MGA SALMO 20
20
Pangamuyo nga Magdaug
Sa pangolong manuglanton. Salmo ni David.
1Ang Ginoo magsabat sa imo sa adlaw sang kagamo!
Ang ngalan sang Dios ni Jacob magpahamtang sa imo sa hitaas!
2Magpadala sia sa imo sing bulig gikan sa santuario,
kag magpabaskug sa imo gikan sa Sion!
3Magdumdum sia sang tanan mong halad,
kag magbaton sang imo halad-nga-sinonog! Selah
4Maghatag sia sa imo sang handum sang tagiposoon mo,
kag magtuman sang tanan mong pangabay!
5Magadaug kami sa imo kaluwasan,
kag sa ngalan sang amon Dios patindugon namon ang mga hayahay namon!
Ang Ginoo magatuman sang tanan mong pangayo!
6Karon nahibaloan ko nga ang Ginoo nagaluwas sang iya hinaplas;
magasabat sia sa iya gikan sa iya balaan nga langit
sa nagaluwas nga kusug sang iya too nga kamut.
7Ang iban nagasalig sa mga kangga, kag ang iban sa mga kabayo;
apang kami magasambit sa ngalan sang Ginoo nga amon Dios.
8Sila nagaduko kag nagakapukan;
apang kami nagabangon kag nagatindug sing tadlong.
9Magluwas, O Ginoo;
ang Hari magsabat sa amon kon magpanawag kami.
Currently Selected:
MGA SALMO 20: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
