2-Каринфвийриз 4

ХъенчӀин къапара авай хазина

1Ингье, и къуллугъ чаз Аллагьдин мергьеметди ганваз, адакай чи рикӀ вучиз хазвачтӀа. 2Чна гьи жуьредин хьайитӀани гьарамзада, чпел амал авуникай регъуь ийидай къайдаяр инкар ийизва, чна садни алцурарзавач ва Аллагьдин Гаф масакӀа дегишарзавач. Аксина, чна Аллагьдин вилик ачухдаказ гьакъикъатдикай хабар гузва, къуй гьар са касди вичин виждандалди Аллагьдин вилик чакай вичин фикирни лугьурай. 3Чна Вичикай муштулух гузвай Шад Хабардин гъавурда са вуж ятӀани акьазватӀа, Ам анжах кьиникьихъ физвайбур патал гьахьтинди я. 4Абур чпин акьулар и дуьньяда аллагьвал ийизвай иблисди, абуруз Вич Аллагьдин къамат тир Месигьдин баркалладикай Шад Хабардин экв такурай ва абуруз иман тахьурай лагьана, буьркьуь авунва. 5Чна чакай ваъ, Иса Месигьдикай Реббидикай хьиз хабар гузва. Чун лагьайтӀа Исадин гьуьрметдай куь лукӀар я. 6«Къуй мичӀивиле экв куькӀуьрай»#Хьунухь 1:3. лагьай Аллагь Вич Экв я, Иса Месигьдин чинай аквазвай Аллагьдин баркалладикай чаз чирвал гуз, чи рикӀера куькӀвенвай Экв я.

7Амма и зурба къуват чи патай ваъ, Аллагьдилай тирди къалурун патал и багьа хазина чна хъенчӀин къапара – чи беденра – аваз тухузва. 8Гьар жуьредин четинвилери чун вири патарихъай чуькьуьзва, амма чун ажуз хьанвач; чун чара атӀудай гьалара ава, амма чи чара атӀанвач; 9чи геле къекъвезва, амма чун Аллагьди гадарнавач; чун кӀевидаказ гатанва, амма чун кьенвач. 10Чи беденда аваз чна датӀана Исадин кьиникь тухузва, чай Гьадан уьмуьрни къалурун паталди. 11Чал чан алама, чун Исадиз килигна ажалдин хурук кутазва; ажал галай чи беденрай Исадин уьмуьр къалурун патал чун ажалдин вилик чин чинал акъвазнава. 12Чак ажалдин гьерекат ква, квек – уьмуьрдин.

13«Зун имандал алай, гьавиляй за лугьузвай»#Забур 115:1. кхьенвай Каламда. Чахъ гьахьтин имандин Руьгь авайвиляй, чнани иман ийизва ва гьавиляй Шад Хабардикай лугьузва. 14Ребби Месигьдал чан Хкайда Иса Месигьдиз талукь тир чални чан хкида ва куь патавай чунни акъвазардайди чаз чизва. 15Им вири куь хийирдиз я, Аллагьдин машгьурвилиз ийизвай шукурар мад ва мад гзаф инсанрив агакьзавай берекатди алахьна фидайвал авун паталди я.

Цаварик умуд кутуна уьмуьр тухун

16Гьавиляй руьгьдай аватзавач, амма чи бедендин къуватар кьери жезватӀани, къенепатай чун югъ-къандавай цӀийи жезва, 17вучиз лагьайтӀа чи кьезил ва вахтуналди тир азабар, абуру чал гъизвай чӀехи ва эбеди баркалладив гекъигайла, са затӀни туш. 18Чун чаз аквазвайдаз ваъ, таквазвайдаз килигзава, вучиз лагьайтӀа аквазвайди – вахтуналди, таквазвайди эбеди я.

Currently Selected:

2-Каринфвийриз 4: ЛезПК

Highlight

Copy