Хьунухь 49
49
Якьуба вичин рухвайриз хийир-дуьа авун
1Якьуба вичин рухвайриз эверна:
– КӀватӀ хьухь: за куьн гележегда куь гуьзетдатӀа хабардар ийида.
2КӀватӀ хьана яб це Якьубан рухваяр,
Исраилаз яб це, куь бубадиз!
3Рувен, зи сифтеди, зи къудрат,
Зи итимвилин къуватдин сифте майва,
Ам кьакьан я виридалай – ичӀи къуват!
4Вилик пад кьаз тежедай ятар хьтин,
хъижедач вун мад сифтеди,
къаткана кьван бубадин месел –
зи месиз кӀур гана, мурдар авуна!
5Шимунни Леви, стхаяр,
чпин кантӀар инсаф тийирвилин яракь тир!
6За абурун къастара иштирак ийизвач,
кӀеретӀдикай туш зун абурун.
Хъел акатда инсанар рекьида,
къугъунар ийида, жунгавар набут ийида.
7Лянет я абурун икьван инсаф авачир хъилез,
гьакӀни гъазабдиз, акьван къати!
Якьубан рухвайрин арада гьарнихъ чукӀурда абур,
чкӀана гьарниз акъудда Исраилан рухвайрин арада!
8 Ягьуд, стхайри ви тариф ийида!
Ви гъил – душманрин кьамал жеда,
ваз стхайри икрам ийида.
9Вун, Ягьуд, жегьил аслан хьиз,
гъуьрчен винел цавуз акъатда, зи хва.
Аслан хьиз чилив игис хьана –
Нивай чӀур ийиз жеда асландин секинвал?
10Ягьудан гъилерай гьукумдин лаш аватдач,
гьакимдин аса адан кӀвачеривай къакъатдач.
Вахт къведа – ада жерме къачуда
ва халкьар адаз муьтӀуьгъ жеда.
11Лам кутӀундай затӀ адан ципицӀдин чӀере я,
ципицӀдин чӀере я шаркӀунтар кутӀунун патал.
Вичин парталар ада чехирда чуьхуьзва,
вичин либасар ципицӀдин ивида.
12Вилер адан чехирдикай мичӀи я,
некӀедикди лацу я адан сарар.
13Забулуна уьмуьр тухуда гьуьлуьн къерехда,
гимияр атана акъваздай.
Сергьятни адан патарив Сидундин гва.
14Исахар къуват квай лам я,
парарин арада яргъи хьана къатканвай;
15Адаз акуна хьи, секинвал хъсан затӀ я,
и чилни гзаф гуьрчег я,
ва далу парцин кӀаник кутуна,
масадан гъилик квайди хьана.
16Дана вичин халкь идара ийида:
имни Исраилдин тайифайрикай сад я.
17Дан рекьел гъуьлягъ хьурай,
агъу авай гъуьлягъ жигъиррал алай.
КӀасда балкӀандин кӀвач,
мияхни аватда далудихъди.
18Ребби, На хиласуник ква зи умуд!
19Гадал вегьида таланчийри,
абурухъ ам галтугда тарашиз абур.
20Ашераз булдалди недай-хъвадайди ава,
пачагьар няметралди ада таъминарзава.
21Нифтали азад мирг я,
вичи гзаф гуьрчег балаяр хадай.
22Юсуф бегьер гудай чӀере я,
бегьер гудай чӀере чешмедин патав гвай.
Адан хилери цал бегьем кӀевнава.
23Гьужумрикни акатнай ам,
душманвални авунай адахъ галаз,
Дяве авунай адахъ галаз устадар тир лишанчийри.
24Амма чӀемерук адан датӀана тӀарам тир,
адан гъилериз къуват гузвай чешме
Уьтквемдан, Якьубан Аллагьдин, гъилер тир эхир,
ва Иман гвайбурун чубан, исраилдин раг тир!
25Ам ви бубадин Аллагь я, Ада ваз куьмекда,
Ам вири Алакьдайди я, Ада ваз нуьсрет гуда.
Кьакьан цаварин нуьсрет,
Дерин деринрин нуьсрет,
Мумайрин кӀвенкӀверин ва руфунин нуьсрет.
26Вине я ви бубадин нуьсрет,
кьадим дагъларин нуьсретдилай
даим тепейрин жумартвилерилай.
Абур вири Юсуфан кьилел хьуй,
Вичин стхайрин арада хан тирдан пелел.
27Бунъямин вагьши жанавур я:
пакамахъ вичин къурбанд жакьвазва,
няниз гъуьрч сараралди кукӀварзава.
28 Исраилдин цӀикьвед тайифа ва абуруз бубади авур хийир-дуьаяр гьа ихьтинбур я. Гьар са тайифадиз – вичин хийир-дуьа.
Якьубан кьиникь ва кучукун
29Якьуба рухвайриз лагьана: «Мукьвара зун бан-бубайрин патав хъфида. Зун зи бубайрин патав хети Эфранан чуьлдал алай кьветӀе динж ая. 30И кьветӀ Къенандин чилел, Мамредин патарив, Махпелан чуьлда ава, чуьл лагьайтӀа Ибрагьима хети Эфранавай сурарин чка патал къачурди я. 31Ана гьам Ибрагьимни адан паб Сарра, гьам Исакьни адан паб Рефикъа кучукнава, гьана за Лияни кучукнай. 32Гьам чуьл, гьамни анал алай кьветӀ хетийривай маса къачунвайбур я».
33Рухвайриз ихьтин тапшуругъ гана, Якьуб месел ярх хьана кьена ва бан-бубайрин патав хъфена.
Currently Selected:
Хьунухь 49: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
