MGA SALMO 25
25
Pangamuyo nga Pagtuytuyan, Pagpatawaron, kag Pag-apinan
Salmo ni David.
1Sa imo, O Ginoo, ginabayaw ko ang akon kalag.
2O Dios ko, sa imo nagsalig ako,
dili ako pagpakahuy-i;
dili pagpadag-a sa akon ang mga kaaway nakon.
3Hoo, wala sing bisan sin-o nga nagahulat sa imo nga pakahuy-an;
pakahuy-an sila nga nagaluib sa wala sing kabangdanan.
4Ipakita sa akon ang imo mga dalanon, O Ginoo;
tudloi ako sang imo mga banas.
5Tuytuyi ako sa imo kamatooran, kag tudloi ako,
kay ikaw amo ang Dios sang akon kaluwasan;
sa imo nagahulat ako sa bug-os nga adlaw.
6Dumduma, O Ginoo, ang imo mahinoklogon nga mga kalooy kag ang imo malig-on nga paghigugma,
kay kutub pa sila sa dumaan.
7Dili pagpanumduma ang mga sala sang akon pagkapamatan-on, ukon ang akon mga paglalis;
sono sa imo malig-on nga paghigugma dumduma ako,
tungud sang imo pagkaayo, O Ginoo!
8Maayo kag matadlong ang Ginoo;
busa tudloan niya ang mga makasasala sa dalanon.
9Tuytuyan niya sa katarungan ang mga mapainubuson,
kag tudloan niya sang iya dalanon ang mga mapainubuson.
10Ang tanan nga banas sang Ginoo amo ang malig-on nga paghigugma kag kamatooran,
sa mga nagabantay sang iya katipan kag sang iya mga pagpamatuud.
11Tungud sa imo ngalan, O Ginoo,
patawara ang akon kalautan, kay daku ini.
12Sin-o bala ang tawo nga nagakahadluk sa Ginoo?
Tudloan niya sia sa dalanon nga iya pilion.
13Ang iya kalag magapuyo sa katawhayan,
kag ang iya kaliwat magapanubli sang duta.
14Ang pagpakig-abyan sang Ginoo yara sa ila nga nagakahadluk sa iya,
kag sia magapakita sa ila sang iya katipan.
15Ang akon mga mata yara gihapon nayon sa Ginoo,
kay paluson niya ang akon mga tiil sa pukot.
16Balikda ako, kag kalooyi ako;
kay mamingaw ako kag napiotan.
17Ang mga kagamo sang akon tagiposoon nagadaku,
O pagowaa ako sa akon kalisdanan.
18Talupangda ang akon kapipit-an kag ang akon kasakitan,
kag patawara ang tanan ko nga sala.
19Talupangda ang akon mga kaaway kay madamu sila,
kag ginadumtan nila ako sa mapintas nga pagdumut.
20O bantayi ang akon kalag, kag luwasa ako;
dili ako pagpakahuy-i, kay nagadangup ako sa imo.
21Ang pagkahalangdon kag ang pagkatadlong magtipig sa akon,
kay nagahulat ako sa imo.
22Tubsa ang Israel, O Dios,
gikan sa tanan niya nga kagamo.
Currently Selected:
MGA SALMO 25: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
