1-Ягья 4

Гьакъикъатдин Руьгь ва тапан руьгь

1КӀанибур, гьар са руьгьдин чӀалахъ жемир, руьгьер Аллагьдин патай ятӀа-туштӀа чир хьун патал, абур синагъдай акъуда, вучиз лагьайтӀа дуьньядал гзаф тапан пайгъамбарар арадал атанва. 2Аллагьдин Руьгь квевай икӀ чириз жеда: Иса Месигь инсандин беденда аваз атанвайди тестикьарзавай Руьгь Аллагьдин патай я. 3Амма Иса кьабул тийизвай руьгь Аллагьдин патай туш. Ам Месигьдиз акси касдин руьгь я. Ам къведайди квез ван хьанвай, гила ам атана, дуьньяда ава. 4Чан балаяр, куьн Аллагьдин патай я, ва куьн тапан пайгъамбаррал гъалиб хьанва. Вучиз лагьайтӀа, квехъ Авайди дуьньяда авайдалай артух я. 5Абур и дуьньядай я ва гьавиляй дуьньяда рахазвай хьиз рахазва ва дуьньяди абуруз яб гузва. 6Чун Аллагьдин патай я. Аллагь чизвайда чаз яб гузва, Аллагьдин патай туширда чаз яб гузвач. Гьакъикъатдин Руьгь ва тапан руьгь чаз гьа и жуьре чир жезва.

Аллагь – муьгьуьббат я

7Эй кӀанибур, ша чаз садаз-сад кӀан жен, вучиз лагьайтӀа, муьгьуьббат Аллагьдин патай я. Нин рикӀе ашкъи аватӀа, Аллагь ам паталди Буба я ва адаз Аллагь чизва. 8РикӀе ашкъи авачир касдиз Аллагь чизвач, вучиз лагьайтӀа, Аллагь муьгьуьббат я! 9Аллагьди вичин рикӀе чаз авай кӀанивал икӀ малумарна: чна Вичихъ авай тек са Хцин куьмекдалди цӀийи уьмуьр къачун патал, Аллагьди Ам дуьньядиз ракъурна. 10Муьгьуьббат чаз Аллагь кӀан хьуникай ваъ, Адаз чун кӀан хьуникай ва Ада Вичин Хва чи гунагьар михьун паталди къурбанд авуникай ибарат я.

11Эй кӀанибур, Аллагьдиз чун гьикӀ кӀанзаватӀа, чазни садаз-сад гьакӀ кӀан хьун герек я. 12Аллагь гьич садазни са чӀавузни акунвач. Чаз садаз-сад кӀан хьайитӀа, Аллагь ча амукьда ва Адан муьгьуьббат ча камил жеда. 13Чун Ада, Амни ча амукьзавайди Ада чаз Вичин Руьгьдикай гуналди чаз чида. 14Чаз жуваз акуна, чна шагьидвал ийизва хьи, Бубади Хва дуьньядин Хиласкар яз ракъурна. 15Ни Иса Аллагьдин Хва яз кьабулзаватӀа, Аллагь гьада жеда, амни – Аллагьда. 16Чаз Аллагьдиз чун кӀанзавайди чир хьанва ва чун и кардин чӀалахъ хьанва. Аллагь муьгьуьббат я. Вуж муьгьуьббатда амукьайтӀа, гьам Аллагьда амукьзава, Аллагьни – гьада. 17Къияматдин юкъуз чахъ жуьрэт хьун патал чи муьгьуьббат камил хьана. Вучиз лагьайтӀа, Месигь гьикӀ ятӀа, чунни и дуьньяда гьакӀ я. 18Муьгьуьббатда кичӀевал авайди туш, аксина, камил муьгьуьббатди кичӀевал чукурда. Куьз лагьайтӀа, кичӀевал жазадиз талукь я, кичӀедай инсан вичин муьгьуьббатда камил туш. 19Чаз кӀанзава, вучиз лагьайтӀа сифте Адаз чун кӀан хьана. 20Ни «заз Аллагь кӀанзава» лугьуз, амма вичин стхадиз нифретзаватӀа, гьам тапрукь я. Вучиз лагьайтӀа, вилиз аквазвай стха кӀан тийизвайдаз, вилиз таквазвай Аллагьни кӀан жедач. 21Чна адавай къачур тагьким ихьтинди я: «Аллагь кӀанзавайдаз вичин стхани кӀан хьурай».

Currently Selected:

1-Ягья 4: ЛезПК

Highlight

Copy