2-Каринфвийриз 3

Сифтегьан ва цӀийи Икьрар

1Чун мад чи тарифар ийиз эгечӀзавайди хьиз яни? Амма куьн паталди ва я куь патай меслятдин чарар, масадбуруз абур герекзавай хьиз, чаз герек яни? 2Ваъ, чи чар куьн я: чи рикӀера кхьенвай, виридаз малум тир ва вирида кӀелзавай чар я. 3Виридаз куьн Месигьдин чар тирди аквазва: ам чи къуллугъдин нетижада девитдалди ваъ, Аллагьдин чан алай Руьгьдалди, вични чархун къванерал ваъ, инсанрин рикӀера кхьенвай чар я.

4Аллагьдин вилик ихьтин агъунвайвал чаз Месигьди гузва. 5Ам хьунухь чахъ кьетӀен са вуч ятӀани, са агалкьун авайвиляй туш; чи алакьунар анжах са Аллагьдивай я. 6Ада чаз цӀийи Икьрардиз къуллугъзавайбур жедай алакьун гана. И Икьрар гъилив кхьенвай Къанун туш, ваъ, амма ам Руьгьдилай атанва. ГьикӀ лагьайтӀа Къанундин гьарфуни рекьизва, амма Руьгьди уьмуьр гузва.

7 Мусадиз ганвай къуллугъ гьарфар яз къванцел атӀанвай Къанундиз къуллугъ авуникай ибарат тир. Ам ахьтин машгьурвиле аваз арадал гъанай хьи, исраилвийривай Мусадин нур гузвай чиниз, а экуьвал яргъалди амукьдайди туширтӀани, килигиз жезвачир. Нетижада ажал гъайи и къуллугъ ахьтин машгьурвиле аваз атанатӀа, 8бес Руьгьди ийидай къуллугъ генани баркалла алайди жедачни? 9Инсандик тахсир кутазвай къуллугъ ахьтин машгьурвиле хьанатӀа, бес инсан гьахъ-михьивилиз акъудзавай къуллугъдиз гьихьтин чӀехи машгьурвал гузва! 10РикӀивайни, а чӀавуз машгьурвиле хьайиди, лап гзаф чӀехи баркалладив гекъигайла, гьич машгьурди туш. 11Вахтуналди тирди машгьурвиле хьанатӀа, бес даимди гьихьтин чӀехи машгьурвиле жеда!

12Гьа икӀ чахъ авай умуд акьван чӀехи я хьи, чун ада викӀегьарзава. 13Исраилвийри хкахьдай а машгьурвилиз килиг тавун патал Мусади авурвал, чна чи чинар кӀевзавач. 14Амма абурун акьул кӀеви яз ама, вучиз лагьайтӀа икьван чӀавалди, абуру Сифтегьан Икьрардин каламар кӀелдайла, а шаршав алуд тавуна тазва, ва и Икьрар Месигь атайла куьтягь хьайидан гъавурда абур акьазвач. 15Эхь, къенин йикъалди, Мусадин Къанун кӀелдайла, чувудрин рикӀер шаршавдалди кӀевнава. 16Амма Исраилдин халкь Реббидихъ элкъвезва, Ада шаршав алудзава. 17Ребби Руьгь я, Аллагьдин Руьгь авай виринра азадвал ава!

18Ахъа чинар авай чаз, гуьзгуьдай хьиз, Реббидин баркалладин парпар аквазва, ва чун дегиш жезва, Гьадаз ухшарбур жезва. Адан баркалла чак мадни чӀехи жезва, ам Реббидилай Вичелай къвезва, Ам лагьайтӀа Руьгь я!

Currently Selected:

2-Каринфвийриз 3: ЛезПК

Highlight

Copy