1-Ягья 5

Дуьньядин винел гъалибвал

1 Иса Месигь тирдан чӀалахъ тир гьар са кас Аллагьдин патай я. Буба кӀанзавай касдиз Адан патай тирбурни кӀан жедайди я. 2Ингье, Аллагьдин веледар чаз гьикӀ кӀанзаватӀа, Аллагь гьакӀ кӀан хьана, чна адан тагькимар кьилиз акъудунилай чир жезва. 3ГьикӀ лагьайтӀа, Аллагьдиз муьгьуьббат чна Адан тагькимар кьилиз акъудуникай ибарат я ва адан тагькимар четинбур туш. 4Вучиз лагьайтӀа, Аллагьдин патай тир гьар сад дуьньядин винел гъалиб жезвайди я. Чав дуьньядин винел гъалибвал къачуз тазвайди чи иман я. 5Дуьньядин винел гъалиб жезвайди вуж я? Гьелбетда, Иса Аллагьдин Хва тирдахъ чӀалахъди!

Вичин Хцикай Аллагьдин шагьидвал

6Иса Месигь цихъ ва ивидихъ галаз санал атана. Ам тек са цихъ галаз ваъ, цихъни ивидихъ галаз санал атана. И кардин шагьидвалзавайди Руьгь я, вучиз лагьайтӀа, Руьгь гьакъикъат я. 7Эхь, пуд шагьид ава: 8Руьгь, яд ва иви. Абуру вирида са кардин патахъай шагьидвалзава. 9Чна инсанрин шагьидвал кьабулзаватӀа, Аллагьдин шагьидвал адалай артух я, ва ам Аллагьдин шагьидвал я: Ада вичин Хцин гьакъиндай шагьидвал авунва. 10Аллагьдин Хцел иман гъайи касдихъ вичихъ шагьидвал ава. Амма Аллагьдин чӀалахъ туширда, Ам тапрукь хьиз гьисабда. Вучиз лагьайтӀа, ахьтин кас Аллагьди вичин Хцин гьакъиндай авур шагьидвилин чӀалахъ туш. 11И шагьидвал адакай ибарат я хьи, Аллагьди чаз эбеди уьмуьр ганва ва и уьмуьр чна Адан Хва арада аваз къачунва. 12Нихъ Хва аватӀа, гьадахъ уьмуьр ава, нихъ Хва авачтӀа, адахъ уьмуьр авач.

Эхиримжи къейдер

13Ибур за квез, Аллагьдин Хцин ТӀварцел иман гъайибуруз, кхьена хьи, квез эбеди уьмуьр ганвайди чир жедайвал. 14Чун Аллагьдин патав гьавиляй умуд кваз къвезва хьи, чаз чизва, чна Адаз кӀандайвал авуна, Адавай са затӀ тӀалаб авуртӀа, Ада чи мурад кьилиз акъудда. 15Чаз чна Адавай вуч тавакъу авуртӀани, Ада чаз яб гудайди чизватӀа, чаз гьакӀни чна Адавай тӀалабай затӀар вири Ада чаз гудайди чизва.

16Квез, куь стхади кьиникьдал тухун тийир гунагь ийиз акуртӀа, куьне гьа стхадин паталай дуьа ая, ва Аллагьди адаз уьмуьр гуда. Зун инал чпин гунагьри кьиникьдихъ тухун тийизвайбурукай рахазва. Кьиникьдихъ тухузвай гунагьни ава, ва за квез ахьтин гунагькардин паталай дуьаяр ая лугьузвач. 17Гьар са нагьахъ кӀвалах гунагь я, амма вири гунагьри чпин гуьгъуьна аваз ажал гъизвач.

18Чаз чизва хьи, Аллагьдин патай тирда гунагь ийидач. Ада вичи-вич хуьда ва шийирдивай адав агатиз жедач. 19Чаз чизва хьи, чун Аллагьдин веледар я, амма вири дуьнья шийирдин гьукумдик ква. 20Чаз а карни чизва хьи, Аллагьдин Хва атанва, халисанди тир Аллагь чир хьун патал Ада чаз акьул-камал ганва. Чун Халис Тирдаз, Адан Хва Иса Месигьдиз талукь я. Ам халисан Аллагь ва эбеди Уьмуьр я.

21Чан балаяр, куьне куьн тапан аллагьрикай хуьх!

Currently Selected:

1-Ягья 5: ЛезПК

Highlight

Copy