Эфесвийриз 3

Павела чувуд туширбуруз муштулухар гун

1Ингье, гьавиляй за, куьн, чувуд туширбур, патал Иса Месигьдин патахъай къазаматда авай Павела, дуьа ийизва.

2Аллагьдин берекат квев агакьарунин жавабдарвал Аллагьди зи хиве тунвайди квез, гьелбетда, чизва. 3Ада заз чинебан фикир ачухна, адакай за квез куьрелди кхьенай. 4И чар кӀелна, Месигьдин сирдикай заз чизвайди квевайни чириз жеда. 5Инсанрин виликан несилриз и сир малум тушир. Амма гила Руьгьди ам Аллагьдин пак илчийризни пайгъамбарриз ачухнава. 6И сир адакай ибарат я хьи, Шад Хабардин куьмекдалди маса халкьарикай чувудрихъ галаз санал Аллагьди гузвай нуьсретрин ирссагьибар ва са Бедендин паяр жезва. Иса Месигьдалди гайи гаф гьабурузни талукь я.

7Аллагьдин къуватдин гьерекатдалди заз ганвай Аллагьдин берекатдив кьурвал, закай и Шад Хабардиз къуллугъзавайди хьанва. 8Вири Аллагьдиз талукьбурукай зун дережадиз виридалайни гъвечӀиди я, ятӀани чувудар туширбуруз Месигьдин кьадар авачир девлетдикай Шад Хабар агакьарунин и берекат заз гана. 9Вири халкь авур Аллагьди лап сифтедилай чуьнуьхна кьур фикирдиз талукь чирвал вирибуруз гун зал ихтибарна. 10И фикирдив кьурвал, гила иманийрин кӀватӀалди цаварал алай гьакимриз ва гьукумриз Аллагьдихъ авай гзаф жуьрейрин камал ачух авун лазим я. 11Им Ада чи Ребби Иса Месигьдин куьмекдалди кьилиз акъудай Адан даиман къаст я. 12Месигьдиз талукь яз ва Адахъ иман ийиз, чавай азаддиз ва кьетӀидаказ Аллагьдин патав физ жеда. 13Гьавиляй куь патахъай чӀугвазвай зи азабриз килигна куьн руьгьдай ават тавун тӀалабзава за, а азабри куь баркалладиз къуллугъзава.

Иса Месигьдин муьгьуьббат

14Гьа и кар патал зун дуьа ийиз Аллагь Бубадин вилик метӀерал акъвазнава. 15Чилерал ва цаварал алай гьар са тухум Гьада арадал гъизва. 16Ада Вичин баркалладин девлетдив кьурвал, квек Вичин Руьгьдалди къенепатан къуват кутун патал 17ва иман авурвиляй куь рикӀера Месигь гьатун патал, за дуьа ийизва. Куьне куь уьмуьрдин дувулни хандакӀ муьгьуьббат хьун патал, 18вири Аллагьдиз талукьбурухъ галаз санал Месигьдин муьгьуьббатдин гьяркьуьвилин, яргъивилин, кьакьанвилин ва деринвилин гъавурда акьаз хьун патал 19ва инсандин акьулдилай вине авай и муьгьуьббат кьатӀун патал, за дуьа ийизва. Куь уьмуьр Аллагьдин вири ацӀайвилив ацӀун патал, за дуьа ийизва. 20Вичин къуватди чак акатна кар Ийизвайдаз ва чна тӀалабзавайдалай ва я чна вичикай гьатта фикирзавайдалайни лап гзаф ийиз Алакьдайдаз 21несилдилай несилдалди, эбеди яз, Иса Месигьдин ва иманийрин кӀватӀалдин куьмекдалди шукур хьурай! Амин.

Currently Selected:

Эфесвийриз 3: ЛезПК

Highlight

Copy