1-Саланиквийриз 1

Саламар

1Павелан, Силаван ва ТӀиматӀеян патай – Аллагь Бубадиз ва Ребби Иса Месигьдиз талукь яз Саланикда авай иманийрин кӀватӀалдиз.

Берекатар ва саламатвал хьурай квез!

Саланикда авай иманийрин кӀватӀалди чешне къалурун

2-3Куьн ва куь имандин крар, куьне муьгьуьббатдивди кьилиз акъудзавай регьят тушир кӀвалах, чи Ребби Иса Месигьдихъ умуд кваз квехъ авай сабур датӀана жуван дуьайра чи Буба тир Аллагьдин вилик рикӀел хкиз, чна куь виридан паталай гьар чӀавуз Аллагьдиз шукур гъизва.

4Аллагьдиз куьн кӀанзава, стхаяр-вахар, ва чаз Ада куьн хкянавайди чизва! 5Чи Шад Хабар куь патав тек са гафар яз ваъ, гьакӀни Пак Руьгьдин къуват яз, адан гьакъикъивилихъ акьалтӀай иман яз атана. Квехъ галайла, чун куьн паталди гьихьтинбур тиртӀани, квез чизва. 6Куьне чалайни Реббидилай чешне къачуз хьана ва, чӀехи азабриз килиг тавуна, Месигьдикай лагьанвай гаф квез Пак Руьгьди гайи шадвилелди кьабулна. 7ГьакӀ тирвиляй квекай МакӀеданда ва Ахайда авай иманияр патал чешне хьана, 8гьа и саягъда Реббидин Гаф квелай тек са МакӀеданда ва Ахайда чкӀанач, Аллагьдихъ чи иман авайвиликай хабар виринриз хьана. Чаз гьич са гафни лугьунин гереквал авач. 9-10Вучиз лагьайтӀа куьне чун гьикӀ кьабулнатӀа ва куьне гьикӀ бутар гадарнатӀа ва чан алай, халисан Аллагьдихъ куьн гьикӀ элкъвенатӀа, чаз масадбуру ахъайзава. Куьне гила Аллагьдиз гьикӀ къуллугъ ийизватӀа ва Адан Хва Иса Месигь цаварилай къведайвал гьикӀ куьне вилив хуьзватӀа, чаз ван хьана. Кьейидалай кьулухъ Аллагьди Вичи чан хкай Иса Месигьди чун къвердавай чаз мукьвал жезвай Аллагьдин хъилекай хкудда.

Currently Selected:

1-Саланиквийриз 1: ЛезПК

Highlight

Copy