MGA SALMO 33
33
Pagdayaw sa Manunuga kag Manugtipig
1Magkasadya sa Ginoo, O kamo nga mga matarung!
Ang pagdayaw matahum sa mga matadlong.
2Magpasalamat sa Ginoo sa arpa,
amba sing mga pagdayaw sa iya sa salterio nga may napulo ka cuerdas!
3Amba kamo sa iya sa bag-ong ambahanon,
magkuskus sing sinampaton, nga matonog.
4Kay ang polong sang Ginoo matarung;
kag ang bug-os niyang binuhatan nahimo sa katutum.
5Sia nagahigugma sang pagkamatarung kag katarungan;
ang duta puno sang malig-on nga paghigugma sang Ginoo.
6Tungud sa polong sang Ginoo nahimo ang kalangitan,
kag ang bug-os nga kasoldadosan nila paagi sa ginhawa sang iya baba.
7Ginatipon niya sing tingub subong sang tinumpok ang mga tubig sang dagat;
ang kadadalman ginapahamtang niya sa mga balay nga suluptan.
8Magkahadluk sa Ginoo ang bug-os nga duta,
magtahud sa iya ang tanan nga pumuluyo sang kalibutan!
9Kay nagpamolong sia, kag ini nahimo;
nagsogo sia, kag ini naglig-on.
10Ang Ginoo nagalaglag sang laygay sang mga pungsud;
ginawala niya ang mga hunahuna sang mga katawohan.
11Ang laygay sang Ginoo nagapadayon sing malig-on sa gihapon,
ang mga painoino sang iya tagiposoon sa tanan nga kaliwatan.
12Bulahan ang pungsud nga ang iya Dios ang Ginoo,
ang katawohan nga iya ginpili nga iya palanublion nga kaugalingon!
13Gikan sa langit nagatamud ang Ginoo,
ginatan-aw niya ang tanan nga anak sang mga tawo;
14gikan sa duug sang iya puluy-an nagatamud sia
sa tanan nga pamuluyo sang duta,
15sia nga nagahuman sang mga tagiposoon nila nga tanan,
nga nagapatugsiling sang tanan nila nga binuhatan.
16Wala sing hari nga naluwas sang kadam-an sang kasoldadosan;
ang gamhanan nga tawo wala maluwas paagi sa daku nga kusug.
17Ang kabayo walay pulus nga butang nga kalig-onan,
kag wala sing ginaluwas bisan sin-o paagi sa iya daku nga gahum.
18Yari karon, ang mata sang Ginoo yara sa ibabaw sang mga nagakahadluk sa iya,
sa mga nagalaum sa iya malig-on nga paghigugma,
19sa pagluwas sang ila mga kalag sa kamatayon,
kag sa pagbuhi sa ila sa tiggulutum.
20Ang amon kalag naghulat sa Ginoo;
sia amon kabulig kag amon taming.
21Kay sa iya nagakasadya ang amon tagiposoon,
bangud nga nagsalig kami sa iya balaan nga ngalan.
22O Ginoo, magmanginyari sa amon ang imo malig-on nga paghigugma,
sono sa amon paglaum sa imo.
Currently Selected:
MGA SALMO 33: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
