Каласвийриз 3

1Гьа икӀ, квел Месигьдихъ галаз чан хканватӀа, Месигь Аллагьдин эрчӀи гъилихъай ацукьнавай цавариз талукь жез алахъа. 2Куь фикирар чилиз талукьдахъ ваъ, цавуз талукьдахъ элкъуьра. 3Куьн и дуьнья патал кьена, ва куь уьмуьр Месигьдихъ галаз санал Аллагьда чуьнуьх хьанва. 4Куь уьмуьр Месигь я, Ам дуьньядиз къалурай чӀавуз куьнни Адахъ галаз санал баркаллада аваз къалурда.

5Гьавиляй гунагькар тӀебиатдиз гьеле талукь яз жувак кумай кьван вири йикь: явавал, ахлакь тахьун, кӀеви гьевес хьунухь, абур авачир мурадар ва азгъунвал (ам бутриз икрам авунилай гъейри мад са затӀни туш). 6Ибуру вирида Аллагьдин чӀалаз килиг тийизвайбурукай Адаз хъел гъизва. 7Са чӀавуз куьнени гьа ибуралди уьмуьр тухузвай, 8амма исятда куьн патал и виридакай – хъилекай, гъазабдикай, писвиликай, агъу квай мецикай ва татугай гафар рахуникай – хилас жедай вахт алукьнава. 9Сада садаз таб мийир, гьикӀ лагьайтӀа куьне куьгьне инсандин къаматни крар жувалай алуднава. 10Куьне халисан чирвилив цӀийи хъувунвай ва Халикьдин Вичин къамат язвай цӀийи инсандин тӀебиат либас хьиз алукӀнава. 11Гила мад я юнан, я чувуд, я суьннет авунвайди, я суьннет тавунвайди, я вагьшиди, я скӀуьф, я лукӀ, я азадди амач. Амма вири ва вирида авайди Месигь я.

12Гьавиляй, Аллагьди хкянавай Вичиз талукьбур ва кӀанибур яз, куьне жувал чарадан рикӀикай хабар кьун, дугъривал, умунвал, инсанрихъ галаз рахунра хъуьтуьлвал, сабур либас хьиз алукӀа. 13Сад садахъ галаз сабур гваз хьухь, куьне садакай садаз хьайи рикӀин тӀарвилерилай гъил къахчу. АкӀ гъил къахчу хьи, Реббиди квелай къахчурвал. 14Ва и виридал алава яз, тамам садвиле кӀватӀзавай муьгьуьббатни эхциг.

15Къуй куь рикӀериз регьбервал Месигьдин ислягьвили авурай, вучиз лагьайтӀа куьн са Бедендин паяр я ва квез а ислягьвал тайинарнава. Квехъ шукур авайди къалура. 16Къуй Месигьдикай тир гаф вичин вири девлетдалди квехъ галаз санал хьурай. Сада садаз гьар жуьредин камалдалди чирвал ва несигьатар це, ва, шукурвал къалуриз, куь рикӀера Аллагьдиз забурар, тарифдин ва руьгьани манияр лагь. 17Куьне вуч ийиз ва вуч лугьуз хьайитӀани, Ребби Исадин ТӀварцӀин гьуьрметдай ая, Адалди Аллагь Бубадиз шукур гъваш.

Иманийрин хизан

(Эфесвийриз 5:22–6:4)

18Папар, Реббидиз кӀани саягъда куь итимриз муьтӀуьгъ хьухь.

19Гъуьлер, куь папар кӀан хьухь ва абурухъ галаз векъи жемир.

20Аялар, вири крара куь диде-бубадин чӀалаз килиг, вучиз лагьайтӀа Реббидиз и кар хуш я.

21Бубаяр, куь аялар ажуз хьана тамукьдайвал, абурук ктадмир.

ЛукӀаринни абурун иесийрин алакъаяр

(Эфесвийриз 6:5-9)

22ЛукӀар, вири крара и чилел куь иесийриз табий хьухь. Им инсанар рази авун паталди вилиз хъсан аквадай краралди ваъ, рикӀин къеняй, Аллагьдихъай кичӀе яз гьа икӀ ая. 23Куьне вуч ийиз хьайитӀани, вири рикӀелди ая, куьне ам инсанар патал ваъ, Ребби патал ийизвай хьиз ая. 24ГьикӀ лагьайтӀа Реббидин патай квез ирс савкьват яз гудай чӀал квез чизва. Куьне Месигьдиз къуллугъзава. 25Масадаз зиян гузвайдаз вичизни зиян гуда. Аллагьдиз сад муькуьдалай вине кьун хас туш.

Currently Selected:

Каласвийриз 3: ЛезПК

Highlight

Copy