кӀвалах авуниз мажбур ийизвай. 14Абуру Исраилдин рухвайрин вири уьмуьр зиллетдиз ва залан зегьметдиз элкъуьрна: абуру палчух тӀушунзавай, кьарунчӀар атӀузвай, чуьлда кӀвалахзавай. Абурув и кӀвалахар гьич са жизвини язух татана, гужуналди ийиз тазвай.
15Мисридин пачагьди Исраилдин кьилинбур тир мамач-папариз вичин патав эверна. Садан тӀвар Шифра, муькуьдан Пуа тир.
16«Иври папаривай аялар кьабулдай чӀавуз, – лагьана ада ибуруз, – вуж хазватӀа килиг. Гада яз хьайитӀа – йикь, руш яз хьайитӀа – чан алаз амукьрай».
17Амма мамач-папариз Аллагьдихъай кичӀе тир ва гьавиляй Мисридин пачагьдин эмирдиз яб ганачир: гадаяр сагъ-саламатдиз тазвай.
18Пачагьди абуруз мад вичин кьилив эверна ва жузуна: «Куьне гадаяр вучиз рекьин тавуна тазва?» 19«Иври папар мисривияр хьтинбур туш, – жаваб гана мамачри, – абур гзаф уьтквембур я. Мамач-паб гьич атана агакьни тавунмаз, чувуд папари хана жеда». 20И кардай Аллагьди мамач-папарив хийирдалди агакьарна. Исраилдин халкь лагьайтӀа, къвердавай гзаф ва адан къуват артух жезвай. 21Мамач-папариз Аллагьдихъай кичӀе тирвиляй, Аллагьди абурун хизанриз хушбахтвилин рехъ ахъайнай.
22ИкӀ хьайила, фиръаванди вичин халкьдиз ихьтин эмир гана: «Чувудриз жезвай вири гадаяр Нил вацӀуз гадара. Чан алаз анжах рушар тур».
Currently Selected:
ЭхкъечӀун 1: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
