JOSUE 24
24
Ang Paalam ni Josue
1Niyan gintipon ni Josue ang tanan nga kabikahan sang Israel sa Siquem, kag ginpatawag ang mga tigulang sang Israel, ang ila mga pangolo, ang ila mga hukom, kag ang ila mga manugdumala; kag nag-atubang sila sa Dios. 2Kag si Josue nagsiling sa bug-os nga banwa, “Amo ini ang ginsiling sang Ginoo, ang Dios sang Israel, ‘Kutub sa dumaan nga tion ang inyo mga ginikanan nga si Tera,#Gen. 11:27. ang amay ni Abraham kag ni Nahor; nagpuyo sa tabok sang suba kag nag-alagad sa iban nga mga dios. 3Niyan ginkuha ko ang inyo amay nga si Abraham gikan sa tabok sang Suba#Gen. 12:1-9. kag gintuytuyan ko sia sa bug-os nga duta sang Canaan, kag ginpabuad ang iya kaliwat. Ginhatag si Isaac sa iya;#Gen. 21:1-3. 4kag ginhatag ko kay Isaac si Jacob kag si Esau.#Gen. 25:24-26. Kag kay Esau ginhatag ko ang kabakoloran sang Seir sa pagtag-iya sini,#Gen. 36:8. kag si Jacob kag ang iya mga anak nagdulhog sa Egipto.#Gen. 46:1-7. 5Kag ginpadala ko si Moises kag si Aaron, kag ginsakit ko ang Egipto sono sa ginhimo ko sa tunga niya;#Ex. 3:1–12:42. kag ugaling ginpagowa ko kamo. 6Niyan ginpagowa ko ang inyo mga ginikanan gikan sa Egipto, kag nag-abut kamo sa dagat; kag ang mga Egiptohanon naglagas sa inyo mga ginikanan sing mga kangga kag mga manugkabayo tubtub sa Dagat nga Mapula. 7Kag sang nagtuaw sila sa Ginoo, nagbutang sia sing kadulum sa tunga ninyo kag sang mga Egiptohanon, kag ginpalapaw ang dagat sa ila kag gintabonan sila; kag ang inyo mga mata nakakita sang ginhimo ko sa Egipto;#Ex. 14:1-31. kag nagpuyo kamo sing madamu nga adlaw sa kamingawan. 8Niyan ginpasulud ko kamo sa duta sang mga Amornon, nga nagpuyo sa tabok sang Jordan; kag sila nagpakig-away sa inyo, kag gintugyan ko sila sa inyo kamut, kag nagtag-iya kamo sang ila duta, kag ginlaglag ko sila gikan sa atubangan ninyo.#Num. 21:21-35. 9Niyan si Balac nga anak ni Sipor, hari sang Moab, nagtindug kag nagpakig-away sa Israel; kag nagpadala sia kag nagpatawag kay Balaam nga anak ni Beor sa pagpakamalaut sa inyo, 10apang indi ako buut magpamati kay Balaam; busa ginapakamaayo pa kamo niya;#Num. 22:1–24:25. gani ginluwas ko kamo gikan sa iya kamut. 11Kag nagtabok kamo sang Jordan#Jos. 3:14-17. kag nag-abut sa Jerico, kag ang mga tawo sang Jerico nagpakig-away sa inyo,#Jos. 6:1-21. ang mga Amornon, ang mga Pereznon, ang mga Canaanhon, ang mga Hethanon, ang mga Gergesnon, ang mga Hevhanon, kag ang mga Jebusnon; kag gintugyan ko sila sa inyo kamut. 12Kag nagpadala ako sang mga alingayo#Ex. 23:28; Deut. 7:20. sa una ninyo, nga nagtabog sa ila gikan sa atubangan ninyo, bisan ang duha ka hari sang mga Amornon; indi sa imo espada ukon sa imo pana. 13Ginhatagan ko kamo sing duta nga wala ninyo pagpangabudlayi, kag mga banwa nga wala ninyo pagpatinduga, kag nagpuyo kamo sa ila; kag nagkaon kamo sa mga ulubasan kag sa mga katamnan sang olivo nga wala ninyo gintanum.’#Deut. 6:10-11.
14“Busa karon kahadluki ang Ginoo, kag alagda sia sa kabunayag kag sa kamatooran; isikway ang mga dios nga gin-alagad sang inyo mga ginikanan sa tabok sang Suba, kag sa Egipto, kag alagda ninyo ang Ginoo. 15Kag kon daw malaut sa inyo ang pag-alagad sa Ginoo, magpili kamo sini nga adlaw kon sin-o ang inyo alagdon, kon ang mga dios nga gin-alagad sang inyo mga ginikanan sa tabok sang Suba, ukon ang mga dios sang mga Amornon nga sa ila duta nagapuyo kamo; apang nahanungud sa akon kag sa akon panimalay, magaalagad kami sa Ginoo.”
