MGA SALMO 31
31
Ang Pagpakita sang Pagsalig
Sa pangolong manuglanton. Salmo ni David.
1Sa imo, O Ginoo, nagadangup ako; dili ako pagpakahuy-i;
luwasa ako sa imo pagkamatarung!
2Ilingig sa akon ang imo idulungug,
luwasa ako sing madali!
Magmabakud ka nga igang sa akon,
balay sang kabakuran sa pagluwas sa akon!
3Kay ikaw amo ang akon igang kag akon kuta;
tungud sa imo ngalan ubayi ako kag tuytuyi ako,
4palusa ako sa pukot nga ginladlad nila sing tago nga sa akon,
kay ikaw akon pamakud.
5Sa imo kamut ginatugyan ko ang akon espiritu;#Luc. 23:46.
ikaw ang nagtubus sa akon, O Ginoo, ikaw nga Dios sang kamatooran.
6Ginadumtan ko ang mga nagasapak sang binutig nga mga kadayawan;
apang sa Ginoo nagasalig ako.
7Magakasadya ako kag magakalipay sa imo malig-on nga paghigugma,
kay nakita mo ang akon kapipit-an,
nakilala mo ang akon kalag sa kalalat-an,
8kag wala mo ako pag-itugyan sa kamut sang kaaway;
ginpahamtang mo ang akon mga tiil sa duug nga malapad.
9Kalooyi ako, O Ginoo, kay yari ako sa kalisdanan;
ang akon mga mata nagapalanghuyus sa kalisud,
ang akon kalag kag ang akon lawas man.
10Kay ang akon kabuhi nagahagas sa kasubo,
kag ang akon mga tuig sa panghayhay;
ang akon kusug nagakadula bangud sang akon kalautan,
kag ang akon mga tul-an nagakamudmud.
11Bangud sang tanan kong kasumpung nanginkahuluy-an ako,
sa akon mga kaingud sing lakas gid,
kahadlukan sa akon mga kilala;
ang mga nakakita sa akon sa gowa nagapalagyo gikan sa akon.
12Ginakalimtan ako sa hunahuna subong sang patay nga tawo;
kaangay ako sang suludlan nga boong.
13Kay nakabati ako sang pagpasipala sang kadam-an—
kakugmat sa tagsa ka luyo!—
samtang nagahimbon sila sing tingub batok sa akon,
nagpadugi sila sa pagkuha sang akon kabuhi.
14Apang ako nagsalig sa imo, O Ginoo,
nagsiling ako, “Ikaw amo ang akon Dios.”
15Ang akon mga tion yara sa imo kamut;
luwasa ako sa kamut sang akon mga kaaway kag sa mga nagahingabut sa akon!
16Padilaga ang imo nawung sa imo alagad;
luwasa ako sa imo malig-on nga paghigugma!
17Dili ako pagpakahuy-i, O Ginoo,
kay nagpanawag ako sa imo;
pakahuy-i ang mga malaut,
pahipusa sila sa Sheol.
18Mag-apa ang mga bibig nga butigon,
nga nagapamolong sing matigdas batok sa matarung
nga may bugal kag pagtamay.
19O daw ano kadaku sang imo pagkaayo,
nga gintigana mo sa mga nagakahadluk sa imo,
nga ginhimo mo sa mga nagadangup sa imo,
sa atubangan sang mga anak sang mga tawo!
20Sa palanagoan sang imo pagtambong tagoon mo sila
gikan sa mga pagpuhon sang tawo;
tipigan mo sila sing tago sa layanglayang
gikan sa sinuay sang mga dila.
21Pakamaayohon ang Ginoo,
kay ginpahayag niya sa akon sing makatilingala ang iya malig-on nga paghigugma
sa banwa nga malig-on.
22Nahanungud sa akon, nagsiling ako sa akon kadagmit,
“Nautud ako gikan sa atubangan sang imo mga mata.”
Walay sapayan ginpamatian mo ang tingug sang akon mga pag-ampo,
sang ako nagtuaw sa imo.
23Higugmaa ninyo ang Ginoo, tanan kamo nga balaan niya!
Ang mga matutum ginatipigan sang Ginoo,
kag nagabalus sing bugana sa nagahisayo sing binugalon.
24Magpakabakud, kag magpakaisug ang inyo tagiposoon,
tanan kamo nga nagalaum sa Ginoo!
Currently Selected:
MGA SALMO 31: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
