NUMEROS 30
30
Ang Kasogoan nahanungud sang mga Saad
(Deut. 23:21-23)
1Si Moises nagpamolong sa mga pangolo sang mga kabikahan sang katawohan sang Israel, “Ini amo ang butang nga ginsogo sang Ginoo. 2Kon ang isa ka tawo magsaad sing saad sa Ginoo, ukon magsumpa sa paghigot sang iya kalag sa isa ka kalig-onan, dili niya pagpasipad-an ang iya polong; himoon niya sono sa tanan nga naggowa sa iya baba.#Mat. 5:33. 3Kon ang isa ka babayi man maghimo sing saad sa Ginoo, kag maghigot sang iya kaugalingon sa isa ka kalig-onan, samtang nga yara sia sa balay sang iya amay, sa iya pagkapamatan-on, 4kag ang iya amay nakabati sang iya saad kag sang iya kalig-onan nga ginhigot niya sa iya kalag, kag ang iya amay maghipus sa iya; niyan ang tanan nga iya saad magpadayon, ang tagsa ka kalig-onan nga ginhigot niya sa iya kalag magpadayon. 5Apang kon dilian sia sang iya amay sa adlaw nga makabati sia, wala sing bisan ano sang iya mga saad, ukon sang iya mga kalig-onan nga ginhigot niya sa iya kalag, magpadayon; kag patawaron sia sang Ginoo, bangud nga gindilian sia sang iya amay. 6Kag kon sia magpamana, samtang nga ang iya mga saad yara sa iya ukon ang natabinas nga pagmitlang sang iya mga bibig nga iya ginhigot sa iya kalag, 7kag ang iya bana makabati sini, kag maghipus sia sa iya sa adlaw nga sia makabati sini; niyan ang mga saad niya magpadayon, kag ang mga kalig-onan nga ginhigot niya sa iya kalag magpadayon. 8Apang kon dilian sia sang iya bana sa adlaw nga mabatian niya ini, niyan mahimo niya nga wala sing pulus ang saad nga yara sa iya, kag ang natabinas nga namitlang sang iya mga bibig, nga ginhigot niya sa iya kalag; kag patawaron sia sang Ginoo. 9Apang ang saad sang balo ukon sang binulagan, ang tagsa ka butang nga ginhigot niya sa iya kalag, magpadayon batok sa iya. 10Kag kon magsaad sia sa balay sang iya bana, ukon higtan niya ang iya kalag sang kalig-onan nga may sumpa, 11kag ang iya bana nakabati sini, kag naghipus sa iya, kag wala pagdilii sia; niyan ang tanan niya nga mga saad magpadayon, kag ang tagsa ka kalig-onan nga ginhigot niya sa iya kalag magpadayon. 12Apang kon ang iya bana maghimo sa ila nga wala sing pulus sa adlaw nga nabatian niya sila, niyan ang bisan ano nga naggowa sa iya mga bibig nahanungud sa iya mga saad, ukon nahanungud sa kalig-onan sang iya kalag, dili magpadayon: ginpakawala sing pulus sila sang iya bana, kag patawaron sia sang Ginoo. 13Ang tagsa ka saad kag ang tagsa ka nagahigot nga sumpa sa pagpiot sang kalag, mapalig-on ini sang iya bana, ukon mapakawala sing pulus ini sang iya bana. 14Apang kon ang iya bana maghipus sing bug-os sa iya sa adlawadlaw, niyan ginapalig-on niya ang tanan niya nga mga saad, ukon ang tanan niya nga mga kalig-onan, nga yara sa iya; napalig-on niya sila, bangud nga naghipus sia sa iya sa adlaw nga nabatian niya sila. 15Apang kon himoon niya sila nga wala sing pulus sa tapus nga nabatian niya sila, niyan sia magaantus sang kalautan sang asawa.”
16Ini sila amo ang mga palatukuran nga ginsogo sang Ginoo kay Moises, sa tunga sang lalaki kag sang iya asawa, sa tunga sang amay kag sang iya anak nga babayi, sa iya pagkapamatan-on, sa balay sang iya amay.
Currently Selected:
NUMEROS 30: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
