HUKOM 1
1
Si Juda kag si Simeon Nagadaug sang Bezec
1Sa tapus sang kamatayon ni Josue ang katawohan sang Israel nagpamangkot sa Ginoo, “Sin-o bala ang magataklad sing una tungud sa amon batok sa mga Canaanhon, sa pagpakig-away sa ila?” 2Ang Ginoo nagsiling, “Ang Juda magataklad; yari karon, gintugyan ko ang duta sa iya kamut.” 3Kag si Juda nagsiling kay Simeon nga iya utud, “Taklad ka kaupud nakon sa akon bahin, agud nga magpakig-away kita sa mga Canaanhon; kag ako man magaupud sa imo sa imo bahin.” Gani si Simeon nag-upud sa iya. 4Niyan nagtaklad ang Juda kag gintugyan sang Ginoo sa ila kamut ang mga Canaanhon kag ang mga Pereznon; kag sa ila ginsamad nila sa Bezec ang napulo ka libo ka lalaki. 5Sa Bezec nakita nila si Adoni-bezec, kag nagpakig-away sila sa iya, kag gindaug nila ang mga Canaanhon kag ang mga Pereznon. 6Apang si Adoni-bezec nagpalagyo; kag ginlagas nila sia, kag gindakup sia, kag gin-utud ang mga kumalagku sang iya mga kamut kag sang iya mga tiil. 7Kag si Adoni-bezec nagsiling, “Kapitoan ka hari, nga nautdan sang mga kumalagku sang ila mga kamut kag sang ila mga tiil nagapamolot sang ila kalan-on sa idalum sang akon latok; sono sa nahimo ko, amo ang ginbalus sang Dios sa akon.” Kag gindala nila sia sa Jerusalem, kag napatay sia didto.
Ang Juda Nagadaug sang Jerusalem kag Hebron
(Jos. 15:13-14)
8Kag ang mga anak sang Juda nagpakig-away sa Jerusalem, kag nag-agaw sini, kag ginlaglag ini sa sulab sang espada, kag ginsonog sa kalayo ang banwa. 9Kag ugaling ang mga anak sang Juda nagdulhog sa pag-away batok sa mga Canaanhon nga nagpuyo sa kabakoloran, sa Bagatnan, kag sa kapatagan. 10Kag ang Juda naggubat sa mga Canaanhon nga nagpuyo sa Hebron (karon ang ngalan sang Hebron anay amo ang Kiryat-arba); kag ginpatay nila si Sesai kag si Ahiman kag si Talmai.
Si Otniel Nagadaug sang Debir kag Nagabaton kay Acsa
(Jos. 15:15-19)
11Gikan didto gingubat nila ang mga pumuluyo sang Debir. Ang ngalan sang Debir amo anay ang Kiryat-sefer. 12Kag si Caleb nagsiling, “Ang nagagubat sang Kiryat-sefer kag nagaagaw sini, ipaasawa ko sa iya si Acsa nga akon anak.” 13Kag gin-agaw ini ni Otniel nga anak ni Cenaz, lalaki nga manghud ni Caleb; kag ginpaasawa niya sa iya si Acsa nga iya anak. 14Sang nag-abut sia sa iya, ginbuyuk niya sia nga magpangayo sa iya amay sing latagon; kag nagpanaug si Acsa gikan sa asno, kag si Caleb nagsiling sa iya, “Ano bala ang buut mo?” 15Nagsiling sia sa iya, “Hatagi ako sing pagpakamaayo; kay tungud nga ginbutang mo ako sa duta sang Bagatnan, hatagi man ako sing mga tuburan sang tubig.” Kag ginhatagan sia ni Caleb sang mga tuburan nga naibabaw kag sang mga tuburan nga naubus.
