ГалатӀвийриз 4

1За мад лугьузва: ирссагьиб гьар са куьнин иеси хьайитӀани, аял тир чӀавуз лукӀралай чара яз жедач. 2Ам бубади вахтуналди тайинарай гъилибанрин ва тербиядаррин гъилик жеда. 3Чунни гьакӀ имандин рекьел татанмаз и дуьньядал агъавалзавай руьгьдин къуватрин лукӀар тир. 4Амма, тайин авунвай вахт атана агакьайла, Аллагьди папа ханвай, Къанундиз муьтӀуьгъ тир Вичин Хва ракъурна, 5Къанундиз муьтӀуьгъ тир чун маса къачун ва веледвилиз кьабулун паталди. 6Куьн Аллагьдин веледар я. Гьавиляй Аллагьди Вичин Хцин «Абба! Буба чан!» лугьузвай Руьгь чи рикӀера туна. 7Гьавиляй вун мад лукӀ туш, велед я. Велед ятӀа, гьакӀни Аллагьди вун ирссагьиб яз тайин авунва.

Павела галатӀвийрикай фикир чӀугун

8Сифтедай, Аллагь чин тийидай чӀавуз, куьн гьакъикъатда чеб аллагьар тушир затӀарин лукӀар тир. 9Амма гила квез Аллагь чизва, дуьз лагьайтӀа, Аллагьдиз куьн чизва. ГьакӀ хьайила, вучиз бес куьн мад диндиз талукь зайиф ва куьлуь кьатӀунрал элкъвена хквезва? Квез цӀийи кьилелай гьабурун лукӀар хъижез кӀанзавани? 10Куьне гьатта тайин тир йикъарал, варцарал, вахтарал ва йикъарал амалзава! 11Заз кичӀезва за квел чӀугур зегьметар гьавая физ.

12Стхаяр-вахар, за квез минетзава, зун хьиз хьухь, вучиз лагьайтӀа, зунни куьн хьиз хьанва. Куьне заз гьахъ галачир гьич са карни авунач. 13Квез чизвайвал, зун сад лагьай гъилера куь патав атунин, за квев Шад Хабар агакьарунин себеб жуван сагъламвал зайиф хьун тир. 14Зун авай гьал, зи бедендин зайифвал куьн паталди са синагъ тиртӀани, куьн заз пис тамашнач, куьне зун яргъаларнач. Куьне зун Аллагьдин са малаик хьиз, Иса Месигь кьабулдай хьиз кьабулна. 15Гила гьинва куь виликан а бахтаварвал? Зун чӀалахъ я, виликан вахтара и кар мумкин тиртӀа, куьн куь вилерни акъудна заз гуниз гьазур тир. 16Гила, квез гьакъикъат ачухарна лугьуз, зун куь душман хьанвани?

17Гьа инсанар куьн чпин патахъ ялиз алахъзава, амма абурун ниятар чӀурубур я. Абуруз куьн чавай къакъудиз, чпин пад хуьзвайбур ийиз кӀанзава. 18И кардикай зарар авач, абур чпин михьи ниятрал, анжах зун куь патав гвай береда ваъ, даима акъвазиз хьайитӀа.

19Зи веледар, Иса Месигьдин къаматди квез эсер ийидалди, куьн паталди за саки цӀийи кьилелай аял хадайла чӀугвадай хьтин тӀалар чӀугвазва. 20Агь, исятда заз куь юкьва жез ва квехъ галаз маса жуьре рахаз кӀанзава. Куьне зун гзаф мягьтеларзава.

Къаравушдин аялар ва азад папан аялар

21Эй, Къанундиз муьтӀуьгъ хьана уьмуьрь тухуз кӀанзавайбур, мегер куьн Къанундин гъавурда акьазвачни? 22Ибрагьимаз кьве хва хьайиди, сад къаравушди, садни азад тир папа ханвайди кхьенва. 23Къаравушди хайиди адетдин къайдадалди, азад папа хайиди Аллагьди гайи гафуниз килигна дуьньядал атанвай. 24И гьикаяда дерин мана ава. Вучиз лагьайтӀа, и кьве папа кьве Икьрардин лишан гузва. Сад Синай дагъдай я, ада лукӀар хьун паталди аялар хазва. Ам Гьежер#4:24 Гьежер – Ибрагьиман паб Саррадин къаравуш. Саррадиз аялар жезвачирла, Гьежера Ибрагьималай хва Исмаил хана. Амма Ибрагьиман ирссагьиб адан хва Исакь хьана. Аллагьди гайи гафунив кьурвал, Исакь Сарради лап геж хайиди тир. я. 25Гьежера Арабистанда авай Синай дагъ къалурзава, гьакӀни ам алай девирдин Ярусалимдиз ухшар я. Вучиз лагьайтӀа, Ярусалим вичин веледрихъ галаз санал лукӀвиле ава. 26Амма цаварин Ярусалим азад я, ва ам чи диде я. 27Каламда икӀ лагьанва:

«Хвеши хьухь, эй бегьер тегъидай,

аялар авачир паб!

Шадвал ая, гьарая,

аял ханвачир ва аял хаз тежезвай паб!

Вучиз лагьайтӀа гадарнавай папаз

гъуьл авай папалай пара аялар жеда» # Яшай 54:1. .

28Куьнни, стхаяр-вахар, Исакь хьиз Аллагьди гаф гуналди дуьньядиз атанвайбур я. 29Амма а чӀавуз адетдин къайдада ханвай кас Руьгьдин къуватдалди ханвай касдин геле гьикӀ къекъвезвайтӀа, гилани гьакӀ я. 30И кардикай Каламда вуч кхьенва? «Къаравушни адан хва чукура. Вучиз лагьайтӀа, къаравушдин хва азад папан хцихъ галаз санал ирссагьиб хьун герек туш»#Хьунухь 21:10.. 31Гьавиляй, стхаяр-вахар, чун къаравушдин ваъ, азад папан веледар я!

Currently Selected:

ГалатӀвийриз 4: ЛезПК

Highlight

Copy