NUMEROS 7
7
Mga Dulot nga sa Paghalad sang Halaran
1Sa adlaw nga natapus ni Moises ang pagpatindug sang kayangkayang, kag nahaplas kag napakabalaan ini lakip ang tanan niyang kasangkapan, kag nahaplas kag napakabalaan ang halaran kag ang tanan niyang gamit, 2nagdolot ang mga principe sang Israel, ang mga pangolo sang ila mga kabaranggayan, ang mga principe sang mga kabikahan, nga nagtatap sang mga naisipan, 3kag gindala nila ang ila halad sa atubangan, sang Ginoo, anum ka karo nga natabonan kag napulog duha ka baka nga lalaki, tag-isa ka karo sa duha ka principe, kag isa ka baka sa tagsatagsa; gindala nila ini sa atubangan sang kayangkayang. 4Niyan ang Ginoo nagsiling kay Moises, 5“Kuhaa ini sa ila, agud gamiton sila sa paghimo sang pag-alagdan sang layanglayang nga tiliponan, kag ihatag mo sila sa mga Levinhon, sa tagsa ka tawo sono sa iya pag-alagdan.” 6Gani ginkuha ni Moises ang mga karo kag ang mga baka, kag ginhatag sila sa mga Levinhon. 7Duha ka karo kag apat ka baka ginhatag niya sa mga anak ni Gerson, sono sa ila pag-alagdan; 8kag apat ka karo kag walo ka baka ginhatag niya sa mga anak ni Merari, sono sa ila pag-alagdan, sa idalum sang kamut ni Itamar nga anak ni Aaron nga sacerdote. 9Apang sa mga anak ni Coat wala sia sing ginhatag, bangud nga ang pag-alagdan sang santuario naigo sa ila nga ginpas-an nila sa ila mga abaga. 10Kag ang mga principe nagdolot nga sa paghalad sang halaran sa adlaw nga ginhaplas ini; kag ang mga principe nagdolot sang ila halad sa atubangan sang halaran. 11Kag ang Ginoo nagsiling kay Moises, “Magdolot sila sang ila halad, ang tagsa ka principe sa iya adlaw, tungud sa paghalad sang halaran.”
12Ang nagdolot sang iya halad sa nahauna nga adlaw amo si Naason nga anak ni Aminadab, gikan sa kabikahan ni Juda; 13kag ang iya halad isa ka pilak nga bandihado nga ang iya kabug-at isa ka gatus kag katloan ka siclo, isa ka yahong nga pilak nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 14isa ka bulawan nga luwag nga napulo ka siclo, nga puno sang incienso; 15isa ka tinday nga baka nga lalaki, isa ka carnero nga lalaki, isa ka cordero nga isa ka tuig, nga sa halad-nga-sinonog; 16isa ka lalaki sa mga kanding nga sa halad-tungud-sa-sala; 17kag tungud sa halad sang mga halad sa paghidait, duha ka baka nga lalaki, lima ka carnero nga lalaki, lima ka kanding nga lalaki, lima ka cordero nga isa ka tuig. Ini amo ang halad ni Naason nga anak ni Aminadab.
18Sa ikaduha nga adlaw si Natanael nga anak ni Zuar, principe sang Isacar, nagdolot; 19nagdolot sia nga iya halad sing isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 20isa ka bulawan nga luwag nga napulo ka siclo, nga puno sang incienso; 21isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 22isa ka lalaki sa mga kanding nga sa halad-tungud-sa-sala; 23kag nga sa halad sang mga halad-sa-paghidait, duha ka baka nga lalaki, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Natanael nga anak ni Zuar.
24Sa ikatlo nga adlaw si Eliab nga anak ni Helon, principe sang mga anak ni Zabulon: 25ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 26isa ka bulawan nga luwag nga napulo ka siclo, nga puno sang incienso; 27isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 28isa ka lalaki sa mga kanding nga sa halad-tungud-sa-sala; 29kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Eliab nga anak ni Helon.
30Sa ikap-at nga adlaw si Elizur nga anak ni Sedeur, principe sang mga anak ni Ruben: 31ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 32isa ka bulawan nga luwag nga napulo ka siclo, puno sang incenso; 33isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 34isa ka lalaki sa mga kanding nga sa halad-tungud-sa-sala; 35kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Elizur nga anak ni Sedeur.
36Sa ikalima nga adlaw si Selumiel nga anak ni Zurisadai, principe sang mga anak ni Simeon: 37ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 38isa ka bulawan nga luwag nga napulo ka siclo, puno sang incienso; 39isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 40isa ka lalaki sa mga kanding nga sa halad-tungud-sa-sala; 41kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Selumiel nga anak ni Zurisadai.
42Sa ikan-um nga adlaw si Eliasaf nga anak ni Deuel, principe sang mga anak ni Gad: 43ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka yahong nga pilak nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 44isa ka bulawan nga luwag nga napulo ka siclo, nga puno sang incienso; 45isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 46isa ka lalaki sa mga kanding nga sa halad-tungud-sa-sala; 47kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Eliasaf nga anak ni Deuel.