Ang Katubtuban sang mga Pagdaug sang Juda kag sang Benjamin
16Kag ang mga anak sang Cenhanon, lalaki nga bayaw ni Moises, nagtaklad gikan sa banwa sang mga palma kaupud sang katawohan sang Juda pakadto sa kamingawan sang Juda, nga yara sa bagatnan sang Arad; kag nagkadto sila kag nagpuyo kaupud sang katawohan. 17Kag si Juda nagkadto upud kay Simeon nga iya utud, kag ginsamad nila ang mga Canaanhon nga nagpuyo sa Sefat, kag ginlaglag ini sing bug-os. Gani ginhingalanan ang banwa Horma. 18Gin-agaw man sang Juda ang Gaza pati ang iya ginsakpan, kag ang Ascalon pati ang iya ginsakpan, kag ang Ecron pati ang iya ginsakpan. 19Kag ang Ginoo nag-upud sa Juda, kag gintabog niya ang mga pumuluyo sang kabakoloran, apang indi sia makatabog sang mga pumuluyo sang nalupyakan, bangud nga sila may mga kangga nga salsalon. 20Kag ginhatag nila ang Hebron kay Caleb, sono sa napamolong ni Moises; kag gintabog niya gikan didto ang tatlo ka lalaki nga anak ni Anak.#Jos. 15:13-14. 21Apang ang mga Jebusnon nga nagpuyo sa Jerusalem wala pagtaboga sang mga anak ni Benjamin sa Jerusalem; gani ang mga Jebusnon nagpuyo upud sa mga anak ni Benjamin sa Jerusalem tubtub sini nga adlaw.#Jos. 15:63; 2 Sam. 5:6; 1 Cron. 11:4.
Ang Jose Nagadaug sang Bet-el
22Ang panimalay ni Jose nagtaklad man batok sa Bet-el; kag nag-upud sa ila ang Ginoo. 23Kag ang panimalay ni Jose nagpalampitaw sang Bet-el. (Karon ang ngalan sang banwa sadto anay amo ang Luz.) 24Kag ang mga manugbantay nakakita sing tawo nga naggowa sa banwa, kag nagsiling sila sa iya, “Ginaampo namon sa imo, ipakita sa amon ang salamputan pasulud sa banwa, kag magamaayo kami sa imo.” 25Kag ginpakita niya sa ila ang salamputan sang banwa; kag ginlaglag nila ang banwa sa sulab sang espada, apang ginpalakat nila ang tawo pati ang bug-os niya nga panimalay. 26Kag ang tawo nagkadto sa duta sang mga Hethanon kag nagpatindug sing banwa, kag ginhingalanan ini Luz; nga amo ang iya ngalan tubtub sini nga adlaw.
Ang Katubtuban sang mga Pagdaug sang Iban nga Kabikahan
27Wala pagtaboga sang Manases ang mga pumuluyo sang Bet-sean kag sang iya mga minoro, ukon sang Taanac kag sang iya mga minoro, ukon ang mga pumuluyo sang Dor kag sang iya mga minoro, ukon ang mga pumuluyo sang Ibleam kag sang iya mga minoro, ukon ang mga pumuluyo sang Meguido kag sang iya minoro; apang ang mga Canaanhon buut magpuyo sa sina nga duta. 28Sang nagbakud ang Israel, ginbutang nila ang mga Canaanhon sa pagpangabudlay sa takay, apang wala sila pagtaboga sing bug-os.#Jos. 17:11-13.
29Kag wala pagtaboga sang Efraim ang mga Canaanhon nga nagpuyo sa Gezer; kondi ang mga Canaanhon nagpuyo sa tunga nila sa Gezer.#Jos. 16:10.
30Wala pagtaboga sang Zabulon ang mga pumuluyo sang Kitron, ukon ang mga pumuluyo sang Nahalol; kondi ang mga Canaanhon nagpuyo sa tunga nila, kag nanginsakup sa pagpangabudlay sa takay.
31Wala pagtaboga sang Aser ang mga pumuluyo sang Acco, ukon ang mga pumuluyo sang Sidon, ukon sang Alab, ukon sang Azcib, ukon sang Helba, ukon sang Afec, ukon sang Rehob; 32kondi ang mga Asernon nagpuyo sa tunga sang mga Canaanhon, ang mga pumuluyo sang duta; kay wala nila pagtaboga sila.
33Wala pagtaboga sang Neftali ang mga pumuluyo sang Bet-semes, ukon ang mga pumuluyo sang Bet-anat, kondi nagpuyo sia sa tunga sang mga Canaanhon, ang mga pumuluyo sang duta; wala sing sapayan ang mga pumuluyo sang Bet-semes kag sang Bet-anat nanginsakup sa pagpangabudlay sa takay.
34Ang mga Amornon nagdusdus sang mga anak ni Dan sa kabakoloran, kay indi sila magtugut sa ila sa pagdulhog sa nalupyakan; 35ang mga Amornon buut magpuyo sa bukid nga Heres, sa Ayalon, kag sa Saalbim, apang ang kamut sang panimalay ni Jose naglandas, sa bagay nga nanginsakup sila sa pagpangabudlay sa takay. 36Kag ang ginsakpan sang mga Amornon kutub sa taklaran sang Acrabim, kutub sa igang kag pa ibabaw.
Currently Selected:
HUKOM 1: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
