MGA SALMO 109
109
Pangabay sa Pagtimalus
Sa pangolong manuglanton. Salmo ni David.
1Dili ka maghipus, O Dios sang akon pagdayaw!
2Kay ang baba sang malauton kag ang baba sang limbong ginbuka nila batok sa akon,
nagpamolong sila sa akon sa dila nga butigon.
3Ginlikupan nila ako man sing mga polong sang dumut,
kag gin-away nila ako sa walay kabangdanan.
4Tungud sa akon gugma kasumpung ko sila,
apang nagpanugyan ako sa pangamuyo.
5Gani ginbalusan nila ako sing malaut tungud sa maayo,
kag dumut tungud sa akon gugma.
6Ibutang sa ibabaw niya ang malauton nga tawo;
magtindug ang kasumpung sa iya too.
7Kon hukman sia, maggowa sia nga malinapason;
manginsala ang iya pangamuyo!
8Maglip-ot ang iya mga adlaw;
kuhaon sang isa ang iya palangakuan!#Binu. 1:20.
9Mangin-ilo ang iya mga anak,
kag manginbalo ang iya asawa!
10Magtiyogtiyog ang iya mga anak kag magpakilimos;
magpangita sila sang ila kalan-on gikan sa ila mamingaw nga mga duug!
11Kuhaon sang malupigon ang tanan nga iya;
ang mga dumuloong mag-ati sang iya kinabudlayan.
12Magwala gid sing magmaayo sa iya;
kag walay bisan sin-o nga maawa sa iya ilong mga anak!
13Pag-utdon ang iya kaanakan;
sa masonod nga kaliwatan pagpanason ang ila ngalan!
14Pagdumdumon sang Ginoo ang kalautan sang iya mga ginikanan,
kag dili pagpanason ang sala sang iya iloy!
15Sila manginsa atubangan sang Ginoo sing dalayon;
agud nga mautud niya sa duta ang ila handumanan!
16Bangud nga wala sia magdumdum sa pagpakita sing kalolo,
kondi ginhingabut niya ang tawong kubus kag nawad-an
kag ang boong sa tagiposoon sa pagpatay sa ila.
17Ginhigugma niya ang pagpakamalaut; mag-abut ini sa iya!
Wala sia malipay sa pagpakamaayo; magmalayo ini sa iya!
18Nagpanaput sia man sang iya kaugalingon sing pagpakamalaut subong sang iya panapton,
magsulud ini sa iya kasudlan kaangay sang tubig,
kaangay sang lana sa iya mga tul-an!
19Manginsubong ini sang panapton nga iya ginasuklub,
sang wagkus nga ginawagkus niya sing dalayon!
20Amo ini ang balus gikan sa Ginoo sa akon mga kasumpung,
sa mga nagapamolong sing malaut batok sa akon kalag!
21Apang hisayo ka sa akon, O Dios nga akon Ginoo,
tungud sa imo ngalan;
bangud nga ang imo malig-on nga paghigugma maayo, luwason mo ako!
22Kay imol ako kag nawad-an,
kag ang akon tagiposoon napilasan sa sulud nakon.
23Nagataliwan ako, subong sang landong sa kahaponon;
ginatumbotumbo ako subong sang apan.
24Ang akon mga tuhud maluya tungud sa puasa;
ang akon unud nawalaan sang tambok.
25Nanginkahuluy-an man ako sa ila;
sang nakita nila ako, nagalungolungo sila sang ila olo.#Mat. 27:39; Mar. 15:29.
26Tabangi ako, O Ginoo nga akon Dios!
O luwasa ako sono sa imo malig-on nga paghigugma!
27Agud nga makilala nila nga ini kamut mo;
nga ikaw, O Ginoo, naghimo sini!
28Magpakamalaut sila, apang magpakamaayo ka!
Kon magtindug sila mahuy-an sila; apang ang imo alagad magakalipay!
29Pagpanaptan sing pagkadidungganon ang akon mga kasumpung;
magsuklub sila sang ila kaugalingon nga kahuluy-an subong nga kunup!
30Magapasalamat ako sing daku sa Ginoo sa akon baba;
magadayaw ako sa iya sa tunga sang kadam-an.
31Kay magatindug sia sa too sang nawad-an,
sa pagluwas sa iya gikan sa mga nagahukom sa iya kalag.
Currently Selected:
MGA SALMO 109: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
