ГалатӀвийриз 3

Къанун ва иман

1Ахмакь галатӀвияр! Вилерикай Иса Месигь хашуниз чӀугунвай гьал карагзавайтӀани, куьн ни икӀ тӀилисимда тунва? 2Зи са суалдиз жаваб це: Руьгь куьне Къанун вилив хуьналди къачунани, я тахьайтӀа Шад Хабардикай квез ван хьайидал иман гъуналди къачунани? 3Мегер куьн гьакьван ахмакь яни? Руьгьдилай эгечӀна, гила квез куь ниятрив куь къуватдалди агакьиз кӀанзавани? 4Икьван азиятар куьне нагьахъ чӀугунани? Икьван крар нагьахъ хьун мумкин туш! 5Руьгь квез гайи, куь арада аламатдин крар кьиле тухузвай Аллагьди и крар куьне Къанун кьиле тухузва лугьуз ва я Шад Хабардикай квез ван хьайидал куьне иман гъана лугьуз кьиле тухузвани мегер?

6 Ибрагьим рикӀел хкваш – адакай кхьенва хьи, ада «Аллагьдихъ иман авуна – им адан гьахъ-михьивал яз кьабулна»#Хьунухь 15:6.. 7Гила гъавурда акьукь, имандал атанвайбур Ибрагьиман веледар я!

8 Каламда виликамаз Аллагьди, имандиз килигна, маса халкьар гьахъ-михьивилиз акъуддайди хабар гана ва Ибрагьимаз «Вири халкьари ви куьмекдалди хийир-дуьа къачуда»#Хьунухь 12:3. – лагьана, Шад Хабар малумарнай. 9Гьавиляй имандал атанвайбуру иман гваз уьмуьр тухузвай Ибрагьимахъ галаз санал хийир-дуьа къачузва.

10Къанун вилив хуьн ният авайбур вири лянетдик ква. Вучиз лагьайтӀа кхьенва: «Къанунда кхьенвай вири затӀар кьилиз акъуд тийизвайбуруз лянетрай!»#Киххьей Къанун 27:26.. 11Малум я хьи, Къанун кьиле тухуналди, садни Аллагьдин вилик гьахъ-михьивилиз акъудзавач, вучиз лагьайтӀа «Гьахъ-михьи касди имандалди уьмуьр тухуда»#Гьабакьукь 2:4.. 12Къанунди имандал бине кьунвач, вучиз лагьайтӀа кхьенва: «Къанундин эмирри чеб кьилиз акъудзавайбуруз уьмуьр гузва»#Леви 18:5.. 13-14Иса Месигьди чун Къанундин лянетдикай хиласна. Чи эвезда Ам вич лянетдик акатна. Гьа и кардикай икӀ кхьенва: «Таракай куьрсарнавай гьар са касдал лянет ала»#Киххьей Къанун 21:23.. Маса халкьаривайни, Иса Месигь арада аваз, Ибрагьимаз гайи хийир-дуьа къачуз хьурай ва чнани чаз хиве кьунвай Руьгь имандалди къачурай лагьана, Ада вичел лянет къачуна, чун хиласна.

Къанун ва хиве кьун

15Стхаяр-вахар, за квез инсанрин гьар йикъан уьмуьрдай мисал гъида: гьатта инсандин лазим тир къайдада тестикьарнавай весини дегишардай ва я адак алаваяр кутадай ихтияр садазни авач. 16Аллагьди анжах Ибрагьимаз ва адан эвледдиз хиве кьунар ганвай. Аллагьди, гзаф инсанрикай рахазвай хьиз, «ва адан эвледриз» ваъ, са инсандикай рахана, «ва ви эвледдиз»#Хьунухь 22:18. лугьузва. Амни Иса Месигь я. 17Гьа идалди заз лугьуз кӀанзава: Аллагьди виликамаз тестикь авунвай Икьрар адалай кьуд вишни къанни цӀуд йис алатайла атай Къанундивай къуватдай вегьиз жедач ва идалди Ибрагьимаз гайи гаф кьилиз акъуд тавуна таз жедач. 18Вучиз лагьайтӀа, ирс Къанундилай аслу тиртӀа, ада мад хиве кьунрал бине эцигдачир. Амма ам Аллагьди Ибрагьимаз, са нямет хьиз, савкьват хиве кьунин рекьелди гана.

19Бес Къанун куьз герек я? Къанун Икьрар чӀурайбуруз чпик тахсир квайди чир хьун паталди алава хъувунай. Ам Аллагьди ирс хиве кьунвай кас – Ибрагьиман несилдай тир Инсан къведалди къуватда амукьна кӀанзавай. Къанун малаикрин куьмекдалди, са арачидин гъилелди агакьарнай. 20Сада кьилди гьерекатзаватӀа, адаз арачи герек туш. Аллагь сад я!

21АкӀ хьайила, Къанун Аллагьдин хиве кьунриз акси яни? Гьелбетда, ваъ! Чаз ганвай Къанундивай уьмуьр гуз хьанайтӀа, гьахъ-михьивал Къанун кьиле тухунилай аслу жедай. 22Амма Каламди вири каинат гунагьрин есир тирди малумарна: Иса Месигьдиз иман гъунал хиве кьур затӀар анжах иманийриз гурай лагьана.

23Амма и иман къведайдалай вилик чун Къанундин гьукумдик квай, гележегда иман пайда жедалди чун есир яз кьунвай. 24Яни Къанун чаз Месигь къведалди фидай рехъ къалурдай тербия гудайди хьана, чун имандал атана, гьахъ-михьивилиз акъудун паталди. 25Амма имандал атайдалай кьулухъ чаз тербия гудайди герек амач.

ЛукӀар ваъ, рухваяр хьун

26Куьн вири Иса Месигьдал гъайи иманда Аллагьдин веледар я. 27Иса Месигьдал иман гъана цик акахьун къачур куьн вири адаз ухшар хьана. 28Гила мад чувуддинни муькуьдан, лукӀранни азад инсандин, итимдинни папан арада тафават амач, Иса Месигьдихъ галаз алакъада авай куьн вири сад хьанва. 29Куьн Иса Месигьдиз талукь ятӀа, Ибрагьиман несилдикай я ва Аллагьди савкьватар хиве кьунвайбурун ирссагьибар я.

Currently Selected:

ГалатӀвийриз 3: ЛезПК

Highlight

Copy