ЭхкъечӀун 35

Гьалтунин Алачух эцигун

(35–40 кьилер)

Киш йикъан къанунар

1Исраилдин рухвайрин вири эл кӀватӀна, Мусади лагьана: «Ингье Реббиди вуч эмир авунватӀа. 2Ругуд юкъуз кӀвалаха, амма ирид лагьайди – пак югъ я, им Реббидиз талукьарзавай Киш я, ял ядай югъ. И юкъуз кӀвалахай гьар сад ажалдиз лайих жеда. 3Кишдин йикъара гьатта куь кӀвалера цӀай куькӀуьрдай ихтиярни авач».

Гьалтунин Алачух патал садакьаяр

(ЭхкъечӀун 25:1-9)

4«Ингье Реббиди вуч эмир ийизватӀа, – лагьана Мусади Исраилдин рухвайрин вири элдиз. – 5Ребби патал садакьаяр кӀватӀ ая. Гьар сада, низ вуч кӀанзаватӀа, Реббидиз къизил, гимиш, буьруьнж, 6вили, мичӀи яру ва я икьи яру рангунин гъалар, кьелечӀ куш я тушни цӀегьрен сар, 7гьерен табагъ авур хамар ва гьуьлуьн кицӀин хъицикьар, акӀаждин кӀарас, 8чирагъар патал зейтундин чӀем, гуьцӀун ва кун патал гъиликдай ягъадик кутадай хуш ни галай шейэр, 9чпелди чухва ва хуруган чӀагурун патал шагьам къванер ва къерехра твадай багьа къашар къурбанд авурай. 10Куь магьир устӀарри атана Реббиди ая лагьанвай вири затӀар гьазур авурай: 11Алачух, адан винел патан къат ва адалай чӀугвадай затӀар, кӀирер, кьулар ва турвакьар, гулар ва пунар, 12Икьрардин сандух ва ам патал паяяр, „Гунагьар алудзавай чка“ лугьудай къапсах ва перде, 13экӀягъан, адан паяяр ва къаб-къажах, Реббидин вилик жедай фу, 14чирагъган ва адан тадаракар, чирагъар ва абур патал чӀем, 15хуш ни акъудун патал кудай шейэр эцигна цӀай ядай къурбанган ва ам патал паяяр, гуьцӀдай чӀем, хуш гум акъуддай шейэр, Алачухдин сив кӀевдай перде, 16кунугрин къурбанган, ам патал буьруьнждин чил, адан паяяр ва къаб-къажах, кӀаник кутадай затӀни галай лат, 17гъенин пердеяр, абур патал гулар ва абур винел эцигдай пунар, гъенин вар патал перде, 18Алачухдин хкар ва элкъуьрна гъен кӀевзавай перде патал хкар, абурухъ жедай епер, 19ибадатханада къуллугъ ийидайла алукӀдай парталар – хахам Гьарунан пак тир парталар ва адан рухвайрин хахамвилин парталар».

20Исраилдин рухвайрин вири эл чкӀана, 21ахпа гьар сада вичин рикӀиз кӀан хьайивал, вичиз Ребби патал садакьа акъудиз кӀан хьайи затӀар гъана – Гьалтунин Алачух патал, ана къуллугъ авун патал ва пак тир парталар патал герек кьван вири шейэр. 22Иштирак ийиз кӀанзавай вири атана – гьам итимар, гьамни папар – ва къизилдин безекар гъана: япагьанар, тупӀалар, яхаяр. И къизилар абуру Реббидиз савкьват яз гъана. 23Жагъайбуру вили, мичӀи яру ва икьи яру гъалар, кьелечӀ куш, цӀегьрен сар, гьерен табагъ авур хамар ва гьуьлуьн кицӀин хъицикьар гъана. 24Нелай алакьнатӀа Реббидиз садакьа яз гимиш ва я буьруьнж гъана. Низ карда гъиликун патал бакара къведай акӀаждин кӀарас жагъанатӀа, гьам садакьа акъудна. 25УстӀарвал квай папари гъалар авуна ва вили, мичӀи яру ва икьи яру гъалар ва кьелечӀ куш, 26маса папари – нелай алакьнатӀа ва рикӀиз кӀан хьанатӀа – цӀегьрен сарикай гъалар храна. 27Тухумрин кьиле авайбуру шагьамдин къашар ва чпелди чухва ва хуруган чӀагурдай багьа къашар, 28ва гьакӀни хуш ни галай затӀар ва чӀемер гъана – экв гун патал куькӀуьрдай, пелевай гуьцӀдай ва гум гун патал цӀай ядай. 29Гьа икӀ Исраилдин рухвайрин векилри – Реббиди Мусадин мецелай ая лагьана эмир авур карда иштирак авун рикӀиз кӀан хьайи итимри ва папари, – Реббидиз чпин савкьватар гъана.

УстӀаррин тапшуругъар

(ЭхкъечӀун 31:1-11)

30Мусади Исраилдин рухвайриз лагьана: «Чир хьухь: Реббиди Ягьудан тайифадай тир Гьуран хтул, Уридин хва Бецалел хкяна, 31ва адак Аллагьдин руьгь кутуна, адаз гьар са карда алакьунар ва фагьум, чирвилер ва устадвал гана, 32гьаниз килигна адахъ къизилдихъ, гимишдихъ, буьруьнждихъ галаз кӀвалахдай алакьунар ава, 33къерехра тун патал къванер атӀуз ва гьакӀни кӀарасдал нехишар атӀуз чидай – устадвал герек тир гьар са кӀвалах кьилиз акъудиз жедай. 34Реббиди адаз, ва гьакӀни Данан тайифадай тир Ахисамахан хва Агьалиабаз масадбуруз чирвилер гудай устадвални бахш авунва. 35Реббиди абуруз устадвилин вири сирер, нехишар авай парчаяр хрунин, вили, мичӀи яру ва икьи яру гъаларикай ва кьелечӀ кушдикай гьар жуьредин рангарин парчаяр ва гьакӀни адетдин парчаяр хрунин сирер ачухарнава.

Currently Selected:

ЭхкъечӀун 35: ЛезПК

Highlight

Copy