NUMEROS 31
31
Ang Israel Nagatimalus sa Madian
1Ang Ginoo nagpamolong kay Moises, 2“Timalusi ang katawohan sang Israel sa mga Madianhon; ugaling isimpon ka sa imo katawohan.” 3Kag si Moises nagpamolong sa katawohan, “Maglupit kamo sa tunga ninyo sing mga tawo nga sa inaway, agud nga magsulung sila sa Madian, sa paghikot sang pagtimalus sang Ginoo sa Madian. 4Magdala kamo sa inaway sing isa ka libo gikan sa tagsa ka kabikahan sa bug-os gid nga kabikahan sang Israel.” 5Gani may gintugyan, gikan sa mga linibo sang Israel, nga isa ka libo gikan sa tagsa ka kabikahan, napulo kag duha ka libo nga lupit sa hinganiban nga sa inaway. 6Kag ginpadala sila ni Moises, isa ka libo gikan sa tagsa ka kabikahan, sa inaway, sila kag si Finees nga anak ni Eleazar nga sacerdote, sa inaway, upud ang mga gamit sang santuario kag ang mga budyong sa iya kamut nga sa pagpaandam. 7Nagpakig-away sila batok sa Madian, sono sa ginsogo sang Ginoo kay Moises, kag ginpatay nila ang tagsa ka lalaki. 8Ginpatay nila ang mga hari sang Madian pati sang ila ginpatay, si Evi, si Requem, si Zur, si Hur, kag si Reba, ang lima ka hari sang Madian; ginpatay man nila sa espada si Balaam nga anak ni Beor. 9Kag ginbihag sang katawohan sang Israel ang mga babayi sang Madian kag ang ila mga magamay; kag gin-agaw nila ang tanan nila nga kahayupan, ang tanan nila nga panong, kag ang tanan nila nga pagkabutang. 10Tinutdan nila ang ila tanan nga banwa nga ginpuy-an nila, kag ang ila tanan napahamtang nga dologan, 11kag kinuha nila ang tanan nga inagaw kag ang tanan nga inati, sa tawo kag sa sapat. 12Niyan gindala nila kay Moises, kag kay Eleazar nga sacerdote, kag sa katilingban sang katawohan sang Israel ang mga bihag kag ang inati kag ang inagaw, sa dologan sa kapatagan sang Moab nga yara sa ubay sang Jordan sa Jerico.
13Naggowa si Moises, kag si Eleazar nga sacerdote, kag ang tanan nga mga principe sang katilingban sa pagbaton sa ila sa gowa sang dologan. 14Kag nagsingkal si Moises sa mga pangolo sang kasoldadosan, ang mga pangolo sang linibo kag ang mga pangolo sang ginatus, nga nagpauli gikan sa pag-alagdan sang inaway. 15Nagsiling sa ila si Moises, “Ginluwas bala ninyo nga buhi ang tanan nga mga babayi? 16Yari karon, ini sila, sa laygay ni Balaam, nanginkabangdanan sang paglalis sang katawohan sang Israel batok sa Ginoo sa butang nahanungud sang Peor,#Num. 25:1-9. kag sa sini nag-abut ang kamatay sa tunga sang katilingban sang Ginoo. 17Busa karon, patya ninyo ang tagsa ka lalaki sa tunga sang mga magamay, kag patya ang tagsa ka babayi nga nakakilala sing lalaki sa paghulid sa iya. 18Apang luwasa ninyo nga buhi nga sa inyo ang tanan nga bata nga babayi, nga wala makakilala sing lalaki sa paghulid sa iya. 19Magpabilin kamo sa gowa sang dologan sing pito ka adlaw; ang bisan sin-o nga nakapatay sing tawo, kag ang bisan sin-o nga nakatandug sing pinatay, paninlo kamo sa ikatlo nga adlaw kag sa ikapito nga adlaw, kamo kag ang inyo mga bihag. 20Nahanungud sa tagsa ka panapton kag tanan nga nabuhat sa panit, kag tanan nga binuhat sa bulbul sang kanding, kag tanan nga butang nga nahimo sa kahoy, tinloan ninyo.”
Ang Pagbahinbahin sang Inagaw
21Kag si Eleazar nga sacerdote nagsiling sa mga tawo nga hangaway nga nagkadto sa inaway: “Ini amo ang palatukuran sang kasogoan nga ginsogo sang Ginoo kay Moises: 22lamang ang bulawan, ang pilak, ang saway, ang salsalon, ang istanyo, kag ang tingga, 23ang tagsa ka butang nga dimaduktan sang kalayo, paagihon ninyo sa kalayo, kag manginmatinlo ini. Walay sapayan tinloan ini sang tubig sa pagkadimatinlo; kag ang tanan nga dimaduktan sang kalayo paagihon ninyo sa tubig. 24Bunakan ninyo ang inyo mga bayo sa ikapito nga adlaw, kag manginmatinlo kamo; kag sa tapus sini magsulud kamo sa dologan.”