48Sa ikapito nga adlaw ang principe sang mga anak ni Efraim, si Elisama nga anak ni Amiud: 49ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 50isa ka bulawan nga luwag nga napulo ka siclo, puno sang incienso; 51isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 52isa ka lalaki sa mga kanding nga sa halad-tungud-sa-sala; 53kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Elisama nga anak ni Amiud.
54Sa ikawalo nga adlaw ang principe sang mga anak ni Manases, si Gamaliel nga anak ni Pedazur: 55ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 56isa ka bulawan nga luwag nga napulo ka siclo, puno sang incienso; 57isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 58isa ka lalaki sa mga kanding nga sa halad-tungud-sa-sala; 59kag nga sa halad nga sa mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Gamaliel nga anak ni Pedazur.
60Sa ikasiam nga adlaw ang principe sang mga anak ni Benjamin, si Abidan nga anak ni Gedeoni: 61ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 62isa ka bulawan nga luwag nga napulo ka siclo, puno sang incienso; 63isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 64isa ka lalaki sa mga kanding nga sa halad-tungud-sa-sala; 65kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Abidan nga anak ni Gedeoni.
66Sa ikapulo nga adlaw ang principe sang mga anak ni Dan, si Ahiezer nga anak ni Amisadai: 67ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 68isa ka bulawan nga luwag nga napulo ka siclo, puno sang incienso; 69isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 70isa ka lalaki sa mga kanding nga sa halad-tungud-sa-sala; 71kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Ahiezer nga anak ni Amisadai.
72Sa ikapulo kag isa nga adlaw ang principe sang mga anak ni Aser, si Pagiel nga anak ni Ocran: 73ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 74isa ka bulawan nga luwag nga napulo ka siclo, puno sang incienso; 75isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 76isa ka lalaki sa mga kanding nga sa halad-tungud-sa-sala; 77kag nga sa halad sang mga halad-sa-paghidait, duha ka tinday nga baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Pagiel nga anak ni Ocran.
78Sa ikapulo kag duha nga adlaw ang principe sang mga anak ni Neftali, si Ahira nga anak ni Enan: 79ang iya halad isa ka pilak nga bandihado, nga ang iya kabug-at isa ka gatus kag katloan ka siclo, isa ka pilak nga yahong nga kapitoan ka siclo, sono sa siclo sang santuario, sila nga duha puno sang harina nga mapino nga nasamoan sing lana nga sa halad-nga-kalan-on; 80isa ka bulawan nga luwag nga napulo ka siclo, puno sang incienso; 81isa ka tinday nga baka, isa ka carnero, isa ka cordero nga isa ka tuig, nga sa halad-nga-sinonog; 82isa ka lalaki sa mga kanding nga sa halad-tungud-sa-sala; 83kag nga sa halad sang mga halad-sa-paghidait, duha ka baka, lima ka carnero, lima ka kanding nga lalaki, lima ka cordero nga isa ka tuig. Ini amo ang halad ni Ahira nga anak ni Enan.
84Ini amo ang dolot sa paghalad sang halaran, sa adlaw nga ginhaplas ini, gikan sa mga principe sang Israel: napulo kag duha ka pilak nga bandihado, napulo kag duha ka pilak nga yahong, napulo kag duha ka bulawan nga luwag, 85ang tagsa ka pilak nga bandihado isa ka gatus kag katloan ka siclo kag ang tagsa ka yahong kapitoan, ang bug-os nga pilak sang mga gamit duha ka libo kag apat ka gatus ka siclo sono sa siclo sang santuario, 86ang napulo kag duha ka bulawan nga luwag, puno sang incienso, tagnapulo ka siclo sono sa siclo sang santuario, ang bug-os nga bulawan sang mga luwag isa ka gatus kag duha ka pulo ka siclo; 87ang tanan nga baka nga sa halad-nga-sinonog napulo kag duha ka tinday nga baka, napulo kag duha ka carnero, napulo kag duha ka cordero nga tag-isa ka tuig, pati ang ila mga halad-nga-kalan-on; kag napulo kag duha ka lalaki sa mga kanding nga sa halad-tungud-sa-sala; 88kag ang tanan nga baka nga sa halad sang mga halad-sa-paghidait duha ka pulo kag apat ka tinday nga baka, kan-uman ka carnero, kan-uman ka kanding nga lalaki, kan-uman ka cordero nga tag-isa ka tuig. Ini amo ang dolot sa paghalad sang halaran, sa tapus nga ginhaplas ini.
89Kag sang nagsulud si Moises sa layanglayang nga tiliponan sa pagpakighambal sa Ginoo, nabatian niya ang tingug nga nagapamolong sa iya gikan sa ibabaw sang pakilooyan nga yara sa ibabaw sang kaban sang pagpamatuud, sa ulut sang duha ka querubin; kag si Moises nagpakighambal sa iya.
Currently Selected:
NUMEROS 7: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
