MGA SALMO 24
24
Ang Hari sang Himaya
Salmo ni David.
1Ang duta iya sang Ginoo kag ang iya kabug-osan,#1 Cor. 10:26.
ang kalibutan kag ang mga nagapuyo sa iya;
2kay ginpasad niya ini sa kadagatan,
kag ginpalig-on ini sa mga baha.
3Sin-o bala ang magatukad sa bakolod sang Ginoo?
Kag sin-o bala ang magatindug sa iya balaan nga duug?
4Ang may mga kamut nga matinlo kag tagiposoon nga putli,#Mat. 5:8.
nga wala magbayaw sang iya kalag sa kabutigan,
kag wala magsumpa sing malimbongon.
5Sia magabaton sing pagpakamaayo gikan sa Ginoo,
kag pagkamatarung gikan sa Dios sang iya kaluwasan.
6Amo ini ang kaliwatan sang mga nagapangita sa iya,
sang nagapangita sang nawung sang Dios ni Jacob. Sela
7Bayawa ang inyo mga olo, O mga gawang!
kag magbayaw kamo, O mga ganhaan nga dayon!
agud nga magsulud ang Hari sang himaya.
8Sin-o bala ang Hari sang himaya?
Ang Ginoo, nga makusug kag gamhanan,
ang Ginoo, nga gamhanan sa inaway!
9Bayawa ang inyo mga olo, O mga gawang!
bayawa sila, O mga ganhaan nga dayon!
agud nga magsulud ang Hari sang himaya!
10Sin-o bala ining Hari sang himaya?
Ang Ginoo sang mga kasoldadosan,
sia ang Hari sang himaya! Sela
Currently Selected:
MGA SALMO 24: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
