Эфесвийриз 4

Руьгьдин жигьетдай садвал

1 Ребби себеб яз къазаматда авай за квез минетзава: куьн Аллагьди эвернавайбур яз хьайила, куь везифадиз лайих яз уьмуьр твах. 2Дамах гвачирбур ва умунбур хьухь, сад садав сабурдивди ва муьгьуьббатдивди эгечӀ. 3Ислягьвилин зунжурралди куь руьгьдин садвал мягькемарун патал, жедай кьван вири ая. 4Квез ганвай умуд сад тир хьиз, Руьгьни сад я, Беденни. 5Ребби сад, иман сад, цик акахьун къачун сад, 6Аллагь – виридан Буба – сад я. Ам виридан винел ала ва вири Вичин гъилик кваз вирина кардик ква.

7 Месигьди чун паталди тайинарнавай уьлчмедалди чакай гьар садаз берекат ганва. 8Гьавиляй лугьунни авунва:

«Хкаж хьана Ам кьакьандиз,

гуьгъуьнал алаз тухуз есирар,

инсанриз савкьватар гана» # Забур 67:19. .

9«Хкаж хьана» лугьуни Ам виликдай агъуз, чилел эвичӀунилай гъейри мад затӀни къалурзавач. 10И ЭвичӀайди, Вичелди вири алем ацӀурун патал, цаварилайни виниз хкаж хьайи гьа Гьам я. 11-13Аллагьдиз талукьбур къуллугъ авунин кардиз гьазур хьун патал, чун вири иманда ва Аллагьдин Хва кьатӀунин карда садвилив агакьдай кьван чӀавалди, чун руьгьдин акьулбалугъвилив агакьдалди, Виче тамамвилин ацӀайвал авай Месигьдиз ухшар яз чӀехи жедалди, чна Месигьдин Беден арадал гъун патал, Аллагьди садбурукай илчияр, муькуьбурукай пайгъамбарар, масадбурукай Шад Хабардикай муштулухар гудайбур, бязибурукайни инсанар хуьдай чубанар ва муаллимар авуна.

14Гьа чӀавуз чакай инсанар рекьелай алудзавай амалдар тапархъанрин къурбандар ийизвай жуьреба-жуьре чирвилерин лепейрал ян гузвай ва гарари тухузвай гъвечӀи аялар жедач. 15Амма муьгьуьббатдивди гьакъикъат лугьуз, вири крара Кьил яз авай Месигьдин къилих къалуриз, чун чӀехи жеда. 16Гьам себеб яз вири Беден сад хьанва ва вири алакъайралди мягькем хьанва ва адан вири паяри гьар сада вичин кӀвалах ийизва. Гьа икӀ вири Беден чӀехи жезва ва муьгьуьббатда арадал къвезва.

Виликан уьмуьр ва цӀийи уьмуьр

17Гьавиляй Реббидин ТӀварцӀелай за малумарзава ва тагькимзава: фикирар ичӀи тир мажусияр хьиз уьмуьр тухун акъвазара, 18абурун къанажагъ мичӀи я. Абурун рикӀерин баятвал себеб яз арадал атанвай къенепатан буьркьуьвиляй абур Аллагьди гузвай уьмуьрдикай чара авунва. 19Гьар жуьредин айиб квадарна, абуру явавилиз кьил язава, тухвал течиз гьар са чиркинвиле гьатзава.

20Амма квез Месигь акӀ чир хьанач. 21Квез Адакай ван тахьана авач ва квез, Адан терефдар хьайибуруз, гьакъикъат чирна, гьикӀ лагьайтӀа гьакъикъат Исада ава. 22Алцурарзавай гьевесар себеб яз члаф жезвай куь куьгьне тӀулдиз хас уьмуьрдин виликан къайдадикай куьне кьил къакъуддайвал квез чирна. 23Куь фикиррин тӀул цӀийи ая, 24Аллагьдин къилих – гьакъикъи гьахъ-михьивал ва паквал къалурзавай цӀийи тӀул алукӀ.

25Гьавиляй къуй квекай гьар сада таб гадаррай ва вичин мукьув гвайбуруз авайвал лугьурай, вучиз лагьайтӀа чун вири са Бедендин паяр я. 26Хъиле аваз, гунагь мийир, куь хъел рагъ акӀидалди квек тамир. 27Куь уьмуьрда иблисдиз чка гумир. 28Ни чуьнуьхиз хьанатӀа, мад ада чуьнуьх тахъвурай, къуй ада кӀвал-югъ патал герек затӀар вичин зегьметдалди гъилиз гъурай ва муьгьтежвиле авайбурухъ галаз пайрай. 29Са жуьрединни чӀуру гафар лугьумир, анжах несигьат патал хийир авай гафар лагь, яб гузвайбуруз нуьсрет гъидайвал ая. 30Хиласвилин югъ патал квел муьгьуьр хьиз гьалчнавай Аллагьдин Пак Руьгь пашман ийимир. 31Руьгьда авай гьар жуьредин туькьуьлвиликай, хъилекай, гъазабдикай, гьарайдикай, намусдик хкуьрдай гафарикай ва гьар жуьредин писвиликай хилас хьухь. 32Сад садахъ галаз къени хьухь, сада садахъ рикӀ кузвайди къалура, Аллагьди куь гунагьрилай Месигьдалди гъил къахчурвал, сада садалай гъил къахчу.

Currently Selected:

Эфесвийриз 4: ЛезПК

Highlight

Copy