ГалатӀвийриз 6

1Стхаяр-вахар, са инсан са тахсирдин винел кьуртӀа, куьне, Аллагьдин Руьгь квай инсанри, ам дуьз рекьел хтун патал милайимвилелди адаз куьмек ая. Килиг гьа, куьнни гунагьра гьат тийидайвал хьурай! 2КӀеве гьатайдаз даях хьухь. Гьа и кардалди куьне Месигьдин Къанун кьилиз акъудда. 3Сада вич са затӀни тушиз зурба кас яз гьисабзаватӀа, ада вичи-вич алцурарзава. 4Къуй гьар сада вичин кӀвалахриз фикир гурай ва абур масадбурун кӀвалахрив гекъиг тавурай, анжах вичин кӀвалахралди дамахрай! 5Гьар садаз вичин пар авайди я.

6Низ са касди имандикай хабар гузватӀа, гьа касди вичин муаллимдихъ галаз вичин мал-девлет пайрай.

7Алцурар жемир: Аллагьдикай садавайни ягьанатариз жедайди туш. Инсанди, вуч цайитӀа, гьам гуьнни ийида. 8Ни вичин гунагькар тӀул паталди са вуч ятӀани цайитӀа, ам, гьа гунагькар тӀулдин бегьер себеб хьана, телефни жеда. Руьгь паталди са вуч ятӀани цайида вичиз эбеди уьмуьр къачуда. 9Хъсанвал авунин ара атӀумир. Чна хъсанвал авун давамариз хьайитӀа, са вахт къведа чна цанвайдалай бегьерни къахчуда. 10Гьавиляй, гьикьван вахтунда и кар мумкин ятӀа, чна виридаз хъсанвал ийин, иллаки чи имандин стхайриз-вахариз.

Эхиримжи гаф

11За жуван гъилив и чӀехи гьарфаралди кхьенвайдаз килига!

12Винелай чеб хъсанбур яз къалуриз кӀанзавайбуру куьн суьннет кьабулиз мажбуриз алахъзава. Абуруз Месигь хашуниз акъудунай чпин геле къекъвена кӀанзавач. 13Гьатта суьннет авунвайбуру чпини Къанундал амал ийизвач. Абуруз анжах и кардалди чпи дамахдайвал куьн суьннет авуна кӀанзава. 14Заз лагьайтӀа, чи Ребби тир Иса Месигьдин хашунилай гъейри гьич са куьнални дамахиз кӀанзавач. Адан куьмекдалди зун паталди дуьнья хашуниз акъуднава ва дуьнья паталди – зун. 15Суьннет авунин ва я суьннет тавунин арада са акьван тафават авач. Кьилинди Аллагь паталди вун цӀийиз халкьнавайди хьун я! 16Къуй и къайдайрал амал ийизвайбуруз виридаз ва гьакӀни халисан Исраилдиз саламатвал ва регьим несиб хьурай!

17Идалай кьулухъ къуй гьич садани мад заз азиятар гун тавурай, вучиз лагьайтӀа за жуван бедендал жув Исадиз талукь тирвал къалурзавай лишанар гваз къекъвезва.

18Стхаяр-вахар, къуй чи Ребби Иса Месигьдин берекат квехъ галаз хьурай! Амин.

Currently Selected:

ГалатӀвийриз 6: ЛезПК

Highlight

Copy