NUMEROS 6
6
Ang Kasogoan tungud sa Nazareo
1Kag ang Ginoo nagsiling kay Moises, 2“Isiling sa katawohan sang Israel, Kon ang isa ka lalaki ukon babayi maghimo sing pinasahi nga saad, ang saad sang Nazareo,#6:2 Kon sayoron Isa nga napain ukon nahalad. sa pagpain sang iya kaugalingon sa Ginoo, 3magdumili sia sa alak kag sa ilimnon nga masingkal; dili sia mag-inum sang langgaw sang alak ukon langgaw sang ilimnon nga masingkal, kag dili sia mag-inum sing bisan ano nga duga sang mga uvas ukon magkaon sang mga uvas, nga lab-as ukon binulad. 4Sa tanan nga adlaw sang iya pagpain dili sia magkaon sing bisan ano nga nagagikan sa balagon nga uvas, kutub sa mga liso tubtub sa panit.
5“Sa tanan nga adlaw sang iya saad sang pagpain walay inugkiskis nga gamiton sa iya olo; tubtub nga matuman ang mga adlaw nga nagapain sia sang iya kaugalingon sa Ginoo, manginbalaan sia; palabaon niya ang nagabunghay nga bohok sang iya olo.
6“Sa tanan nga adlaw nga nagapain sia sang iya kaugalingon sa Ginoo dili sia magpalapit sa lawas nga patay. 7Dili sia magpakadimatinlo tungud sa iya amay ukon tungud sa iya iloy, tungud sa iya utud nga lalaki ukon tungud sa iya utud nga babayi, kon mapatay sila; bangud nga ang pagpain niya sa Dios yara sa iya olo. 8Sa tanan nga adlaw sang iya pagpain balaan sia sa Ginoo.
9“Kag kon ang bisan sin-o nga tawo mapatay sing hinali sa luyo niya, kag madagtaan niya ang olo sang iya pagpain, niyan sa adlaw sang iya pagpaninlo kiskisan niya ang iya olo; sa ikapito nga adlaw kiskisan niya ini. 10Sa ikawalo nga adlaw magdala sia sing duha ka tukmo ukon duha ka kuyabog nga salampati sa sacerdote sa gawang sang layanglayang nga tiliponan, 11kag ihalad sang sacerdote ang isa nga halad-tungud-sa-sala kag ang isa nga halad-nga-sinonog, kag maghimo sing katumbasan tungud sa iya, kay nagpakasala sia bangud sa patay. Kag magpakabalaan sang iya olo sa amo nga adlaw, 12kag magpain sia sa Ginoo sa mga adlaw sang iya pagpain, kag magdala sia sing cordero nga lalaki nga isa ka tuig nga halad-tungud-sa-paglapas; apang ang nahaunang mga adlaw manginwala sing pulus, bangud nga nadagtaan ang iya pagpain.
13“Kag ini amo ang kasogoan sang Nazareo, kon matuman ang mga adlaw sang iya pagpain:#Binu. 21:24. dalhon sia sa gawang sang layanglayang nga tiliponan, 14kag magdolot sia sang iya halad sa Ginoo, isa ka cordero nga isa ka tuig nga walay kasawayan nga sa halad-nga-sinonog, kag isa ka cordera nga isa ka tuig nga walay kasawayan nga sa halad-tungud-sa-sala, kag isa ka carnero nga lalaki nga walay kasawayan nga sa mga halad-sa-paghidait, 15kag isa ka alat nga tinapay nga walay tapay, mga kalan-onon nga harina nga mapino nga nasamoan sing lana, kag mga tinapay nga manipis nga walay tapay nga nahibo sing lana, kag ang ila halad-nga-kalan-on kag ang ila mga halad-nga-ilimnon. 16Kag dalhon sila sang sacerdote sa atubangan sang Ginoo kag magdolot sang iya halad-tungud-sa-sala kag sang iya halad-nga-sinonog, 17kag idolot niya ang carnero nga halad-sa-paghidait sa Ginoo, pati ang alat nga may tinapay nga walay tapay; maghalad man ang sacerdote sang iya halad-nga-kalan-on kag sang iya halad-nga-ilimnon. 18Kag ang Nazareo magkiskis sang olo sang iya pagpain sa ganhaan sang layanglayang nga tiliponan, kag magkuha sang bohok sang olo sang iya pagpain kag ibutang ini sa kalayo nga yara sa idalum sang mga halad-sa-paghidait. 19Kag ang sacerdote magkuha sang naluto nga abaga sang carnero nga lalaki, kag isa ka kalan-onon nga walay tapay gikan sa alat, kag isa ka manipis nga tinapay nga walay tapay, kag ibutang sila sa mga kamut sang Nazareo, sa tapus nga makiskisan niya ang olo sang iya pagpain, 20kag habogon sila sang sacerdote nga halad-nga-hinabog sa atubangan sang Ginoo; balaan ini nga sa sacerdote, pati ang dughan-nga-hinabog kag ang abaga-nga-binayaw; kag sa tapus sina ang Nazareo makainum sing alak.
21“Amo ini ang kasogoan sang Nazareo nga nagasaad. Ang iya halad sa Ginoo nga sa iya pagpain, luwas sang iya masarangan; sono sa iya saad nga iya ginasaad, sa amo dapat sia maghimo sono sa kasogoan sang iya pagpain.
Ang Sinacerdote nga Pagpakamaayo
22Ang Ginoo nagsiling kay Moises, 23“Isiling kay Aaron kag sa iya mga anak nga lalaki, Sa sining paagi pakamaayohon ninyo ang katawohan sang Israel: isiling ninyo sa ila,
24Ang Ginoo magpakamaayo sa imo kag magbantay sa imo:
25Ang Ginoo magpasilak sang iya nawung sa imo, kag magkalooy sa imo:
26Ang Ginoo magbayaw sang iya nawung sa imo, kag maghatag sa imo sing paghidait.
27“Sa sini ibutang nila ang akon ngalan sa katawohan sang Israel, kag pakamaayohon ko sila.”
Currently Selected:
NUMEROS 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
