MGA SALMO 28
28
Pangamuyo nga Buligan kag ang Pagdayaw bangud sang Pagsabat Sini
Salmo ni David.
1Sa imo, O Ginoo, magapanawag ako;
igang nakon, dili ka magpabungul sa akon,
basi nga, kon maghipus ka sa akon,
manginkaangay ako sa mga nagapanaug sa Boho.
2Pamatii ang tingug sang akon mga pag-ampo,
kon magtuaw ako sa imo,
kon bayawon ko ang akon mga kamut
nayon sa imo balaan nga santuario.
3Dili ako pagsagnuya upud sang mga malauton,
upud sang mga manughikot sang kalautan,
nga nagapamolong sing paghidait sa ila mga isigkatawo,
apang ang daut yara sa ila mga tagiposoon.
4Hatagi sila sono sa ila binuhatan,#Bug. 22:12.
kag sono sa pagkamalaut sang ila mga ginahimo;
hatagi sila sono sa pagpanghikot sang ila mga kamut;
hatagi sila sang nagakaigo sa ila.
5Bangud nga wala nila ginasapaka ang mga binuhatan sang Ginoo,
ukon ang mga pagpanghikot sang iya mga kamut,
gub-on niya sila kag dili sila pagpatindugon.
6Pagpakamaayohon ang Ginoo!
Bangud nga ginpamatian niya ang tingug sang akon pag-ampo.
7Ang Ginoo kusug nakon kag taming nakon;
ang akon tagiposoon nagsalig sa iya, kag nabuligan ako;
busa nagakasadya sing daku ang akon tagiposoon,
kag sa akon ambahanon dayawon ko sia.
8Ang Ginoo ila kusug,
sia kuta sang kaluwasan sa iya hinaplas.
9Luwasa ang imo katawohan, kag pakamaayoha ang imo panublion;
magmanugpahalab ka nila, kag pas-ana sila sa gihapon.
Currently Selected:
MGA SALMO 28: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
