JONAS 3
3
Ang Paghinulsul sang Ninive
1Niyan ang polong sang Ginoo nag-abut kay Jonas sa ikaduhang tion, nga nagasiling, 2“Tindug, kadto sa Ninive, inang daku nga banwa, kag ibantala sa iya ang wali nga ginasogo ko sa imo.” 3Gani nagtindug si Jonas kag nagkadto sa Ninive, sono sa polong sang Ginoo. Karon ang Ninive tama kadaku nga banwa, nga tatlo ka adlaw nga lalakton. 4Si Jonas nagsugud sa pagsulud sa banwa, nga nagalakat sing isa ka adlaw nga lalakton. Kag nagsinggit sia, “Kap-atan pa ka adlaw, kag ang Ninive laglagon!” 5Kag ang katawohan sang Ninive nagtoo sa Dios; nagbantala sila sing puasa, kag nagpanaput sing sako, kutub sa kadalagkuan tubtub gid sa mga magamay sa ila.#Mat. 12:41; Luc. 11:32.
6Niyan ang mga balita naglambut sa hari sang Ninive, kag nagtindug sia sa iya trono, gin-uba niya ang iya bayo sa iya, kag nagpangalumbut sia sing sako, kag naglingkod sa mga abo. 7Kag naghimo sia sing pabantala kag ginpahibalo sa bug-os nga Ninive, “Paagi sa mando sang hari kag sang iya mga dungganon: Wala sing tawo ukon sapat, kahayupan ukon panong, nga magtilaw sing bisan anong butang; dili sila magkaon, ukon mag-inum sing tubig, 8kondi pakalumbutan sila sing sako ang tawo kag sapat, kag magtuaw sila sing mabaskug sa Dios; hoo, magtalikod ang tagsatagsa sa ila sa iya malaut nga dalanon kag sa panglugus nga yara sa iya mga kamut. 9Sin-o bala ang nakahibalo, nga ang Dios magliso pa ayhan kag magkalisud kag magtalikod sa iya mabangis nga kaakig, agud nga indi kita mawala?”
10Sang nakita sang Dios ang ila mga binuhatan, nga nagtalikod sila sa ila malaut nga dalanon, nagkalisud ang Dios sang malaut nga ginsiling niya nga himoon niya kuntani sa ila; kag wala niya paghimoa ini.
Currently Selected:
JONAS 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society