ГалатӀвийриз 5

1Чун азад инсанар хьун патал Иса Месигьди чун лукӀвиляй акъудна. Гьавиляй, мягькем хьухь ва мад лукӀвилин викӀиник куь хев кутамир.

Иса Месигьди ганвай азадвал

2За, Павела, квез лугьузва: куьн суьннет авуртӀа, Месигьди квез гьич са хийирни гудач. 3За мад гъилера квез тестикьарзава: суьннет авунвай гьар са касди Къанундин вири шартӀарал амал авун герек я. 4Квез Къанундалди гьахъ-михьивилиз акъудиз кӀанзаватӀа, чир хьухь: куьн Месигьдивай къакъатна, Аллагьдин берекатдивай яргъал хьанва. 5Амма чна Руьгьдин куьмекдалди Аллагьдин вилик имандалди куьн гьахъ-михьи хьуник умуд кутазва. 6Иса Месигьдиз инсан суьннет авунвайди ва я тавунвайди хьун метлеб авай кар туш, метлеб авайди кӀанивилелди таъсирзавай иман я.

7Куьн дуьз рекье авай. Гьакъикъатдин рекье хьуниз квез ни манийвална? 8Ам куьн дуьз рекье Турди туш. 9Са тӀимил кьван гъварци вири тини хкажда. 10Гьар вуч ятӀани, Реббидихъ галаз санал чна кьиле тухвай уьмуьрди чун чӀалахъарзава: чи арада фикирдин чаравал жедач. Гъулгъула твазвайбур, яд рагъуларзавайбур, вужар хьайитӀани, чпин жазайрив агакьда. 11Стхаяр-вахар, за, эвелан хьиз, суьннет авун таблигъзаватӀа, бес гила вучиз зи геле къекъвезва? А чӀавуз мад хашуниз ягъун кӀвачик галкӀизвай къван тушир эхир! 12Куьн чӀуру рекье тваз алахъзавайбуру къуй чпин гьинаг кӀандатӀани атӀурай!

13Стхаяр-вахар, квез азадвилиз эвернава. Анжах и азадвиликай чӀуру крар паталди менфят къачумир, куь гунагькар тӀулдиз, нефсиниз къуллугъ ийимир, аксина, сада садаз кӀанивилелди къуллугъ ая. 14Вучиз лагьайтӀа вири Къанундин мана-метлеб са эмирда ганва: «Жув хьиз жуван мукьув гвайдини кӀан хьухь!»#Леви 19:18.. 15Куьне сада-сад жакьвазватӀа, игьтият хуьх, куьне сада-сад тергда!

Уьмуьр Пак Руьгьдин регьбервилик кваз

16Гьавиляй, за лугьузва: Руьгьди къалурзавайвал уьмуьр кьиле твах, а чӀавуз куьне куь гунагькар тӀулдин нефсиниз яб гудач. 17Гунагькар тӀулдиз Руьгьдиз акси тир ва Руьгьдизни гунагькар тӀулдиз акси тир затӀар кӀанзава. Абур датӀана сад-садаз акси акъваззава. Нетижада куьне квез кӀандайвал гьерекат ийизвач. 18Амма куьн Руьгьдин регьбервилик кваз хьайитӀа, куьн Къанундин регьбервилик жедач.

19Гунагькар тӀулдин крар малум я. Ибур явавал, чиркинвал, ягь тахьун, 20бутпересвал, суьгьуьрчивал, душманвал, гьуьжетунар, шак, хъел акатун, жува жув къалурун, араяр чӀурун, 21пехилвал, сархушвал, кеф чӀугун ва ибуруз ухшар амалар я. Мад гъилера за квез малумарзава: ихьтин крарал машгъулбуру Аллагьдин Пачагьлугъ ирс яз къачудач.

22Руьгьдин майва ихьтинди я: кӀанивал, шадвал, саламатвал, сабур, регьимвал, хъсанвал, вафа, 23хъуьтуьлвал, нефсинал гъалиб хьун. Къанунда ихьтин крариз акси са затӀни авач.

24Иса Месигьдиз талукьбуру чпин беденрин чӀуру темягьрихъ ва гьашервилерихъ галаз санал хашуниз акъуднай. 25Руьгьди чаз уьмуьр ганватӀа, ша чна Руьгьдин регьбервилик кваз ам кьиле тухун. 26Машгьурвал кӀани ксар тежен, сада-садаз хъел гъин тийин, сада-садал пехилвал тийин!

Currently Selected:

ГалатӀвийриз 5: ЛезПК

Highlight

Copy