Эфесвийриз 5

Экуьнин аялар

1Аллагьдин рикӀ алай веледар хьана, Адалай чешне къачу. 2Месигьдиз чун кӀан хьайивал ва Вичи Вич чи паталай Аллагьдиз савкьват ва къурбанд яз, хуш атир яз гайивал, куьне муьгьуьббатда аваз уьмуьр твах. 3Куь арада гьич са дуьшуьшдани явавилин ва я гьар жуьредин чиркинвилин ва я мискьивилин гьич гелни тахьун лазим я – ибур Аллагьдиз талукьбуруз кутуг тавур крар я. 4Куь рахунра са жуьрединни айиб гафар, кьуру лагълагъар ва я кьацӀай зарафатар тахьун лазим я. Аллагьдиз шукур ийиз хьайитӀа хъсан я. 5Чир хьухь: я явавал ийизвайдаз, я рехне квайдаз, я азгъундаз – им бутперес тир мисал я – Месигьдинни Аллагьдин Пачагьлугъда ирс жедач.

6Винидихъ лагьанвай гафариз акси яз экъечӀиз, садани куьн алцурар тавурай, вучиз лагьайтӀа муьтӀуьгъ тахьайбурал Аллагьдин хъел аватда. 7Ахьтин ксарихъ галаз са уртахвални жемир.

8Са мус ятӀани куьн мичӀивиле авай, амма гила, куьн Реббидихъ ийизвай иманда авайла, квекай экв хьанва. Экуьнин аялри хьиз уьмуьр твах. 9Экуьнин майва лагьайтӀа – им гьар жуьредин дугъривал, гьахъ-михьивал ва гьакъикъат я. 10Аллагьдиз вуч хуш ятӀа, чириз алахъа. 11МичӀивилин хийир авачир крара иштиракмир, акси яз, а крар винел акъуд. 12Ахьтин ксар чинеба квел алахънаватӀа, гьатта лугьузни регъуь я. 13Вири чинебан крар экуьнал ашкара жеда. 14Чеб аквадайвал авунвай кьван виридакай экв жезва, гьавиляй лугьунни ийизва:

«Ахварай ават, ксанвайди!

Кьенвайди яз чан хъша –

Месигьди вун экуь ийида».

15Гьа икӀ, килиг гьа, ийидай кар мукъаятдиз ая, ахмакьри хьиз ваъ, камал авайбуру хьиз ая. 16Вахтунин къадир хьухь, вучиз лагьайтӀа и йикъара писвилер гзаф ава. 17Кьиле гар авайбур жемир, Аллагьдин къаст вуч ятӀа кьатӀуз алахъ. 18Руфун ацӀудалди чехир хъвамир, ида явавилихъ тухуда. Амма Руьгьдалди ацӀуз хьухь. 19Забурдин чӀаларалди, тарифдин манийралди ва руьгьани лугьунралди сада садаз несигьатар це. Манияр лагь ва куь рикӀера Реббидин тариф ая. 20Чи Ребби Иса Месигьдин ТӀварцӀин хатурдай датӀана ва вири крарай Аллагь Бубадиз шукур ая.

Иманийрин хизан

(Каласвийриз 3:18-21)

21Месигьдикай кичӀе яз сад садаз табий хьухь.

22Куьн, папар, Реббидиз хьиз, куь гъуьлериз табий хьухь. 23ГьикӀ лагьайтӀа, Месигь иманийрин кӀватӀалдин – Вичин Бедендин Кьил ва Хиласкар тирвал, гъуьлни вичин папан кьил я. 24Иманийрин кӀватӀал Месигьдиз табий жезвайвал, папарни вири крара чпин гъуьлериз табий хьун лазим я.

25-26Квез, гъуьлер, Месигьдиз Вичин иманийрин кӀватӀал кӀан хьайивал, куь папарни гьакӀ кӀан хьухь. Ада Вичи Вичин чан иманийрин кӀватӀал пак авун патал эцигна. Ада цик акахьун къачуналди ва и чӀавуз лугьудай гафарин куьмекдалди ам михьна, 27ам Вичин вилик я леке, я са нукьсан ва я гьахьтин маса лишан квачир баркалла алай кӀватӀал яз эцигиз жедайвал, ам пакди ва рехне квачирди жедайвал авуна. 28Гьа саягъда гъуьлеризни чпин папар, чпин хсуси беден хьиз, кӀан хьун лазим я. Вичин паб кӀанзавайдаз вични кӀанзава. 29ГьикӀ лагьайтӀа вичин беден такӀандай кас авач, амма гьар сада вичин бедендиз тӀуьн гузва ва адан къайгъу чӀугвазва. Гьа саягъда Месигьдини иманийрин кӀватӀалдин къайгъу чӀугвазва, 30вучиз лагьайтӀа чун Адан Бедендин паяр я. 31«Ингье вучиз итимди, бубани диде туна, папахъ галаз уьмуьр тухузватӀа ва ам адахъ галаз са чандиз элкъвезватӀа»#Хьунухь 2:24.. 32И гафара чӀехи гьакъикъат чуьнуьх хьанва, ва за квез лугьузва: абур Месигьдинни иманийрин кӀватӀалдин алакъайриз талукь я. 33Са гафуналди, квекай лугьун хьайитӀа, къуй гьар са гъуьлуьз, вичиз вич хьиз, вичин пабни кӀан хьурай, ва папани вичин гъуьлуьз гьуьрмет авурай.

Currently Selected:

Эфесвийриз 5: ЛезПК

Highlight

Copy