LEVITICO 5
5
1“Kon ang bisan sin-o makasala sa bagay nga nagapamati sia sang tingug sang pagsumpa kag sia saksi, bisan nakita niya ukon nahibaloan, kon indi niya pag-ipabutyag ini, niyan sia maga-antus sang iya sala. 2Ukon kon ang bisan sin-o nga makatandug sang bisan ano nga butang nga dimatinlo, bisan ini lawas nga patay sang sapat nga dimatinlo ukon lawas nga patay sang hayup nga dimatinlo ukon lawas nga patay sang nagasaug nga mga butang nga dimatinlo, kag wala sia makahibalo sini, kag nangindimatinlo sia, niyan magamalinapason sia. 3Ukon kon makatandug sia sang pagkadimatinlo sang tawo, bisan ano nga pagakadimatinlo niya nga nagpadimatinlo sa iya, kag wala sia makahibalo sini, kon makahibalo sia sini niyan magamalinapason sia. 4Ukon kon ang bisan sin-o nga makatabinas sa iya mga bibig sa pagsumpa sa paghimo sing malaut ukon maayo, ang bisan ano nga matabinasan sang tawo sa pagsumpa, kag wala sia makahibalo sini, kon sia makahibalo sini niyan magamalinapason sia sa isa sini sa ila. 5Kon magmalinapason sia sa isa sini sa ila, magatu-ad sia sang sala nga iya nahimo, 6kag magdala sia sa Ginoo sang iya halad-sa-paglapas nga sa sala nga nahimo niya, isa ka bakiya gikan sa panong, cordero ukon kanding, nga halad-tungud-sa-sala; kag ang sacerdote maghimo sing katumbasan tungud sa iya nahanungud sang iya sala.
7“Apang kon indi sia makasarang sing isa ka cordero, niyan magdala sia sa Ginoo sang iya halad-sa-paglapas tungud sa iya sala, sing duha ka tukmo ukon duha ka kuyabog nga salampati, ang isa nga sa halad-tungud-sa-sala kag ang isa nga sa halad-nga-sinonog. 8Dalhon niya sila sa sacerdote, nga magadolot sing una sang isa nahanungud sa halad-tungud-sa-sala; kag magalubag sa pagluta sang iya olo sa iya liog, apang indi ini pag-utason, 9kag iwisik niya ang dugo sang halad-tungud-sa-sala sa kilid sang halaran, kag ang nabilin sang dugo pailigon sa tiilan sang halaran; halad-tungud-sa-sala ini. 10Niyan idolot niya ang ikaduha nga sa halad-nga-sinonog sono sa pagsolondan; kag ang sacerdote maghimo sing katumbasan tungud sa iya nahanungud sa sala nga nahimo niya, kag patawaron sia.
11“Apang kon indi sia makasarang sa pagdala sing duha ka tukmo ukon duha ka kuyabog nga salampati, niyan magdala sia sang iya halad-tungud-sa-sala nga iya nahimo, nga ikapulo nga bahin sang efa sang harina nga mapino nga sa halad-tungud-sa-sala; indi niya ini pagbutangan sing lana, bisan incienso, kay halad-tungud-sa-sala ini. 12Kag dalhon niya ini sa sacerdote, kag ang sacerdote magkuha sa sini sang iya isa ka hakup nga handumanan sini kag sonogon ini sa halaran, kaangay sang mga halad tungud sa kalayo sa Ginoo; halad-tungud-sa-sala ini. 13Sa amo ang sacerdote maghimo sing katumbasan tungud sa iya nahanungud sang iya sala nga nahimo niya sa bisan ano sining mga butang, kag patawaron sia. Kag ang nabilin mangin-iya sang sacerdote, subong nga halad-nga-kalan-on.”
Mga Halad-tungud-sa-Paglapas
14Nagpamolong ang Ginoo kay Moises, 15“Kon ang bisan sin-o makahimo sing paglapas kag makasala sing dihungud sa balaan nga mga butang sang Ginoo, niyan magdala sia sa Ginoo sang iya halad-sa-paglapas, isa ka carnero nga lalaki nga walay kasawayan gikan sa panong, sono sa imo pagpabili sa mga siclo nga pilak, sono sa siclo sang santuario; ini halad-tungud-sa-sala. 16Ulian niya ang butang nga balaan nga ginpakasaypan niya, kag idugang ang ikalima nga bahin sini kag ihatag ini sa sacerdote; kag ang sacerdote maghimo sing katumbasan tungud sa iya sang carnero nga lalaki sang halad-sa-paglapas, kag patawaron sia.
17“Kon ang bisan sin-o makasala, kag makahimo sing bisan ano sang mga butang nga nasogo sang Ginoo nga indi paghimoon, bisan pa wala sia makahibalo sini, wala sing sapayan malinapason sia kag magaantus sia sang iya kalautan. 18Magdala sia sa sacerdote sing isa ka carnero nga lalaki nga walay kasawayan gikan sa panong, sono sa imo pagpabili nga sa halad-sa-paglapas, kag ang sacerdote maghimo sing katumbasan tungud sa iya nahanungud sang butang nga nasaypan niya sing dihungud kag wala mahibaloi, kag patawaron sia. 19Ini halad-sa-paglapas; malinapason sia sa atubangan sang Ginoo.”
Currently Selected:
LEVITICO 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