16Niyan ang katawohan nagsabat, “Malayo sa amon nga magbiya kami sa Ginoo, sa pag-alagad sa iban nga mga dios; 17kay ang Ginoo nga aton Dios amo ang nagpataklad sa aton kag sa aton mga ginikanan gikan sa duta sang Egipto, gikan sa balay sang kahiolipnan, kag ang naghimo sadto nga mga dalagku nga mga tanda sa aton itololok, kag nagtipig sa aton sa bug-os nga dalanon nga ginlaktan ta, kag sa tunga sang tanan nga mga katawohan nga aton gin-agihan; 18kag ang Ginoo nagtabog gikan sa atubangan naton sang tanan nga katawohan, bisan ang mga Amornon nga nagpuyo sa duta; busa kami man mag-alagad sa Ginoo, kay sia aton Dios.”
19Apang ang Ginoo nagsiling sa katawohan, “Indi kamo sarang makaalagad sa Ginoo; kay sia Dios nga balaan; Dios sia nga maimon; sia indi magpatawad sang inyo mga paglapas ukon sang inyo mga sala. 20Kon magbiya kamo sa Ginoo kag mag-alagad sa mga dios nga dumuloong, niyan magaliso sia kag magahimo sing malaut sa inyo, kag magapapas sa inyo, sa tapus nga nakahimo sia sing maayo sa inyo.” 21Kag ang katawohan nagsiling kay Josue, “Indi; kondi magaalagad kami sa Ginoo.” 22Niyan si Josue nagsiling sa katawohan, “Kamo mga saksi batok sa inyo kaugalingon nga ginpili ninyo ang Ginoo, sa pag-alagad sa iya.” Kag sila nagsiling, “Mga saksi kami.” 23Si Josue nagsiling, “Busa karon isikway ninyo ang mga dios nga dumuloong nga yara sa tunga ninyo, kag ihuyog ang inyo tagiposoon sa Ginoo, ang Dios sang Israel.” 24Kag ang katawohan nagsiling kay Josue, “Magaalagad kami sa Ginoo nga amon Dios, kag magapamati sang iya tingug.” 25Gani sadto nga adlaw si Josue nagpakigkatipan sa katawohan, kag ginbutangan sila sing palatukuran kag pagsolondan sa Siquem. 26Kag ginsulat ni Josue ini nga mga polong sa tolon-an sang kasogoan sang Dios; kag nagkuha sia sing daku nga bato, kag ginpatindug ini didto sa idalum sang terebinto nga yara sa luyo sang santuario sang Ginoo. 27Kag si Josue nagsiling sa bug-os nga katawohan, “Yari karon, ini nga bato manginsaksi batok sa aton; kay nakabati ini sang tanan nga polong nga ginpamolong sa aton sang Ginoo; busa manginsaksi ini nga bato sa inyo, basi magpanghiwala kamo sang inyo Dios.” 28Gani ginpataliwan ni Josue ang katawohan, ang tagsa ka tawo sa iya panublion.
Ang Pagkapatay ni Josue
(Huk. 2:6-10)
29Sa tapus sini nga mga butang napatay si Josue nga anak ni Nun, ang alagad sang Ginoo, nga isa ka gatus kag napulo ka tuig. 30Kag ginlubung nila sia sa dulunan sang iya panublion sa Temnat-sera,#Jos. 19:49-50. nga yara sa kabakoloran sang Efraim, sa aminhan sang bukid nga Gaas.
31Kag nag-alagad ang Israel sa Ginoo sa tanan nga adlaw ni Josue, kag sa tanan nga adlaw sang mga tigulang nga naglawig pa kay Josue kag nakakilala sang tanan nga binuhatan sang Ginoo nga ginhimo niya tungud sa Israel.
Ang mga Tul-an ni Jose Ginlubung sa Siquem
32Kag ang mga tul-an ni Jose nga gindala sang katawohan sang Israel gikan sa Egipto#Gen. 50:24-25; Ex. 13:19. ginlubung nila sa Siquem, sa puna sang duta nga ginbakal ni Jacob sa mga anak ni Hamor nga amay ni Siquem sing isa ka gatus ka bilog nga cuarta;#Gen. 33:19; Juan 4:5; Binu. 7:16. kag nanginpanublion sila sang mga anak ni Jose.
Ang Pagkapatay ni Eleazar
33Kag si Eleazar nga anak ni Aaron napatay; kag ginlubung nila sia sa bakolod ni Finees nga iya anak, nga ginhatag sa iya sa kabakoloran sang Efraim.
Currently Selected:
JOSUE 24: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
