Эфесвийриз 2

ЦӀийи уьмуьр – берекатдин савкьват

1-2Чилинни цавун арада авай къуватрин гьакимдин – алай вахтунда Аллагьдиз аксивалзавайбурук квай руьгьдин эмирдалди куьне уьмуьр тухузвай. Куь тахсиркарвилер ва гунагьар себеб яз ва куьне куь крар гунагькар дуьньядиз хас жуьреда ийизвайвиляй, куьн кьенвайбур тир. 3Са мус ятӀани чун гьахьтинбур тир ва чна чи крар тӀебии гьевесриз кӀандайвал, жуван явавилив кьурвал ийизвай. Амай вирибур хьиз, чунни Аллагьдин хъиле вилив хуьзвай. 4Амма регьимдин девлет авай Аллагьди чахъди ийизвай ахьтин муьгьуьббат къалурна хьи, 5чун чи тахсиркарвилер себеб яз кьенвайбур тиртӀани, Ада чаз Месигьдихъ галаз санал уьмуьр хгана. Куьн хиласайди берекат я. 6Аллагьди чал Месигьдихъ галаз санал чан хкана ва Иса Месигьдихъ галаз сад хьанвай чун цавара тахтарал ацукьарна. 7Идалди Адаз къвезмай асирра Иса Месигьдин куьмекдалди чаз гудай Вичин берекатдин кьадар авачир девлет къалуриз кӀанзавай. 8-9Вучиз лагьайтӀа куьн имандалди хиласайди берекат я. Хиласвал агакьна лугьуз садани дамах тавун патал, им куь краралди авунвай агалкьун ваъ, Аллагьди квез ганвай пай я.

10Чун Аллагьди халкьнавайбур я, Аллагьди чаз кьадар яз ганвай хъсан крар авун патал, чун Иса Месигьдин къуватдалди арадал гъанва.

Иса Месигьдалди сад хьун

11Гьавиляй рикӀел хуьх: куьн хайила мажусияр тир; чпел инсанриз хас жуьреда, гъилералди «суьннетнавайбур» тӀвар алайбуру квез «суьннет тавунвайбур» лугьузвай. 12А чӀавуз куьн Месигь авачиз авай ва куьн Исраилдин халкьдикай тушир. Аллагьди гайи гафар авай Икьрарар квез талукь тушир, квехъ и дуьньяда умуд ва Аллагь авачир. 13Амма исятда – куьн Иса Месигьдиз талукь тирла – са мус ятӀани яргъаз хьайи куьн Месигьдин Ивидалди мукьвабур хьанва.

14Ада Вичи чун, чувудар, ва куьн, муькуьбур, туькӀуьр хъувуна, чи арадавай цал, яни чун чара ийизвай душманвал, Вичин кьиникьалди кукӀварна, кьведакай сад авуна. 15Виче вичин тагькимарни къайдаяр авай Къанун Месигьди къуватдай вегьена, Адан мурад кьведакай Вичихъ галаз са цӀийи халкь авун, ислягьвал арадал гъун 16ва, Вич хашунал кьиникьалди душманвал тергна, кьведни са Беденда аваз а хашунин куьмекдалди Аллагьдихъ чин элкъуьриз тун я. 17Ада атана, квез, Вичикай яргъа тирбуруз ва Вичиз мукьва тирбуруз, ислягьвиликай муштулухар гана, 18вучиз лагьайтӀа Адан куьмекдалди чаз кьве халкьдизни са Руьгьдик кваз Бубадин патав фидай мумкинвал хьана.

19Гьавиляй куьн чарабур ва къурабаяр яз амач; гила куьн Аллагьдиз талукьбурун ватандашар, Адан хизандин векилар я. 20Куьн илчийрикайни пайгъамбаррикай ибарат бинедал эцигнава, адан пипӀен Къван Иса Месигь я. 21Къвез-къвез эцигзавай ва Реббидин пак ибадатханадиз элкъвезвай вири и дарамат Месигьдал дуьм-дуьздаказ хкаж жезва. 22Квекайни Аллагьди Вичин Руьгьдалди уьмуьр тухудай кӀвал хьун патал, куьн Месигьдиз талукь тирвиляй, куьнни и дараматдин цлара эцигзавай къванер хьиз я.

Currently Selected:

Эфесвийриз 2: ЛезПК

Highlight

Copy