Каласвийриз 4

1Агъаяр, куь лукӀарив гьахъ-михьивал гваз ва лайихдаказ, квехъ цаварал Агъа авайди рикӀел хвена, эгечӀа.

Эхиримжи несигьатар ва саламар

2ДатӀана дуьаяр ая. Дуьа ийидайла, уях хьухь ва Аллагьдиз шукур гъваш. 3Зун исятда гьа Месигь себеб яз къазаматда ава. Аллагьди чи хабардиз рак ахъаюн патал, Месигьдин сирдикай хабарар гун патал чи гьакъиндайни дуьаяр ая. 4А сир инсанриз завай лазим тир саягъда ачухиз хьун патал тӀалаб ая.

5 Иман тийизвайбурухъ галаз рафтарвиле вахтуникай дуьздаказ менфят къачуз, камал къалура. 6Къуй куь ихтилатар хуш жедайбурни кьел квайбур хьурай, квелай гьардаз герек жаваб гуз алакьрай.

7Закай квез играми стха, вафа тир къуллугъзавай, Ребби патал чӀугвазвай зегьметда зи амадаг Туьхика вири суьгьбетда. 8Чун авай гьаларикай квез чир хьун патал ва куьн кӀубан авун патал, за ам куь патав ракъурни ийизва. 9Ам куь патав чи гьакъикъи ва играми стха, куь ватанэгьли Энесим галаз къведа. Абуру ина жезвай кьван вири крарикай квез суьгьбетда.

10Захъ галаз къазаматда авай АристӀархани квез саламар лугьузва. Барнабадин имидин хва Маркани квез саламар лугьузва, за адан гьакъиндай куьн тагькимар авунай. Ам куь патав атайтӀа, ам мугьмандиз ийидай гьуьрмет хвена кьабула. 11Вичел Юст лакӀаб алай Исадини квез саламар лугьузва. Зи амадагрин арада авай-авачир чувудар гьабур я. Абуру Аллагьдин Пачагьлугъвал патал кӀвалахзава ва заз теселли гузва. 12Иса Месигьдиз къуллугъзавай гьа куь Эпафарасани квез саламар лугьузва. Аллагьдиз квевай кӀани вири кардал куьне тамамвилелди ва агъунваз амал авун патал Эпафараса датӀана вири рикӀелди куь хийирдиз дуьа ийизва. 13Ада куьн ва Ладикейдани Гьерапулда авай иманияр патал кӀевелай кӀвалахзавайдан шагьид зун я. 14Чи играми жерягь ЛукӀади ва Димаса квез саламар лугьузва. 15Ладикейда авай стхайриз, гьакӀни Нимфадиз ва адан кӀвале кӀватӀ жезвай иманийриз зи саламарни лагь.

16Квез и чар кӀелай чӀавуз ам Ладикейдиз, гьанани кӀелун патал, ракъура. Куьнени Ладикейдай квев агакьардай зи чар кӀела.

17АрхипӀаз вичел Реббиди тапшуругъ авунвай къуллугъ эхирдал кьван твах лагь.

18За, Павела, жуван гъилелди кхьизва: квез зи патай саламар. Зун бухавра авайди рикӀел хуьх. Берекат квехъ галаз хьурай.

Currently Selected:

Каласвийриз 4: ЛезПК

Highlight

Copy