ЭхкъечӀун 37

Икьрардин сандух

(ЭхкъечӀун 25:10-22)

1Бецалела акӀаж кӀарасдикай кьведни зур кьуьнтуьн яргъи, садни зур – гьяркьуьвал ва садни зур кьакьанвал алай сандух туькӀуьрна, 2ам къенепатайни къецепатай михьи къизилдалди кӀевна ва къизилдин цӀарцӀе туна. 3Ада къизилдикай кьуд гьалкъа авуна абур сандухдин кьуд кӀвачик кукӀурна: кьвед сандухдин са патахъай, кьведни – муькуь. 4Ада акӀаждикай паяяр гьазурна, абур къизилдалди кӀевна 5ва ам, паяйрихъ акална тухун патал, сандухдин кьве патахъайни галай гьалкъайрай сухна.

6Ада сандухдиз кьве кьуьнтни зур яргъивал алай ва садни зур гьяркьуьвал алай михьи къизилдин къапсах, гунагьар алудзавай чка, гьазурна. 7Къапсахдин кьве къерехдал ада къизилдикай гатанвай кьве херупӀ туькӀуьрна: 8сад са къерехдихъай, муькуьди – маса. Абуру къапсахдихъ галаз чӀур тежедай битаввал арадал гъизвай. 9Сад садан чина акъвазна ва къапсахдиз килигиз, абуру адан винел чпин лувар экӀянавай.

Реббидин вилик жедай фан экӀягъан

(ЭхкъечӀун 25:23-29)

10Бесалела акӀаж кӀарасдикай кьве кьуьнт яргъивал алай, са кьуьнт гьяркьуьвал алай ва садни зур кьуьнт кьакьанвал алай экӀягъан расна, 11ам михьи къизилдалди кӀевна ва къерехдай фенвай къизилдин цӀарцӀелди яна. 12Адан къерехар тирвал ада са капан юкьван кьакьанвал алаз цал хкажна ва и цал къизилдин цӀарцӀелди яна. 13-14Ада экӀягъандин чка дегишун герек атай чӀавуз чпяй паяяр сухун патал къизилдин кьуд гьалкъа авуна ва абур экӀягъандин кьуд пипӀик кӀвачерин винелай кукӀурна. Гьалкъаяр къерехра авай. 15Ада экӀягъан ялун патал акӀаждикай паяяр расна ва абур къизилдалди кӀевна. 16Ада михьи къизилдикай экӀягъандал хьана кӀандай къапар туькӀуьрна: курар, кавчаяр, жемер ва гичинар – абурай иличун патал.

Чирагъган

(ЭхкъечӀун 25:31-40)

17Бесалела михьи къизилдикай гатанвай чирагъган расна. Адан танди, хилери ва къабухри – къабухрин пунари ва цуькведин пешери – сад тир битаввал арадал гъизвай. 18Чирагъгандал ругуд хел алай: пуд са патахъай, пудни – муькуь патахъай. 19Ругуд хилекай гьар садал, бадамдин цуьк хьтин, пун ва цуькведин пешер квай, пуд къабух алай. 20Чирагъгандал вичел лагьайтӀа, бадамдин цуьк хьтин, пун ва пешер квай, кьуд цуьк алай. 21Хилерин сад лагьай жуьтуьнин кӀаник – къабухдин бине, кьвед лагьай жуьтуьнин кӀаник – къабухдин бине, пуд лагьай жуьтуьнин кӀаникни – къабухдин бине; вири ругуд хилен кӀаникни гьа икӀ тир. 22Гьам къабухрин бинейри, гьам хилери чирагъгандихъ галаз санал сад тир битаввал арадал гъизвай; вирини гатанвай михьи къизилдикай тир. 23Ада михьи къизилдикай ирид чирагъ расна, багъар патал къизилдикай хехер ва хекендазар гьазурна. 24Чирагъгандиз ва адан вири тадаракриз михьи къизилдин са киккар акъатна.

Хуш ни галай затӀар кудай къурбанган

(ЭхкъечӀун 30:1-5)

25Бесалела хуш гум акъудун патал кудай затӀар эцигна цӀай ядай къурбанган акӀаждикай расна – кьуд пад барабар дуьз пипӀерин, са кьуьнт яргъивал, са кьуьнт гьяркьуьвал ва кьве кьуьнт кьакьанвал алай. Къурбандар ийидай и затӀунин крчари адахъ галаз чӀуриз тежедай садвал арадал гъизвай. 26Адан винел пад, къвалар ва крчар ада михьи къизилдалди кӀевна, ва ам къизилдин цӀарцӀе туна. 27Ада и къурбанган ялун патал чпе паяяр сухдайвал, къизилдикай кьве гьалкъа авуна ва абур цӀарцӀин кӀаникай кьве патахъай галкӀурна. 28Ада акӀаждикай паяяр расна ва абур къизилдалди кӀевна.

29Ада пелевай гуьцӀдай пак тир чӀем ва михьи, хуш гум гун патал кудай шейэр устадвилелди гьазурна.

Currently Selected:

ЭхкъечӀун 37: ЛезПК

Highlight

Copy