LEVITICO 6
6
Ang Kasogoan nahanungud sa Pagpasag-uli
1Ang Ginoo nagpamolong kay Moises, 2“Kon ang bisan sin-o makasala kag makalapas batok sa Ginoo kag makalimbong sa iya isigkatawo nahanungud sa butang nga pinatago ukon sa inugpalig-on, ukon sa pangawat, ukon sa pagpigus sa iya isigkatawo 3ukon nakakita sang nadula kag maglimbong sa sini, kag magsumpa sa kabutigan—sa bisan ano sini tanan nga butang nga ginahimo sang tawo nga nagapakasala sa sini, 4kon nakasala sia kag malinapason, iuli niya ang iya kinawat, ukon ang butang nga iya nakuha sa pagpigus, ukon ang pinatago nga gintugyan sa iya, ukon ang butang nga nadula nga nakita niya, 5ukon ang bisan ano nga butang nga ginsumpaan niya sing dimatuud; dapat gid niya iuli ini sing bug-os, kag magdugang sa sini sang ikalima nga bahin pa, ihatag niya ini sa natungdan, sa adlaw nga nasapwan sia nga malinapason. 6Kag magdala sia sa sacerdote sang iya halad-sa-paglapas sa Ginoo, isa ka carnero nga lalaki nga walay kasawayan gikan sa panong, sono sa imo pagpabili nga sa halad-sa-paglapas; 7kag ang sacerdote maghimo sing katumbasan nahanungud sa iya sa atubangan sang Ginoo, kag patawaron sia nahanungud sa bisan ano nga mahimo niya nga magamalinapason sa sini.”#Num. 5:5-8.
Ang Kasogoan nahanungud sa mga Halad
8Ang Ginoo nagpamolong kay Moises, 9“Sogoa si Aaron kag ang iya mga anak nga lalaki, nga nagasiling, Ini amo ang kasogoan sang halad-nga-sinonog. Ang halad-nga-sinonog magpabilin sa ibabaw sang gatong sa halaran sa bug-os nga gab-i tubtub sa aga, kag ang kalayo sang halaran padabdabon sing dalayon sa iya. 10Kag ang sacerdote magsuklub sang iya panapton nga lino nga manipis, kag isuklub niya sa iya lawas ang iya poroy nga lino, kag magkuha sia sang mga abo diin ang kalayo nag-upus sang halad-nga-sinonog sa ibabaw sang halaran, kag ibutang niya sila sa luyo sang halaran. 11Niyan ubahon niya ang iya mga panapton, kag magsuklub sang iban nga mga panapton, kag dalhon ang mga abo sa gowa sang dologan sa duug nga matinlo. 12Ang kalayo sa halaran magadabdab sa sini sing dalayon, indi ini pagpalongon; kag ang sacerdote magpadabdab sing gatong sa ibabaw sini sa tagsa ka aga, kag ibutang niya sing nagakaigo sa ibabaw sini ang halad-nga-sinonog, kag sonogon sa ibabaw sini ang sapay sang mga halad-sa-paghidait. 13Ang kalayo padabdabon sing dalayon sa ibabaw sang halaran; indi ini pagpalongon.
14“Kag amo ini ang kasogoan sang halad-nga-kalan-on. Idolot ini sang mga anak ni Aaron sa atubangan sang Ginoo, sa atubangan sang halaran. 15Kag magkuha sia sa sini sang iya isa ka hakup sang harina nga mapino sang halad-nga-kalan-on kag sang lana sini kag sang bug-os nga incienso nga yara sa ibabaw sang halad-nga-kalan-on, kag sonogon ini subong nga iya bahin nga handumanan sa ibabaw sang halaran, nga sa kaamyon sa Ginoo. 16Kag ang mabilin sini kaonon ni Aaron kag sang iya mga anak; sa walay tapay kaonon ini sa duug nga balaan; sa sulud sang luwang sang layanglayang nga tiliponan kaonon nila ini. 17Dili pagbibingkahon ini nga may tapay. Nahatag ko ini nga bahin nila sang akon mga halad tungud sa kalayo; ini labi gid kabalaan, subong sang halad-tungud-sa-sala kag subong sang halad-sa-paglapas. 18Ang tagsa ka lalaki sang mga anak ni Aaron magkaon sini, subong nga bahin niya sa gihapon sa bug-os ninyo nga mga kaliwatan, gikan sa mga halad tungud sa kalayo sa Ginoo; ang bisan sin-o nga magtandug sa ila manginbalaan.”
19Ang Ginoo nagpamolong kay Moises, 20“Amo ini ang halad ni Aaron kag sang iya mga anak nga idolot nila sa Ginoo sa adlaw nga haplason sia: ang ikapulo nga bahin sang isa ka efa nga harina nga mapino nga sa halad-nga-kalan-on sing dayon, ang katunga sini sa aga kag ang katunga sini sa kahaponon. 21Sa sartin himoon ini nga may lana; dalhon mo ini kon matomo na sia, sa binilog nga nabibingka ihalad mo ang halad-nga-kalan-on nga maamyon sa Ginoo. 22Ang hinaplas nga sacerdote nga magasalili sa iya, gikan sa mga anak niya, magdolot sini sa Ginoo tungud sa palatukuran nga dayon; upuson ini sing bug-os. 23Ang tagsa ka halad-nga-kalan-on sang sacerdote upuson sing bug-os; indi ini pagkaonon.”
24Ang Ginoo nagpamolong kay Moises, 25“Ipamolong kay Aaron kag sa iya mga anak, Amo ini ang kasogoan sang halad-tungud-sa-sala. Sa duug diin gin-ihaw ang halad-nga-sinonog ihawon ang halad-tungud-sa-sala sa atubangan sang Ginoo; ini labi gid kabalaan. 26Ang sacerdote nga nagadolot sini tungud sa sala magkaon sini; sa duug nga balaan kaonon ini, sa sulud sang luwang sang layanglayang nga tiliponan. 27Ang bisan ano nga makatandug sang unud sini manginbalaan; kag kon may agsik sang iya dugo sa bisan ano nga panapton, hugasan mo ang inagsikan sa duug nga balaan. 28Apang ang kolon nga malotoan sini boongon; kag kon maloto ini sa suludlan nga saway, hinisan ini, kag bunlawan sa tubig. 29Ang tagsa ka lalaki sa tunga sang mga sacerdote magkaon sini; ini labi gid kabalaan. 30Apang wala sing bisan ano nga halad-tungud-sa-sala nga kaonon nga ang iya dugo gindala sa sulud sang layanglayang nga tiliponan sa paghimo sing katumbasan sa balaan nga duug; sonogon ini sa kalayo.
Currently Selected:
LEVITICO 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
