ЭхкъечӀун 36

1Бецалела, Агьалиаба ва чпиз Реббиди абуру ибадатхана эцигун патал алакьунар ва фагьум ганвай вири устӀарри вири кӀвалахар Реббиди къалурнавай тегьерда кьилиз акъудун лазим я».

2Мусади Бецалелаз, Агьалиабаз ва чпиз Реббиди устадвал ганвай ва кӀвалахрив эгечӀдай ашкъи авай вирибуруз эверна. 3Абуру Мусадивай Исраилдин рухвайри ибадатхана эцигун патал садакьа акъуднавай затӀар къачуна. Амма инсанри гьар пакамахъ чпин рикӀиз кӀан хьайи цӀийи савкьватар гъизвай. 4И чӀавуз ибадатхана эцигзавай вири устӀарри кӀвалах акъвазарна атана 5ва Мусадиз лагьана: «Инсанри Реббиди ая лагьанвай кӀвалахдиз лазим тир кьадардилай гзаф гъизва».

6Мусади вирибуруз гьич са итимди ва папа ибадатхана эцигун патал мад садакьаяр тагъун лазим тирди малумарун эмир авуна ва инсанривай садакьаяр кьабулун акъвазарна: 7бес кьадар кӀватнава – гьатта герек авайдалай артухни алаз.

Гьалтунин Алачух туькӀуьрун

(ЭхкъечӀун 26:1-37)

8КӀвалахдив эгечӀнавай магьир устӀарри Алачух патал кьелечӀ кушдикай, вили, мичӀи яру ва икьи яру рангарин гъаларикай цӀуд кетен храна; абурал херупӀрин шикилар акъудна. 9Гьар са кетендин яргъивал къанни муьжуьд кьуьнт, гьяркьуьвал – кьуд кьуьнт тир; абурун виридан кьадар сад хьтинди тир.

10Вад кетен санал цвана са кӀус арадал гъана, маса вадни санал цвана. 11Са кӀусунин къерехда авай кетен тирвал вили рангунин кваквар кутуна, гьа ихьтин кваквар – муькуь кӀусунин къерехда авай кетендикни кутуна: 12са кӀусунин къерехда авай кетен тирвал яхцӀурни цӀуд кваг ва яхцӀурни цӀуд – муькуь кӀусунин къерехда авай кетендик, кваг квакун къаршида. 13Къизилдин яхцӀурни цӀуд кӀир гьазурна ва кьве кӀусни сад садахъ галаз галкӀурна битав алачух арадал гъана.

14ЦӀегьрен сарикай цӀусад кетен храна – Алачухдин винел къат. 15Гьар са кетендин яргъивал къанни цӀуд кьуьнт тир ва кьуд кьуьнтни – гьяркьуьвал; вири цӀусадни са кьадардинбур тир. 16Абурукай вад санал цвана ва амай ругудни санал цвана. 17Са кӀусунин къерехдин кетен тирвал яхцӀурни цӀуд гьалкъа авуна, ва яхцӀурни цӀуд гьалкъани – муькуь кӀусунин къерехдин кетен тирвал. 18Буьруьнждин яхцӀурни цӀуд кӀир гьазурна, кьве кӀусни сад тир винел къат арадал гъун патал галкӀурна. 19Винелай гьерерин табагъ хамарикай са къат чӀугуна, адан винелайни – гьуьлуьн кицӀин хъицикьрин къат.

20Алачух патал акӀаждин кӀарасдикай кьулар гьазурна: 21гьар са кьулун яргъивал цӀуд кьуьнт тир, гьяркьуьвални садни зур кьуьнт, 22гьар сад – сад садахъ галкӀурнавай кьве чукьвандикай. Алачухдин вири кьулар гьа ихьтинбур тир. 23Алачухдин кьибле патан цал патал къад кьулни 24абурун кӀаник кутадай гимишдин яхцӀур пун гьазурна – гьар са кьулунин кӀаник кьве пун, адан кьве чукьван патал. 25Гьа и тегьерда кьвед лагьай, кефер патан цал патални къад кьул 26ва гимишдин яхцӀур пун – гьар садан кӀаник кьве пун жедайвал – расна. 27Алачухдин кьулухъ, рагъакӀидай патан цал патал ругуд кьул гьазурна, 28кьулухъ патан пипӀер патал – мадни кьве кьул. 29КӀаникай и кьулар кьве хиленбур тир, винелай лагьайтӀа (сад лагьай гьалкъа алай чкадал) – битавбур. Ихьтин кьулар кьвед авай – гьар са пипӀе сад. 30И муьжуьд кьулуниз гимишдин цӀуругуд пун расна: гьар са кьулунин кӀаник – кьве пун.

31АкӀаждин кӀарасдикай турвакьарни гьазурна: вад – Алачухдин са патан цал тирвал къвезвай кьулар галкӀурун патал, 32вад – Алачухдин кьвед лагьай цал тирвал къвезвай кьулар галкӀурун патал, вадни – адан кьулухъ, рагъакӀидай патан цал патал. 33Юкьван турвакьди кьуларин кьакьанвал кьве чка пай жезвай чкадал цлан са къерехдилай муькуь къерехдалди галкӀурзавай. 34Кьулар къизилдалди кӀевна, турвакьар кукӀурун патал абурук къизилдин гьалкъаяр кутуна ва турвакьарни къизилдалди кӀевна.

35Вили, мичӀи яру ва икьи яру гъаларикай ва кьелечӀ кушдикай перде храна; пердедал херупӀрин шикилар акъуднавай. 36Ам патал акӀаждикай кьуд гул гьазурна ва абур къизилдалди кӀевна, къизилдин къармахар гьазурна ва гулар патал гимишдикай цӀурурна кӀалубда туна кьуд пун гьазурна.

37Вили, мичӀи яру ва икьи яру рангунин гъаларикай ва кьелечӀ кушдикай вичи Алачухдиз гьахьдай чка кӀев авун лазим тир гьар жуьредин рангарин перде храна. 38Къармахар квай вад гул гьазурна, гулар къизилдалди кӀевна, гьам винел пад гьамни галкӀурдай чкаяр, ва абур патал буьруьнждин вад пун гьазурна.

Currently Selected:

ЭхкъечӀун 36: ЛезПК

Highlight

Copy