1-Ягья 3

1Килиг Бубади чаз гьихьтин муьгьуьббат къалурнаватӀа: чаз Аллагьдин веледар лугьузва! РикӀивайни чун Адан веледар я! Чаз Ам чизвачирвиляй, дуьньядизни чун чизвач. 2Эй кӀанибур, гила чун Аллагьдин веледар я, амма чун вужар жедатӀа, гьеле малум туш. Чаз чизва хьи, Ам атай чӀавуз чунни Ам хьиз жеда, вучиз лагьайтӀа, а чӀавуз чаз Ам гьакъикъатда авайвал аквада. 3Адак ихьтин умуд кутазвай гьар сада вични Ам хьиз михьи ийизва. 4Гунагь ийизвай гьар сада къанунар чӀурзава, вучиз лагьайтӀа, гунагь авун къанунар чӀурун я. 5Квез чизва, Месигь чалай гунагьар алудун патал атанвайди я. Адахъ гунагьар авайди туш. 6Адаз талукь яз амукьай гьар вуж хьайитӀани, а касди мад гунагьар хъийидайди туш. Гунагьар ийизвай касдиз я Ам акунвач, я Ам чизвач.

7Чан балаяр, къуй садани куьн алцурар тавурай. Гьахъ-михьи кар ийизвайди, Месигь хьиз, гьахъ-михьи я. 8Гунагьар ийизвайди иблисдин патай я, вучиз лагьайтӀа иблисди дуьнья арадал атай сифтегьан йикъалай гунагь ийизва. Аллагьдин Хва иблисдин крар чӀурун паталди атана. 9Аллагьдин патай тир гьар ни хьайитӀани гунагьар ийидайди туш, вучиз лагьайтӀа, ам Аллагьдилай я. Ада гунагьар авун мумкин туш, вучиз лагьайтӀа ам Аллагьдин велед я.

10Вуж Аллагьдин велед, вуж иблисдин велед ятӀа, гьа и кардай чир жеда: гьахъ-михьи кӀвалахар тийизвай ва гьакӀни вичин стха кӀан тийизвай гьар сад Аллагьдин патай туш.

Садаз-сад кӀан хьун

11Ингье гьеле эвелдай квез ван хьайи хабар гьа им я: чаз садаз-сад кӀан жен. 12Шийирдин пата авай, вичин стха яна кьейи Къабил хьиз тежен. Ада вичин стха вучиз кьена? Вучиз лагьайтӀа, адан кӀвалахар нагьахъ, стхадин кӀвалахар гьахъ-михьибур тир. 13Дуьньядиз куьн такӀанзаватӀа, мягьтел жемир, стхаяр-вахар. 14Чи стхаяр кӀанзавайвиляй, чаз чизва хьи, чун кьиникьдай уьмуьрдиз атанва. Низ кӀанзавачтӀа, ам ажалдин гьукумдик кума. 15Вичин стха-вах такӀанзавай гьар са кас ивикъич#3:15 Ивикъич – инсан яна кьейи кас. я. Квез чизвайвал, гьич са ивикъичдизни вичихъ авай эбеди уьмуьр несиб жезвайди туш. 16Муьгьуьббат вуч ятӀа, Месигьди Вичин чан чун паталди гайила, чаз чир хьанва. Чнани чи чан чи стхаяр-вахар паталди гун герек я. 17Са кас дуьньядин мал-девлетдин иеси яз, адаз вичин стха-вах муьгьтежвиле аваз акуна, адан язух къвезвачтӀа, Аллагьдин муьгьуьббат адан рикӀе гьикӀ амукьун мумкин я? 18Чан балаяр, гафаралди ва мецелди ваъ, рикӀин сидкьидай ва чи краралди чаз Аллагь кӀан жен. 19-20Гьа идалди чаз чун гьакъикъатдай тирди чир жеда ва, рикӀи чак тахсир кваз гьисабзаватӀа, Аллагьдин вилик чавай ам секинариз жеда, вучиз лагьайтӀа, Аллагь чи рикӀелай вине ава ва Адаз гьар са затӀ чизва.

21КӀанибур, рикӀи чак тахсир кваз гьисабзавачтӀа, чавай жуьрэтдалди Аллагьдин вилик къвез жеда. 22Чна адавай вуч тавакъу авуртӀани, Ада чаз гузва. Вучиз лагьайтӀа, чна адан тагькимар кьилиз акъудзава ва адаз хуш тир крар ийизва. 23Адан тагьким ам я хьи, чна Адан Хва Иса Месигьдин ТӀварцӀел иман гъин ва Ада чаз тагьким авурвал, чаз садаз-сад кӀан жен. 24Адан тагькимар кьилиз акъудзавай кас Аллагьдиз талукь яз, Аллагьни гьадаз талукь яз амукьда. Ам чахъ амукьзавайди ада чаз гайи Руьгьдин куьмекдалди чир жезва чаз.

Currently Selected:

1-Ягья 3: ЛезПК

Highlight

Copy