MGA HULUBATON 16
16
Mga Hulubaton nahanungud sa Kabuhi kag Paggawi
1Ang mga buko sang tagiposoon iya sang tawo,
apang ang sabat sang dila nagagikan sa Ginoo.
2Ang tanan nga dalanon sang tawo matinlo sa iya kaugalingon nga mga mata,
apang ang Ginoo nagatimbang sang mga espiritu.
3Itugyan sa Ginoo ang imo mga buluhaton,
kag lig-onon ang imo mga katuyoan.
4Ang Ginoo naghimo sang tagsa ka butang tungud sa iya kaugalingon nga katuyoan,
bisan ang malauton tungud sa adlaw sang kalaut.
5Ang tagsatagsa nga bugalon sa tagiposoon kangil-aran sa Ginoo;
bisan mag-uyatay sa kamut, indi sia makaluwas sa silot.
6Tungud sa kalooy kag kamatooran ang kalautan ginatumbasan,
kag tungud sa kahadluk sa Ginoo ang tawo nagatalikod sa malaut.
7Kon ang mga dalanon sang tawo nagapahamuut sa Ginoo,
ginahimo niya bisan ang iya mga kaaway sa pagpakighidait sa iya.
8Maayo pa ang diotay nga naupdan sing pagkamatarung
sang sa daku nga mga kinitaan nga naupdan sang dikatarungan.
9Ang tagiposoon sang tawo nagapahito sang iya dalan,
apang ang Ginoo nagamando sang iya mga tikang.
10Ang diosnon nga pamolong yara sa mga bibig sang hari;
ang iya baba indi maglalis sa paghukom.
11Ang matarung nga timbangan kag mga talaksan iya sila sang Ginoo;
ang tanan nga itilimbang sang puyo iya binuhatan.
12Kangil-aran sa mga hari ang paghimo sing pagkamalaut,
kay ang trono gintukud tungud sa pagkamatarung.
13Ang mga bibig nga matarung kalipay sang mga hari,
kag ginahigugma nila ang nagapamolong sing matarung.
14Ang kasingkal sang hari subong sang mga manugbalita sang kamatayon,
apang ang maalam nga tawo magalugpay sini.
15Sa kapawa sang nawung sang hari yara ang kabuhi,
kag ang iya kahamuut subong sang gal-um sang naolihi nga ulan.
16Daw ano kaayo pa ang pagkuha sing kaalam sang sa bulawan;
ang pagkuha sing paghangup maayo pa nga pilion sang sa pilak.
17Ang dalan sang matadlong amo ang pagtalikod sa malaut;
ang nagabantay sang iya dalanon nagatipig sang iya kalag.
18Ang bugal nagauna sa kalaglagan,
kag ang palabilabihon nga espiritu nagauna sa pagkapukan.
19Maayo pa nga magmapainubuson sing espiritu upud sa imol
sang sa magbahin sang inagaw upud sa mga bugalon.
20Ang nagatalupangud sa polong makakita sing kaayohan,
kag ang bisan sin-o nga nagasalig sa Ginoo malipayon sia.
21Ang maalam sa tagiposoon tawgon nga mahalongon,
kag ang katam-is sang mga bibig nagadugang sang tinon-an.
22Ang paghangup tuburan sang kabuhi sa may iya sini,
apang ang pagtudlo sang mga buangbuang amo ang ila kabuangan.
23Ang tagiposoon sang maalam nagatudlo sang iya baba,
kag nagadugang sing tinon-an sa iya mga bibig.
24Ang matahum nga mga polong subong sang uludlan sang dugus,
matam-is sa kalag kag ikaayo sa mga tul-an.
25May dalanon nga daw matarung sa tawo,
apang ang iya katapusan mga dalanon sang kamatayon.#Hulu. 14:12.
26Ang gana sang nagapangabudlay nga tawo nagapangabudlay tungud sa iya;
kay ang iya baba nagapilit sa iya.
27Ang tawo nga wala sing pulus nagapahito sing pagtistis,
kag sa iya mga bibig may dira nga subong sang kalayo nga nagapaso.
28Ang balingag nga tawo nagapalapnag sing mga kasuayon,
kag ang palalibak nagapabulag sa mahirup nga mga abyan.
29Ang tawo nga malugus nagahaylo sang iya isigkatawo
kag nagatuytuy sa iya sa dalanon nga indi maayo.
30Ang nagapiyong sang iya mga mata nagapahito sing binalingag nga mga butang,
ang nagakium sang iya mga bibig nagapahanabu sing malaut.
31Ang ubanon nga olo amo ang purungpurung sang himaya;
makita ini sa dalanon sang pagkamatarung.
32Ang makuli sa pagpangakig maayo pa sa gamhanan,
kag ang nagagahum sang iya espiritu sang sa nagaagaw sing banwa.
33Ang papalad ginapilak sa sabak,
apang ang bug-os nga pagtigayon sini nagagikan sa Ginoo.
Currently Selected:
MGA HULUBATON 16: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