25Ang Ginoo nagpamolong kay Moises, 26“Isipa ang kadamuon sang mga inatihan nga nakuha, tawo kag sapat, ikaw kag ang sacerdote nga si Eleazar kag ang mga pangolo sang mga kabaranggayan sang katilingban; 27kag tung-on ang inatihan, sa mga lalaki nga sampaton sa inaway nga nagkadto sa inaway kag sa bug-os nga katilingban. 28Kag kuhai sing buhis nga sa Ginoo ang mga lalaki nga hangaway nga nagkadto sa inaway, sa lima ka gatus isa ka kalag, sang mga tawo kag sang mga baka kag sang mga asno kag sang mga panong; 29sa katunga nila kuhaon ninyo ini, kag ihatag ini kay Eleazar nga sacerdote nga sa halad-nga-binayaw sa Ginoo. 30Kag sa katunga nga iya sang katawohan sang Israel kuha ka sing isa nga buhinon sa tagsa ka kalim-an, sang mga tawo, sang mga baka, sang mga asno, kag sang mga panong, sang tanan nga kahayupan, kag ihatag sila sa mga Levinhon nga nagatatap sang tinulin sang kayangkayang sang Ginoo.” 31Kag si Moises kag si Eleazar nga sacerdote naghimo sono sa ginsogo sang Ginoo kay Moises.
32Karon ang inatihan nga kapin kag labaw sa inagaw nga ginkuha sang mga lalaki nga hangaway: anum ka gatus kag kapitoan kag lima ka libo ka carnero, 33kapitoan kag duha ka libo ka baka, 34kan-uman kag isa ka libo ka asno, 35kag katloan kag duha ka libo ka tawo tanan, sang mga babayi nga wala makakilala sing lalaki paagi sa paghulid sa iya. 36Kag ang katunga, nga pahat sang mga nagkadto sa inaway, sa kadamuon tatlo ka gatus kag katloan kag pito ka libo kag lima ka gatus ka carnero, 37kag ang buhis nga sa Ginoo gikan sa carnero anum ka gatus kag kapitoan kag lima. 38Ang mga baka katloan kag anum ka libo, gikan sa ila ang buhis nga sa Ginoo kapitoan kag duha. 39Ang mga asno katloan ka libo kag lima ka gatus, gikan sa ila ang buhis nga sa Ginoo kan-uman kag isa. 40Ang mga tawo napulo kag anum ka libo, gikan sa ila ang buhis nga sa Ginoo katloan kag duha ka tawo. 41Kag ginhatag ni Moises ang buhis, nga halad-nga-binayaw sa Ginoo, kay Eleazar nga sacerdote, sono sa ginsogo sang Ginoo kay Moises.
42Gikan sa katunga nga iya sang katawohan sang Israel, nga ginpain ni Moises gikan sa mga tawo nga nagpakig-away— 43karon ang katunga nga iya sang katilingban tatlo ka gatus kag katloan kag pito ka libo kag lima ka gatus ka carnero, 44katloan kag anum ka libo ka baka, 45kag katloan ka libo kag lima ka gatus ka asno, 46kag napulo kag anum ka libo ka tawo— 47Sa katunga nga ila sang katawohan sang Israel si Moises nagkuha sing isa nga buhinon sa tagsa ka kalim-an, sa tawo kag sapat, kag ginhatag sila sa mga Levinhon nga nagtatap sang tinulin sang kayangkayang sang Ginoo; sono sa ginsogo sang Ginoo kay Moises.
48Niyan ang mga manugdumala sa ibabaw sang mga linibo sang kasoldadosan, ang mga pangolo sang linibo kag ang mga pangolo sang ginatus, nagpalapit kay Moises, 49kag nagsiling sila kay Moises, “Ang imo mga alagad nag-isip sang kadamuon sang mga lalaki nga hangaway nga yari sa idalum sang amon pagtatap, kag wala sing nakulang nga isa ka tawo sa amon. 50Kag nadala namon ang dolot sang Ginoo, ang nakuha sang tagsa ka tawo, nga mga huluyason nga bulawan, mga talikala sa bokoboko, kag mga pulseras, mga singsing nga inugpat-in, mga aritos, kag mga kolintas, sa paghimo sing katumbasan tungud sa amon mga kalag sa atubangan sang Ginoo.” 51Kag si Moises kag si Eleazar nga sacerdote nagbaton sa ila sang bulawan, sang tanan nga huluyason nga nahuman. 52Kag ang tanan nga bulawan sang halad-nga-binayaw nga gindolot nila sa Ginoo, napulo kag anum ka libo kag pito ka gatus kag kalim-an ka siclo gikan sa mga pangolo sang mga linibo, kag gikan sa mga pangolo sang mga ginatus. 53(Ang mga tawo nga hangaway nagkuha sing inagaw, ang tagsa ka tawo sa iya kaugalingon.) 54Kag ginbaton ni Moises kag ni Eleazar nga sacerdote ang bulawan sang mga pangolo sang mga linibo kag sang mga ginatus, kag ginsulud sa layanglayang nga tiliponan, nga sa handumanan sang katawohan sang Israel sa atubangan sang Ginoo.
Currently Selected:
NUMEROS 31: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
